ମାଡ୍ରିଡ, ୭।୭: କରୋନା ଭାଇରସ ସଂକ୍ରମଣକୁ ରୋକିବା ପାଇଁ ସ୍ପେନ୍ରେ ଉଦ୍ୟମ ଜାରି ରହିଛି। ଏହି ଲଢ଼େଇରେ ପ୍ରମୁଖ ଭୂମିକା ଗ୍ରହଣ କରୁଥିବା ମେଡିକାଲ ପ୍ରଫେସନାଲଙ୍କୁ ଉତ୍ସାହିତ କରିବାକୁ ଆଗେଇ ଆସିଛନ୍ତି ଅଲିମ୍ପିକ୍ ଚାମ୍ପିୟନ ଗୋଲ୍ଡେନ ଗର୍ଲ କାରୋଲିନା ମାରିନ। କରୋନା ସମୟରେ ନିରନ୍ତର ସେବା ଦେଇ ଲଢ଼େଇ ଜାରି ରଖିଥିବା ପେସାଦାର ସ୍ବାସ୍ଥ୍ୟ କର୍ମଚାରୀମାନଙ୍କୁ ମାରିନ ନିଜେ ଜିତିଥିବା ସ୍ବର୍ଣ୍ଣ ପଦକ ଅଫର କରିଛନ୍ତି। ସ୍ପେନର ଅନେକ ମେଡିକାଲ ପ୍ରଫେସନାଲଙ୍କ ସହ ଭାବ ବିନିମୟ କରି ସେମାନଙ୍କ ମନୋବଳ ବଢ଼ାଇଛନ୍ତି ଏହି ମହିଳା ବ୍ୟାଡ୍ମିଣ୍ଟନ ତାରକା।
ମାରିନ ରିଓ ଅଲିମ୍ପିକ୍ସର ମହିଳା ସିଙ୍ଗଲ୍ସ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଥିଲେ। ସେହିପରି ବିଶ୍ୱ ଚାମ୍ପିୟନଶିପ୍ରେ ଏହି ସ୍ପାନିଶ ମହିଳା ୩ଟି ସ୍ବର୍ଣ୍ଣ ପଦକ ଜିତିଛନ୍ତି। କରୋନା ଭାଇରସ ସଂକ୍ରମଣ ସମୟରେ ସାଧାରଣ ନାଗରିକଙ୍କୁ ଘରେ ରହିବା ପାଇଁ କୁହା ଯାଉଛି। ମାତ୍ର ସମଗ୍ର ବିଶ୍ୱର ମେଡିକାଲ ପ୍ରଫେସନାଲମାନେ ପ୍ରକୃତ ଯୋଦ୍ଧାଭାବେ ଏହା ବିରୋଧରେ ଲଢ଼େଇ ଜାରି ରଖିଛନ୍ତି। ନିରନ୍ତର ସେବାପାଇଁ ଡାକ୍ତର ଏବଂ ଅନ୍ୟ ପେସାଦାର ସ୍ବାସ୍ଥ୍ୟ କର୍ମଚାରୀମାନେ ଲକ୍ଷଲକ୍ଷ ଲୋକଙ୍କର ହୃଦୟ ଜିତିଛନ୍ତି। ବିଶ୍ୱରେ ଅଧିକ କ୍ଷତିଗ୍ରସ୍ତ ହୋଇଥିବା ଦେଶଗୁଡ଼ିକ ମଧ୍ୟରେ ସ୍ପେନ ଅନ୍ୟତମ। ତେଣୁ ଏହା ବିରୋଧରେ ଲଢ଼େଇ ଜାରି ରଖିଥିବା ମେଡିକାଲ ପ୍ରଫେସନାଲଙ୍କୁ ସମର୍ଥନ କରିବା ସହ ନିଜର ସ୍ବର୍ଣ୍ଣ ପଦକ ଦେଇ ଦେବାକୁ ଇଚ୍ଛା ଜାହିର କରିଛନ୍ତି ଏହି ବ୍ୟାଡ୍ମିଣ୍ଟନ ତାରକା। ୨୦୧୬ ରିଓ ଅଲିମ୍ପିକ୍ସ ଫାଇନାଲରେ ଭାରତର ପି.ଭି. ସିନ୍ଧୁଙ୍କୁ ହରାଇ ସ୍ବର୍ଣ୍ଣ ପଦକ ଜିତିଥିବା ମାରିନ ନିକଟରେ ମାଡ୍ରିଡସ୍ଥିତ ଭିର୍ଗେନ ଡେଲ୍ ମାର୍ ହସ୍ପିଟାଲର ଆଗଧାଡ଼ିର ମେଡିକାଲ ପ୍ରଫେଶନାଲଙ୍କ ସହିତ ଭିଡିଓ କଲ୍ ମାଧ୍ୟମରେ ଭାବବିନିମୟ କରି ସମସ୍ତଙ୍କୁ ବିସ୍ମିତ କରିଥିଲେ। ”ସେମାନେ ପ୍ରକୃତରେ ସ୍ପେନର ହିରୋ। ସେମାନଙ୍କ ସହ କଥା ହେବାବେଳେ ମୁଁ ମୋ ପଦକ ଅଫର କରିଛି। ପ୍ରକୃତରେ ସେମାନେ ପ୍ରଶଂସାର ପାତ୍ର“ ବୋଲି ଏକ ସାକ୍ଷାତ୍କାରରେ ମାରିନ କହିଛନ୍ତି। ବାର୍ସିଲୋନାସ୍ଥିତ ସାନିଟାସ କିମା ହସ୍ପିଟାଲର ସ୍ବାସ୍ଥ୍ୟ କର୍ମଚାରୀଙ୍କ ସହ ମଧ୍ୟ ମାରିନ କଥା ହୋଇଛନ୍ତି। ସେଠାରେ ଜଣେ ୧୦୦ ବର୍ଷର ବ୍ୟକ୍ତିଙ୍କୁ କରୋନା ଭାଇରସ ସଂକ୍ରମଣରୁ ସଫଳତାର ସହ ସୁସ୍ଥ କରିବାରେ ଏମାନଙ୍କର ଉଲ୍ଲେଖନୀୟ ଭୂମିକା ରହିଥିଲା।