ଲାଠୋର,୧୫ା୫(ଡି.ଏନ.ଏ.): କିଛି ଦିନର ନୀରବତା ପରେ ବଲାଙ୍ଗୀର ଜିଲା ଲାଠୋର ଥାନା ଅଧୀନ ଘୁନସର ଓ ପୁଟକେଲଚୁଆ ଗ୍ରାମ ମଝି ବଜାର ପାଣ୍ଡାଲରେ ମାଓବାଦୀମାନେ ବ୍ୟାନର ମାରି ସେମାନଙ୍କ ଉପସ୍ଥିତି ଜାହିର କରିଛନ୍ତି। ପାଣ୍ଡାଲର ଦୁଇଟି ସ୍ଥାନରେ ଲାଲରଙ୍ଗର ବ୍ୟାନର ମରାଯାଇଥିବା ରବିବାର ଦେଖିବାକୁ ମିଳିଥିଲା। ଓଡ଼ିଆ ଏବଂ ହିନ୍ଦୀରେ ଲେଖା ହୋଇଥିବା ବ୍ୟାନରରେ ମାଓବାଦୀମାନେ ପୋଲିସର ଦମନଲୀଳା ବିରୋଧରେ ଆସନ୍ତା ୨୦ତାରିଖରେ ଓଡ଼ିଶା ବନ୍ଦ ସଫଳ କରିବାକୁ ଆହ୍ବାନ ଦିଆଯାଇଛି। ଗତ ୨ବର୍ଷ ଭିତରେ ପୋଲିସ ଗୁଳିରେ ମୃତ ୨୦ବିପ୍ଳବୀଙ୍କୁ ହତ୍ୟା ପ୍ରତିବାଦରେ ବନ୍ଦକୁ ସଫଳ କରିବାକୁ ଏଥିରେ ଆହ୍ବାନ ଦିଆଯାଇଛି। କମ୍ରେଡ଼ ରବିନ୍ଦ୍ର, କମ୍ରେଡ଼ ରୋହିତ ଅମର ରହେ ଲେଖାଯାଇ ଶେଷରେ ଭାରତ କମ୍ୟୁନିଷ୍ଟ ପାର୍ଟି ମାଓବାଦୀ ଓଡ଼ିଶା ରାଜ୍ୟ କମିଟି ସୂଚନା ଦିଆଯାଇଛି। ରବିବାର ଘୁନସର ବଜାର ଥିବାରୁ ମାଓବାଦୀ ବ୍ୟାନର ଲୋକଙ୍କ ଭିତରେ ଭୟ ସଞ୍ଚାର କରିଥିଲା। ଲାଠୋର ପୋଲିସ ମାଓବାଦୀ ବ୍ୟାନରକୁ ଜବତ କରିଛି।