ରାୟଗଡ଼ା ଅଫିସ,୯ା୧୨: ରାୟଗଡ଼ା ଜିଲା ନିୟମଗିରି ପାହାଡ଼ର ବିଭିନ୍ନ ସ୍ଥାନରେ ଏବଂ କଲ୍ୟାଣସିଂହପୁରରେ ଠାରେ ମାଓବାଦୀ ବିରୋଧୀ ପୋଷ୍ଟର ଲାଗିଥିବା ଗୁରୁବାର ଦେଖିବାକୁ ମିଳିଛି। ନିୟମଗିରି ସୁରକ୍ଷା ସମିତି ସଚେତନ ଡଙ୍ଗରିଆ ଯୁବ ପରିଷଦ ପକ୍ଷରୁ ଏହି ପୋଷ୍ଟର ଲଗାଯାଇଥିବା ଉଲ୍ଲେଖ ରହିଛି। ମାଓବାଦୀମାନେ ଡଙ୍ଗରିଆ କନ୍ଧ ମହିଳାଙ୍କୁ ଯୌନ ନିର୍ଯାତନା ଦେଉଥିବା ଉକ୍ତ ପୋଷ୍ଟରରେ ଉଲ୍ଲେଖ ରହିଛି। ପୂର୍ବରୁ ମଧ୍ୟ ଅଞ୍ଚଳରେ ସମାନ ବିଷୟ ଉଲ୍ଲେଖ କରି ମାଓବାଦୀଙ୍କ ବିରୋଧରେ ପ୍ରେସ୍ ବିବୃତ୍ତି ବିଭିନ୍ନ ସ୍ଥାନରେ ଲଗାଯାଇଥିଲା। ତେବେ ଏଭଳି ପୋଷ୍ଟର କିଏ ଲଗାଇଛନ୍ତି ତାହା ସ୍ପଷ୍ଟ ହୋଇନାହିଁ।
ନିୟମଗିରି ବିଭିନ୍ନ ଖଣିଜ ସମ୍ପଦରେ ଭରପୁର ରହିଥିବାରୁ ଏହାର ସୁରକ୍ଷା ନିମନ୍ତେ ନିୟମଗିରି ସୁରକ୍ଷା ମଞ୍ଚ ଗଠନ କରାଯାଇଛି। ଉକ୍ତ ସଙ୍ଗଠନରେ ଅଞ୍ଚଳର ଯୁବତୀ ଏବଂ ମହିଳାଙ୍କୁ ସାମିଲ କରାଯାଇଛି। ତେବେ ନିରୀହ ଡଙ୍ଗରିଆ ଏବଂ ଆଦିବାସୀଙ୍କ ସରଳତାର ସୁଯୋଗ ନେଇ କେତେଜଣ ମାଓବାଦୀ ନେତା ନିର୍ଯାାତନା ଦେବା ସହ ଯୌନ ଶୋଷଣ କରୁଥିବା ଅଭିଯୋଗ ହୋଇଛି। ଏମିତିକି ଛତିଶଗଡ଼ର ଜଣେ ନାବାଳିକାଙ୍କୁ ମାଓବାଦୀ ସଙ୍ଗଠନରେ ସାମିଲ କରି ପରବର୍ତ୍ତୀ ସମୟରେ ତାଙ୍କୁ ଗର୍ଭବତୀ କରି ଛାଡ଼ି ଦେଇଥିବା ବେଳେ ଏବେ ତାଙ୍କର ୧୩ ବର୍ଷର ଏକ ଝିଅ ଅନାଥ ଭାବେ ବଞ୍ଚୁଥିବା ପୋଷ୍ଟରରେ ଉଲ୍ଲେଖ ରହିଛି। ଆଗାମୀ ଦିନରେ ଡଙ୍ଗରିଆ କନ୍ଧ ସମ୍ପ୍ରଦାୟ ମାଓବାଦୀଙ୍କୁ ସମ୍ପୂର୍ଣ୍ଣ ବିରୋଧ କରିବେ ବୋଲି ମଧ୍ୟ ଏଥିରେ କୁହାଯାଇଛି। ଏଥିସହ ଯୁବ ପରିଷଦ ସଙ୍ଗଠନ ଡଙ୍ଗରିଆ କନ୍ଧଙ୍କ ପାଇଁ ନ୍ୟାୟିକ ଏବଂ ଅନ୍ୟ ସୁବିଧା ପ୍ରଦାନ କରିବ ବୋଲି କୁହାଯାଇଛି।