କେନ୍ଦୁଝର, ୫ା୧୧(ଡି.ଏନ.ଏ.)-ରାଜ୍ୟ ଏବଂ କେନ୍ଦ୍ର ସରକାର ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳର ବିକାଶ ପାଇଁ ଅନେକ ଯୋଜନା ମାଧ୍ୟମରେ କୋଟି କୋଟି ଟଙ୍କା ଖର୍ଚ୍ଚ କରୁଥିଲେ ମଧ୍ୟ ଏବେ ବି କେନ୍ଦୁଝର ଜିଲାର ଅନେକ ଗାଁରେ ବିକାଶ ଅପହଞ୍ଚ ହୋଇ ରହିଛି। ଏହିପରି ଏକ ଗାଁ ହେଉଛି ହରିଚନ୍ଦନପୁର ବ୍ଲକ ପିଠାଗୋଳା ପଞ୍ଚାୟତ ମରାଗୁଳା ଗାଁ। ସ୍ବାଧୀନତାର ଦୀର୍ଘବର୍ଷ ବିତିଯାଇଥିଲେ ମଧ୍ୟ ଅଞ୍ଚଳବାସୀ ସବୁ ପ୍ରକାର ମୌଳିକ ସୁବିଧାରୁ ବଞ୍ଚତ୍ତ। ଶିକ୍ଷା,ସ୍ବାସ୍ଥ୍ୟ ଓ ଗମନାଗମନ ଏବେ ବି ସେମାନଙ୍କ ପାଇଁ ସାତସପନ। ଏହି ଦୁର୍ଗମ ଗାଁକୁ ରାସ୍ତା ନାହିଁ କି ବିଦ୍ୟୁତ୍ ନାହିଁ। ରାସ୍ତା ଘାଟ ନ ଥିବାରୁ ସ୍ବାସ୍ଥ୍ୟ ସେବା ପାଇଁ ଲୋକଙ୍କୁ ଚାଲି ଚାଲି ମେଡିକାଲ ଯିବାକୁ ପଡୁଛି। ଗର୍ଭବତୀ ମହିଳା ଏବଂ ଗୁରୁତର ରୋଗୀଙ୍କୁ ଭାରରେ ବୋହି ମେଡିକାଲ ଅଣାଯାଉଛି।
ଏହି ଗାଁକୁ ଯିବାକୁ ହେଲେ ପଥୁରିଆ ଓ ପାଦଚଲା ରାସ୍ତା ହିଁ ଏକମାତ୍ର ଭରସା। ଜରୁରୀକାଳୀନ ସେବା ପାଇବା ଏକ ପ୍ରକାର ଅସମ୍ଭବ ହୋଇପଡିଛି। ବର୍ଷା ଦିନ କଥା ନ କହିଲେ ଭଲ। ପାହାଡ଼ିଆ ଅଞ୍ଚଳ ହୋଇଥିବାରୁ ବର୍ଷା ହେଲେ ନାଳଗୁଡିକ ପାଣିରେ ଭରି ଯାଇ ପ୍ରଖରସ୍ରୋତ ହୋଇଥାଏ। ଗୋଟିଏ କି ଦୁଇଟି ନୁହେଁ ପ୍ରାୟ ୪ଟି ନାଳକୁ ଡେଇଁ ଅନ୍ୟ ଗ୍ରାମକୁ ଯିବାକୁ ହୋଇଥାଏ। ମରାଗୁଳା ଗାଁରେ ୬୦ ଜୁଆଙ୍ଗ ପରିବାର ରହିଥିବାବେଳେ କୌଣସି କାର୍ଯ୍ୟରେ ଗାଁରୁ ବାହାରକୁ ଗଲେ ତାଙ୍କୁ ଏହି ନାଳ ପାର ହୋଇ ପଳାଶପାଳ ପାଖକୁ ଆସି ମୁଖ୍ୟ ରାସ୍ତା ଧରିବାକୁ ହୋଇଥାଏ।
ଦୁଃଖର କଥା ଏହି ଗାଁ ପାଇଁ ସବୁଠୁ ବିପଦ ସୃଷ୍ଟି କରିଥାଏ ମୂଷଳ ନଦୀ। ଯେତେବେଳେ ମୂଷଳ ନଦୀରେ ପାଣି ଆସିଥାଏ ସେତେବେଳେ ତା’ର ରୂପ ଭୟଙ୍କର ହୋଇଥାଏ। ଅତି ଆବଶ୍ୟକ କାମ ପଡ଼ିଲେ ଗାଁ ଲୋକ ଜୀବନକୁ ବାଜି ଲଗାଇ ନାଳ ଅତିକ୍ରମ କରି ଯାତାୟତ କରିଥାନ୍ତି। ପିଡିଏସ ସାମଗ୍ରୀ ଆଣିବାକୁ ହେଲେ ପାହାଡ଼ ତଳକୁ ଚାଲି ଚାଲି ୩ କି.ମି. ଦୂର ଜଙ୍ଗଲ ରାସ୍ତା ଦେଇ ଯିବାକୁ ପଡ଼ିଥାଏ। ମରାଗୁଳା ଗାଁକୁ ସବୁଦିନିଆ ଯାତାୟାତ ପାଇଁ ରାସ୍ତା କରିବାକୁ ଦାବି ହେଉଥିଲେ ମଧ୍ୟ ପ୍ରଶାସନ ଏଥିପ୍ରତି ଅଣଦେଖା କରୁଥିବା ଅଭିଯୋଗ ହୋଇଛି। ଏମାନେ ସ୍ବାସ୍ଥ୍ୟ ସେବା ପାଇଁ ୨୦ କି.ମି. ଦୂର ହରିଚନ୍ଦନପୁର ଡାକ୍ତରଖାନା ଉପରେ ନିର୍ଭରଶୀଳ।
ଗାଁରେ ଗୋଟିଏମାତ୍ର ନଳକୂପ ପିଇବା ଅନୁପଯୋଗୀ ହୋଇଥିବାରୁ ଚୂଆରୁ ପାଣି ସଂଗ୍ରହ କରି ପିଇଥାନ୍ତି। ଆଜି ପର୍ଯ୍ୟନ୍ତ ମୋବାଇଲ ସେବା ପାଇନାହାନ୍ତି। ମୂଷଳ ନଦୀ ଓ ଅନ୍ୟ ୩ଟି ନାଳରେ ପୋଲ ନିର୍ମାଣ ହେଲେ ମରାଗୁଳାବାସୀ ନିବେଦନ କରିଛନ୍ତି। ଏବାବଦରେ ହରିଚନ୍ଦନପୁର ବ୍ଲକ ଗୋଷ୍ଠୀ ଉନ୍ନୟନ ଅଧିକାରୀ ସୁବ୍ରତ ଜେନାଙ୍କୁ ପଚାରିବାରୁ ହରିଚନ୍ଦନପୁର ବ୍ଲକରେ ସେ ନୂତନ ଭାବେ ଯୋଗ ଦେଇଛନ୍ତି, ଅଳ୍ପଦିନ ମଧ୍ୟରେ ମରାଗୁଳା ଗଁା ପରିଦର୍ଶନରେ ଯାଇ ପଦକ୍ଷେପ ନେବେ ବୋଲି କହିଛନ୍ତି।