ପଟ୍ଟାଙ୍ଗୀ,୩ା୧୧(ଡି.ଏନ.ଏ.): ଆନ୍ଧ୍ର ସୀମାନ୍ତ କୋରାପୁଟ ଜିଲା ପଟ୍ଟାଙ୍ଗୀ ଅଞ୍ଚଳରେ ଗୁରୁବାର ମାଓବାଦୀ ପୋଷ୍ଟର ଦେଖିବାକୁ ମିଳିଛି। ଦୀର୍ଘ ଦିନର ବ୍ୟବଧାନ ପରେ ପୁଣି ମାଓବାଦୀ ବ୍ୟାନର ଲାଗିବା ଅଞ୍ଚଳର ସୁରକ୍ଷା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି।
ମିଳିଥିବା ସୂଚନା ମୁତାବକ, ଏହି ବ୍ଲକ ଅଞ୍ଚଳରେ ପ୍ରାୟ ୬ ବର୍ଷ ହେଲା ମାଓବାଦୀଙ୍କ ଗତିବିଧି ସହ ପୋଷ୍ଟର, ବ୍ୟାନର ଦେଖିବାକୁ ମିଳୁ ନ ଥିଲା। ଦୀର୍ଘ ବର୍ଷର ବ୍ୟବଧାନ ପରେ ପଟ୍ଟାଙ୍ଗୀ ଥାନା ଅନ୍ତର୍ଗତ ଜାତୀୟ ରାଜପଥ ପାର୍ଶ୍ୱରେ ଥିବା ପୁକାଲି ଛକରେ ଗୋଟିଏ ଲାଲ ରଙ୍ଗର ବ୍ୟାନର ଏବଂ ଏକ ଦୋକାନ କାନ୍ଥରେ ଲାଲ ରଙ୍ଗରେ ଲେଖାଥିବା ଦୁଇଟି ପୋଷ୍ଟର ଲଗାଯାଇଥିବା ଦେଖିବାକୁ ମିଳିଛି। ତେବେ ଏହା ପ୍ରକୃତରେ ମାଓବାଦୀଙ୍କ କାର୍ଯ୍ୟ କି ଅନ୍ୟ କେହି ଏପରି କରି ଲୋକଙ୍କ ମନରେ ଭୟ ସୃଷ୍ଟି ପାଇଁ ଉଦ୍ୟମ କରୁଛନ୍ତି ତାହା ପୋଲିସ ତଦନ୍ତ କରି ସ୍ପଷ୍ଟ କରିବାକୁ ସାଧାରଣରେ ଦାବି ହେଉଛି।
ମରାଯାଇଥିବା ପୋଷ୍ଟରରେ ଖଣି ଖନନ ଅଞ୍ଚଳରେ ହିଣ୍ଡାଲ୍କୋ, ମୈତ୍ରୀ କମ୍ପାନୀର ଦଲାଲ ଭାବେ କାମ କରୁଥିବା ଲୋକମାନଙ୍କୁ ଚେତାବନୀ ଦିଆଯାଇଛି। ଦଲାଲ କାମ ନ ଛାଡ଼ିଲେ ପ୍ରଜାକୋର୍ଟରେ ଦଣ୍ଡିତ କରାଯିବ ବୋଲି କୁହାଯାଇଛି। ବ୍ୟାନରରେ ସମ୍ପୃକ୍ତ ବ୍ୟକ୍ତିମାନଙ୍କ ନାମ ଉଲ୍ଲେଖ ରହିଛି। ତଳେ ଓଡ଼ିଶା ରାଜ୍ୟ କମିଟି ସିପିଆଇ ମାଓବାଦୀ ଲେଖା ହୋଇଛି। ପୋଲିସ ବହୁ ବିଳମ୍ବରେ ଘଟଣାସ୍ଥଳରେ ପହଞ୍ଚି ଲାଗିଥିବା ପୋଷ୍ଟରକୁ ଜବତ କରିଛି।