ମାଲାବୋ,୧୪।୨ : ମାରବର୍ଗ ଭାଇରସ ଆଫ୍ରିକୀୟ ଦେଶ ଇକ୍ୱାଟୋରିଆଲ ଗିନିରେ ଆତଙ୍କ ସୃଷ୍ଟି କରିଛି। ଏହା କରୋନା ଅପେକ୍ଷା ଅଧିକ ବିପଜ୍ଜନକ ବୋଲି କୁୁହାଯାଉଛି। ଏହାର ସଂକ୍ରମଣ ଯୋଗୁ ଏପର୍ଯ୍ୟନ୍ତ ନଅ ଜଣଙ୍କର ମୃତ୍ୟୁ ଘଟିଛି ଏବଂ ବହୁ ସଂଖ୍ୟକ ଲୋକ ଅସୁସ୍ଥ ଅଛନ୍ତି। ମାରବର୍ଗ ଭୂତାଣୁ ସଂକ୍ରମଣର ଲକ୍ଷଣ ଇବୋଲା ଭୂତାଣୁ ସହିତ ସମାନ ବୋଲି ବିଶେଷଜ୍ଞ କହିଛନ୍ତି।
ଏଥିରେ ଆକ୍ରାନ୍ତଙ୍କୁ ଜ୍ୱର, ମୁଣ୍ଡବିନ୍ଧା ,ଛାତି ଯନ୍ତ୍ରଣା ହୋଇଥାଏ। ଯେତେବେଳେ ଅବସ୍ଥା ଖରାପ ହୁଏ, ଆକ୍ରାନ୍ତଙ୍କ ମୃତ୍ୟୁ ଘଟିଥାଏ। ସଂକ୍ରମଣର ସାତ ଦିନ ମଧ୍ୟରେ ଅନେକଙ୍କଠାରେ ଆଭ୍ୟନ୍ତରୀଣ ରକ୍ତସ୍ରାବ ଲକ୍ଷଣ ମଧ୍ୟ ଦେଖାଯାଇଥାଏ। ବିଶ୍ୱସ୍ବାସ୍ଥ୍ୟ ସଂଗଠନ ଏକ ବିବୃତ୍ତି ଜାରି କରି କହିଛି ଯେ ମାରବର୍ଗ ଭାଇରସର ଏତେ ବଡ଼ ଆକାରରେ ଏହା ହେଉଛି ପ୍ରଥମ ସଂକ୍ରମଣ। ପ୍ରଭାବିତ ଅଞ୍ଚଳରେ ଆଡଭାନ୍ସ ଦଳ ନିୟୋଜିତ କରାଯାଇଛି, ଯାହା ସଂକ୍ରମିତଙ୍କଠାରେ ଭୁତାଣୁ ଚିହ୍ନଟ କରୁଛନ୍ତି। ଆକ୍ରାନ୍ତଙ୍କୁ ଆଇସୋଲେଟ କରାଯାଉଛି। ସେମାନଙ୍କୁ ଆବଶ୍ୟକ ଚିକିତ୍ସା ଯୋଗାଇ ଦିଆଯାଉଛି।
ଏହାର ସଂକ୍ରମଣକୁ ରୋକିବା ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ ସ୍ବାସ୍ଥ୍ୟ ଜରୁରୀକାଳୀନ ବିଶେଷଜ୍ଞ, ସଂକ୍ରମଣ ନିରାକରଣ ଦଳ, ଲ୍ୟାବ ଏବଂ ଯୋଗାଯୋଗ ସହାୟତା ପ୍ରଣାଳୀ ନିୟୋଜିତ କରିଛି।
ବିଶ୍ୱ ସ୍ବାସ୍ଥ୍ୟ ସଂଗଠନର ଆଞ୍ଚଳିକ ନିର୍ଦ୍ଦେଶକ ଡ. ମାତିଶିଦୋ ମୋଏତି କହିଛନ୍ତି ଯେ ମାରବର୍ଗ ସଂକ୍ରମଣ ଶୀଘ୍ର ବ୍ୟାପିଥାଏ ଏବଂ ଏହାର ସଂକ୍ରମଣର ମୃତ୍ୟୁ ହାର ୮୮ପ୍ରତିଶତକୁ ଯାଇପାରେ। ମାରବର୍ଗ ଭୂତାଣୁ ଇବୋଲା ପରିବାରର ଅଟେ।
ଏହି ଭୂିତାଣୁ ବାଦୁଡ଼ିଠାରୁ ମଣିଷ ପର୍ଯ୍ୟନ୍ତ ବ୍ୟାପିଛି ଏବଂ ଏହା ସଂକ୍ରମିତଙ୍କ ସଂସ୍ପର୍ଶରେ ଆସି ଅନ୍ୟ ଲୋକଙ୍କୁ ବ୍ୟାପିଥାଏ। ବର୍ତ୍ତମାନ ପର୍ଯ୍ୟନ୍ତ ଏହି ସଂକ୍ରମଣ ପାଇଁ କୌଣସି ଚିକିତ୍ସା କିମ୍ବା ଟିକା ଉପଲବ୍ଧ ନାହିଁ, କିନ୍ତୁ ଠିକ ସମୟରେ ଚିକିତ୍ସା ଆକ୍ରାନ୍ତଙ୍କର ଜୀବନ ରକ୍ଷା କରିପାରିବ।