ଭବାନୀପାଟଣା,୩।୨(ସ୍ବ.ପ୍ର.): କଳାହାଣ୍ଡି ପୋଲିସ ଏକ ମାଓବାଦୀ କ୍ୟାମ୍ପ ଠାବ କରିବାରେ ସଫଳ ହେଇଛି । ସିକେରକୁପାସ୍ଥିତ ୬୪ ବାଟାଲିୟନ ଓ କଳାହାଣ୍ଡି ଏସ୍ପିଙ୍କ ମିଳିତ ଚଢ଼ାଉ ପରେ ସମାଝୋଲା ଓ ପୋର୍ଗାଲ ରିଜର୍ଭ ଜଙ୍ଗଲରୁ ମାଓବାଦୀ କ୍ୟାମ୍ପ ଠାବ ହୋଇଛି॥ କ୍ୟାମ୍ପରୁ ଗୋଟିଏ ଦେଶୀ ବନ୍ଧୁକ, ୯ଟି ଇଲେକ୍ଟ୍ରି ଡିଟୋନେଟର, ୧୧ଟି ଜେଲେଟିନ ଷ୍ଟିକ, ମାଓବାଦୀ ପତ୍ରିକା, ବ୍ୟାନର, ପୁସ୍ତିକା, ଇଲେକ୍ଟ୍ରି ବୋର୍ଡ଼, ୪ଟି ବ୍ୟାଟେରି, ୨ଟି ମଶାରି, ୨ଟି ପାଣି ବୋତଲ, କଳା ପଲିଥିନ, କୁରାଢି, ଟର୍ଚ୍ଚ ଲାଇଟ, ଜୋତା, ମାଓବାଦୀ ଡ୍ରେସ ସହିତ ବିଭିନ୍ନ ପ୍ରକାର ଔଷଧ ଜବତ କରାଯାଇଛି। ଅଞ୍ଚଳରେ କିଛିଦିନ ହେଲା ସିପିଆଇର କିଛି ମାଓବାଦୀ ସାଦା ପୋଷାକରେ ବୁଲୁଥିବା ସୂଚନା ପାଇ କଳାହାଣ୍ଡି ଏସ୍ପି ତାଙ୍କୁ ଧରିବା ପାଇଁ ଉଦ୍ୟମ କରିଥିଲେ। କିନ୍ତୁ ଚଢ଼ାଉ ସମୟରେ ମାଓବାଦୀମାନେ ଖସି ଯିବାରେ ସଫଳ ହେଇଛନ୍ତି। ବର୍ତ୍ତମାନ ଅଞ୍ଚଳରେ ଚଢ଼ାଉ ଜାରି ରହିଛି ବୋଲି ଭବାନୀପାଟଣାରେ ଆୟୋଜିତ ଏକ ଖବରଦାତା ସମ୍ମିଳନୀରେ କଳାହାଣ୍ଡି ଏସ୍ପି ଅଭିଲାଷ ଜି ସୂଚନା ଦେଇଛନ୍ତି ।
