ରାଇଘର,୬ା୩(ଡି.ଏନ୍.ଏ.):ନବରଙ୍ଗପୁର ଜିଲା ରାଇଘର ବ୍ଲକରେ କିଛିଦିନର ବ୍ୟବଧାନ ପରେ ମାଓବାଦୀମାନେ ପୁଣି ଉପସ୍ଥିତି ଜାହିର କରିଛନ୍ତି। ବ୍ଲକର ଟିମନପୁର ଅଞ୍ଚଳରେ ମାଓବାଦୀ ଲିଫ୍ଲେଟ୍ ପଡିଥିବା ଦେଖିବାକୁ ମିଳିଛି। ଉଦନ୍ତୀ ଏରିଆ ମାଓବାଦୀ କମିଟି ଲେଖାଥିବା ଏହି ଲିଫ୍ଲେଟ୍ରେ ବର୍ତ୍ତମାନ ଆଦିବାସୀମାନଙ୍କ ଜମିକୁ ବଙ୍ଗାଳିମାନଙ୍କୁ ଦେବା ବନ୍ଦ କରିବା ପାଇଁ ଉଲ୍ଲେଖ କରାଯାଇଛି। ବଙ୍ଗାଳୀମାନଙ୍କୁ ଭାରତ ସରକାରଙ୍କ ତରଫରୁ ପଟ୍ଟା ଜମି ଦିଆଯାଇଛି। ହେଲେ ୨୦୦୬ରୁ ଆଦିବାସୀମାନଙ୍କୁ ଜଙ୍ଗଲ ଜମି ପଟ୍ଟା ଦେବା ନିୟମ ରହିଥିଲେ ମଧ୍ୟ ଏ ପର୍ଯ୍ୟନ୍ତ ପ୍ରଦାନ କରାଯାଇନାହିଁ। ବଙ୍ଗାଳୀମାନେ ଆଦିବାସୀମାନଙ୍କ ଜମିକୁ ଦଖଲ କରିବା ସହ ସ୍ତ୍ରୀ, ଝିଅମାନଙ୍କୁ ଅପହରଣ କରୁଛନ୍ତି। ହଳଦୀ, ହାତୀଗାଁ, କୁରାବେଡା, ନକଟିସିମୋଡ଼ା, ଟିମାନପୁର ମୁଣ୍ଡିବେଡ଼ା, ଗୋନା ଓ କୁନ୍ଦେଇ ପଞ୍ଚାୟତ ମଧ୍ୟରେ ଆଦିବାସୀମାନଙ୍କ ଜମିକୁ ବଙ୍ଗାଳୀ ଦଖଲ କରିଛନ୍ତି। ତେଣୁ ତୁରନ୍ତ ଏହି ଜମି ଛାଡିବା ପାଇଁ ମାଓବାଦୀ ଉଦନ୍ତୀ ଏରିଆ କମିଟି ପକ୍ଷରୁ ଲିଫ୍ଲେଟ୍ରେ ଚେତାବନୀ ଦିଆଯାଇଛି। ସୂଚନାଯୋଗ୍ୟ, ରାଇଘର ବ୍ଲକ ଏକ ସୀମାନ୍ତ ତଥା ମାଓବାଦୀ ପ୍ରବଣ ଅଞ୍ଚଳ ହୋଇଥିବାରୁ ମାଓବାଦୀଙ୍କ ପକ୍ଷରୁ ବିଭିନ୍ନ ସମୟରେ ପୋଷ୍ଟର ଓ ବ୍ୟାନର ମରାଯାଉଛି।