ପାରଳାଖେମୁଣ୍ଡି,୧ା୪ (ଗିରିଧାରୀ ପରିଛା): ଗଜପତି ଜିଲା ଗୁମ୍ମା ବ୍ଲକ ଅନ୍ତର୍ଗତ ତୁମ୍ବାଣ ପଞ୍ଚାୟତ ଅନ୍ତର୍ଗତ ମାରାଣ୍ଡି ଗ୍ରାମବାସୀ ଆଜି ମଧ୍ୟ ମୌଳିକ ସୁବିଧାରୁ ବଞ୍ଚିତ। ସରକାରୀ ଯୋଜନା ଏହି ଦୁର୍ଗମ ଅପହଞ୍ଚ ଗ୍ରାମବାସୀଙ୍କ ପାଇଁ ସାତ ସପନ। ଗ୍ରାମକୁ ଯିବାକୁ ରାସ୍ତା ନାହିଁ, ଘଞ୍ଚ ଜଙ୍ଗଲ ଭରା ଖାଲ ଖମା ରାସ୍ତା। ଗ୍ରାମରେ ୨୦୦ରୁ ଉଦ୍ଧର୍ବ ପରିବାର ରହୁଛନ୍ତି। ଏହି ଗ୍ରାମରେ ସରକାରଙ୍କ କୌଣସି ଯୋଜନା ପହଞ୍ଚି ପାରୁନାହିଁ। ଗ୍ରାମବାସୀମାନେ ଅଭିଯୋଗ କରିଛନ୍ତି ଯେ, ଏଠାରେ ରାସ୍ତା ଖଣ୍ଡେ ନାହିଁ। ଛାତ୍ରୀଛାତ୍ର ମଧ୍ୟ ସ୍କୁଲ ଯିବାକୁ ଅସୁବିଧା ଅନୁଭବ କରୁଛନ୍ତି। ଏଠାରେ ପିଇବା ପାଣି ନାହିଁ। ଯେଉଁ ନଳକୂପ ରହିଛି ତାହା କାମ କରୁନାହିଁ। ନିର୍ବାଚନ ପୂର୍ବରୁ ନେତା ମନ୍ତ୍ରୀ ଆସି ଲୋକଙ୍କୁ ଭୁଆଁ ବୁଲାଇ ସବୁ ସମସ୍ୟାର ସମାଧାନ ହୋଇଯିବ ବୋଲି ମିଛ ପ୍ରତିଶ୍ରୁତି ଦେବା ସହ ନିର୍ବାଚନ ପରେ ସେମାନଙ୍କ ଆଉ ଦେଖା ମିଳୁନାହିଁ ବୋଲି ଗ୍ରାମର ମିକଲ ଦଳବେହେରା, ବିନତି ଗମାଙ୍ଗ, ଅନିଲ କାର୍ଜି, ମାନୁଏଲ ଗମାଙ୍ଗ ପ୍ରମୁଖ କହିଛନ୍ତି। ଚଳିତ ନିର୍ବାଚନ ପୂର୍ବରୁ ଯଦି ଏହାର ସମାଧାନ ନହୁଏ ତାହାହେଲେ ନେତାଙ୍କୁ ଗ୍ରାମରେ ପୁରାଇ ଦେବୁନାହିଁ ବୋଲି ଗ୍ରାମବାସୀ କହିଛନ୍ତି। ଖରା ଦିନରେ ଗ୍ରାମରେ ଥିବା କୂପଗୁଡିକ ମଧ୍ୟ ଶୁଖି ଯାଇଥିବା କହିଛନ୍ତି ଗ୍ରାମବାସୀ। ବସୁଧା ଯୋଜନାରେ ଘରେ ଘରେ ଜଳ ଯୋଜନା ଅପହଞ୍ଚ ଥିବା ଯୋଗୁ ଲୋକେ ନିଜ ନିଜ ଟଙ୍କା ଖର୍ଚ୍ଚ କରି ପାଣିଟାଙ୍କି ନିର୍ମାଣ କରିଛନ୍ତି। ମାତ୍ର ସେହି ପାଣିଟାଙ୍କି ସମସ୍ତଙ୍କ ଘରେ ନାହିଁ। ଗ୍ରାମରେ ଦୁଇଟି କୂଅ ରହିଛି। ମାତ୍ର ତାହା ଗ୍ରୀଷ୍ମ ଆରମ୍ଭରୁ ଶୁଖିଯାଉଛି। ଫଳରେ ସ୍ଥାନୀୟ ଲୋକେ ଚୁଆ ପାଣି ଆଣିବା ପାଇଁ ସେହି ମାଟି ରାସ୍ତାରେ ବହୁ ଦୂର ଯାଇ ପାଣି ଅଣୁଥିବା କହିଛନ୍ତି ଗ୍ରାମବାସୀ। ଆମ୍ବୁଲାନ୍ସ ନ ପହଞ୍ଚତ୍ପାରୁ ଥିବାରୁ ଗର୍ଭବତୀ ମହିଳାମାନଙ୍କୁ ଖଟିଆରେ ବୋହି ନେଉଥିବା ଅଭିଯୋଗ କରିଛନ୍ତି। ସ୍ଥାନୀୟ ଲୋକେ ଜିଲା ପ୍ରଶାସନର ଦ୍ୱାରସ୍ଥ ହୋଇ ବହୁବାର ଲିଖିତ ଅଭିଯୋଗ କରିଛନ୍ତି। ହେଲେ ପ୍ରଶାସନ କର୍ଣ୍ଣପାତ କରୁନଥିବା ଗ୍ରାମବାସୀ କହିଛନ୍ତି। ତେଣୁ ଚଳିତ ବର୍ଷ ଭୋଟ ଦେବୁନାହିଁ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି। ଏ ନେଇ ସ୍ଥାନୀୟ ସରପଞ୍ଚ ବୟାଜ ଗମାଙ୍ଗ କହିଛନ୍ତି, ଗତ ଦୁଇ ବର୍ଷ ହେଲା ସେ ବ୍ଲକ ପ୍ରଶାସନ ଠାରୁ ଆରମ୍ଭ କରି ଜିଲା ପ୍ରଶାସନ ପର୍ଯ୍ୟନ୍ତ ସମସ୍ତଙ୍କୁ ଜଣାଇଛନ୍ତି, କିନ୍ତୁ କିଛି ବି ସୁଫଳ ମିଳୁନାହିଁ।
