ନବରଙ୍ଗପୁର,୨୮।୪(ବି.ପ୍ର.): ଛତିଶଗଡ଼ ଦାନ୍ତଓ୍ବୋଡ଼ାଠାରେ ବୁଧବାର ମାଓବାଦୀ ଆକ୍ରମଣରେ ଡିଆର୍ଜିର ୧୦ ଯବାନ ଏବଂ ଜଣେ ଡ୍ରାଇଭରଙ୍କ ମୃତ୍ୟୁ ଘଟିବା ସହ ସୀମାନ୍ତ ଜିଲା ନବରଙ୍ଗପୁରରେ ଏସ୍ଓଜି ଯବାନ ଏବଂ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ଘଟିଛି। ଏଥିରେ ମାଓବାଦୀମାନେ ଛତ୍ରଭଙ୍ଗ ଦେଇଥିବାବେଳେ ଜଙ୍ଗଲ ମଧ୍ୟରୁ ବିପୁଳ ପରିମାଣର ବିସ୍ଫୋରକ ଏବଂ ଗର୍ଭ ନିରୋଧକ ସାମଗ୍ରୀ ଜବତ ହୋଇଥିବା ଏସ୍ପି ଏସ୍. ସୁଶ୍ରୀ ଗୁରୁବାର ସୂଚନା ଦେଇଛନ୍ତି। ଏହି ଘଟଣାରୁ ନବରଙ୍ଗପୁର ଜିଲାରେ ମାଓବାଦୀ ସକ୍ରିୟ ଥିବା ସ୍ପଷ୍ଟ ହୋଇଛି। ବୁଧବାର ଏସ୍ଓଜି ଯବାନ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ପରେ ସେଠାରୁ ଯେଉଁସବୁ ଜିନିଷ ଜବତ ହୋଇଛି ସେଥିରୁ ମହିଳା ମାଓବାଦୀଙ୍କୁ ଯୌନ ନିର୍ଯାତନା ଦିଆଯାଉଥିବା ସନ୍ଦେହ ହେଉଛି ବୋଲି ରିଜର୍ଭ ପୋଲିସ କ୍ୟାମ୍ପଠାରେ ଆୟୋଜିତ ଖବରଦାତା ସମ୍ମିଳନୀରେ ନବରଙ୍ଗପୁର ଏସ୍ପି କହିଛନ୍ତି।
ନବରଙ୍ଗପୁର ଜିଲା ରାଇଘର ଓ ଛତିଶଗଡ଼ର ଗରିଆବନ୍ଧ ଜିଲାର ଶୋଭା ଥାନା ଅଞ୍ଚଳ ସୀମାନ୍ତରେ ମାଓବାଦୀ ଗତିବିଧି ଖବର ମିଳିବାପରେ ମଙ୍ଗଳବାର ସେଠାରେ ଏସ୍ଓଜି ଯବାନଙ୍କ ୨ଟି ଟିମ୍ ମୁତୟନ କରାଯାଇଥିଲା। ବୁଧବାର ସକାଳ ପ୍ରାୟ ୯.୩୦ ସମୟରେ କମ୍ବିଂ ବେଳେ ଏସ୍ଓଜି ଯବାନଙ୍କ ସହ ମାଓବାଦୀ ମୁହାଁମୁହିଁ ହୋଇଥିଲେ। ନୂଆପଡ଼ା ମେନପୁର ଡିଭିଜନ ଉଦନ୍ତି ଅଞ୍ଚଳର ସେଣ୍ଟ୍ରାଲ କମିଟି କ୍ୟାଡର ମାଓବାଦୀ ସିସିଏମ୍ ମୁରଲୀ, ଏସ୍ସିଏମ୍ କାର୍ତ୍ତିକ, ଏସ୍ସିଏମ୍ ଗୁଡୁ, ଏସିଏମ୍ ଆକାଶ, ଏସିଏମ୍ ନନ୍ଦାଲଙ୍କ ସମେତ ୨୦ରୁ ୨୫ ମାଓବାଦୀଙ୍କ ସହ ଗୁଳିବିନିମୟ ହୋଇଥିଲା। ସେମାନଙ୍କ ମଧ୍ୟରେ ୪ଜଣ ମହିଳା ମାଓବାଦୀ ଥିବା ନେଇ ଏସ୍ପି ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏସ୍ଓଜି ଯବାନଙ୍କୁ ଦେଖି ମାଓବାଦୀମାନେ ଗୁଳି ଚଳାଇଥିଲେ। ସେମାନଙ୍କ ମଧ୍ୟରେ ପ୍ରାୟ ଅଧଘଣ୍ଟା ଧରି ଗୁଳିବିନିମୟ ହୋଇଥିଲା। ଘଞ୍ଚ ଜଙ୍ଗଲର ସୁଯୋଗ ନେଇ ମାଓବାଦୀମାନେ ଖସିପଳାଇବାରେ ସକ୍ଷମ ହୋଇଥିଲେ। ଜଙ୍ଗଲରୁ ବହୁ ପରିମାଣର ମାଓବାଦୀ ପୋଷ୍ଟର, ବ୍ୟାନର, ଦୁଇଟି ଟାଙ୍ଗିଆ, ଡିଟୋନେଟର, ବ୍ୟାଟେରି, ୫ଟି ଜୀବନ୍ତ ଗୁଳି, ଗୋଟିଏ ସୋଲାର ପ୍ଲେଟ୍, ଛତା, ଖାଦ୍ୟ ସାମଗ୍ରୀ, ପଲିଥିନ, ଗର୍ଭ ନିରୋଧକ, ଆପତ୍ତିଜନକ ଜିନିଷ, ମ୍ୟାଲେରିଆ କିଟ୍, ଔଷଧ ଆଦି ଜବତ ହୋଇଥିବା ଏସ୍୍ପି ସୂଚନା ଦେଇଛନ୍ତି।