ମାଲକାନଗିରି, ୭ା୫(ଡି.ଏନ.ଏ.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ର ଅରଣପୁରରେ ଏପ୍ରିଲ୍ ୨୬ରେ ମାଓବାଦୀଙ୍କ ଆଇଇଡି ବୋମା ବିସ୍ଫୋରଣରେ ୧୧ ଜଣ ଯବାନ ଶହୀଦ ହୋଇଥିଲେ। ଏହି ଘଟଣାରେ ଆଉ ୪ଜଣ ମାଓବାଦୀଙ୍କୁ ଦାନ୍ତେୱାଡା ପୋଲିସ ଗିରଫ କରି ରବିବାର କୋର୍ଟ ଚାଲାଣ କରିଛି। ପୂର୍ବରୁ ଏହି ଘଟଣାରେ ୩ଜଣ ଗିରଫ ହୋଇଥିଲେ। ରବିବାର ୩ ଗିରଫ ପରେ ଏହି ସଂଖ୍ୟା ୭ରେ ପହଞ୍ଚିଛି। ଗିରଫ ୪ ମାଓବାଦୀ ହେଲେ ବୁଦ୍ଧ୍ରା ମାଡଭି, ଜିତେନ୍ଦ୍ର ମୁଚାକି, ହିଡମା ମାଡକମ୍, ହିଡମା ମାଡଭି। ଏମାନେ ସିପିଆଇର ଦର୍ଭା ଡିଭିଜନର ମାଲାଙ୍ଗିର ଏରିଆ କମିଟିରେ ମିଲିସିଆ ସଦସ୍ୟ ଭାବରେ କାର୍ଯ୍ୟ କରୁଥିବା ଜଣାପଡିଛି। ଏନେଇ ଦାନ୍ତେୱାଡା ଏସ୍ପି ସିଦ୍ଧାର୍ଥ ତିୱାରୀ କହିଛନ୍ତି, ଆଇଇଡି ବୋମା ବିସ୍ଫୋରଣ ପରେ ସମ୍ପୃକ୍ତ ଅଞ୍ଚଳରେ ସର୍ଚ୍ଚ ଅପରେଶନକୁ ଜୋରଦାର କରାଯାଇଥିଲା। ସର୍ଚ୍ଚ ଅପରେଶନ ବେଳେ ଏହି ମାଓବାଦୀମାନେ ଧରାପଡିଛନ୍ତି। ସର୍ଚ୍ଚ ଅପରେଶନ ଜାରି ରହିଥିବାରୁ ଏହି ଘଟଣାରେ ଗିରଫ ସଂଖ୍ୟା ଆହୁରି ବଢିପାରେ ବୋଲି ଏସ୍ପି ତିୱାରୀ କହିଛନ୍ତି।
