ବାରିପଦା ଅଫିସ/ ରାଇରଙ୍ଗପୁର,୧୮।୧(ଡି.ଏନ.ଏ.): ଝାଡ଼ଖଣ୍ଡର ଗିରିଡିହି ଜିଲା ପୀରଟାଣ୍ଡ ବ୍ଳକରେ ଅବସ୍ଥିତ ପାରସନାଥ ପର୍ବତକୁ ସାନ୍ତାଳ ଆଦିବାସୀମାନେ ଇଶ୍ୱର ଭାବେ ପୂଜା କରି ଆସୁଛନ୍ତି। ଏହି ପର୍ବତରେ ଆଦିବାସୀମାନଙ୍କର ଜାହେର ଥାନ (ପୂଜାସ୍ଥଳ) ରହିଛି। ଏହାକୁ ଝାଡ଼ଖଣ୍ଡ ସରକାର ଜାନୁଆରୀ ୫ରେ ଭାରତ ସରକାରଙ୍କୁ ପତ୍ର ଲେଖି ଜୈନ ସମାଜକୁ ହସ୍ତାନ୍ତର କରିଛନ୍ତି। ଏହାକୁ ନେଇ ବାରିପଦା ଜୋନାଲ କମିଟିର ସେଙ୍ଗଲ ସଭାପତି ନାରାନ ମୁର୍ମୁଙ୍କ ନେତୃତ୍ୱରେ ମୟୂରଭଞ୍ଜ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରାଯାଇଥିଲା। ଏନେଇ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲାପାଳଙ୍କ ଜରିଆରେ ଦାବିପତ୍ର ପ୍ରଦାନ କରାଯାଇଛି। ଅଭିଯାନର ରାଷ୍ଟ୍ରୀୟ ସଭାପତି ସାଲଖାନ ମୁର୍ମୁଙ୍କ ନେତୃତ୍ୱରେ ଜାନୁଆରୀ ୧୭ରୁ ‘ମାରାଂ ବୁରୁ ବଞ୍ଚାଅ ଅଭିଯାନ ଭାରତ ଯାତ୍ରା’ ଦେଶର ୫ଟି ପ୍ରଦେଶର ମୁଖ୍ୟାଳୟରେ ଆରମ୍ଭ କରାଯାଇଛି ା ବିକ୍ଷୋଭ କାର୍ଯ୍ୟକ୍ରମରେ ଓଡ଼ିଶା ପ୍ରଦେଶ ସେଙ୍ଗେଲ ସଭାପତି ନରେନ୍ଦ୍ର ହେମ୍ବ୍ରମ, ବାହାଦୂର ମୁର୍ମୁ, ମାଧବ ଚନ୍ଦ୍ର ମୁର୍ମୁ, ବିକାଶ ହେମ୍ବ୍ରମ, ବାବୁଲୁ ମୁର୍ମୁ, ପାନମଣି ହେମ୍ବ୍ରମ, ବନମାଳି ହଁାସଦାଙ୍କ ସମେତ ବହୁ କର୍ମକର୍ତ୍ତା ସାମିଲ ଥିଲେ।
ସେହିପରି ରାଇରଙ୍ଗପୁର ଉପଜିଲାପାଳଙ୍କ କାଯର୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏହି ବିକ୍ଷୋଭରେ ଆଦିବାସୀ ସେଙ୍ଗେଲ ଅଭିଯାନ ସଂଗଠନର ରାଜ୍ୟ ସଭାପତି ନରେନ୍ଦ୍ର ହେମ୍ବ୍ରମ,ରାଇରଙ୍ଗପୁର ଶାଖା ସଂଗଠନର ସଭାପତି କାଲୁରାମ ମୁର୍ମୁ ଏବଂ ମହିଳା ସଭାନେତ୍ରୀ ମାହ୍ମ ହେମ୍ବ୍ରମଙ୍କ ନେତୃତ୍ୱରେ ଶତାଧିକ ମହିଳା ଏବଂ ଯୁବକର୍ମୀଗଣ ସାମିଲ ଥିଲେ ା