ବସ୍ତା, ୭।୭(ଡି.ଏନ.ଏ.)-ଓଡ଼ିଶାର ସୀମାନ୍ତ ବାଲେଶ୍ୱର ଜିଲା ଅଧୀନ ବସ୍ତା, ବାଲିଆପାଳ, ଜଳେଶ୍ୱର ଅଞ୍ଚଳରେ ଦିନକୁ ଦିନ ଚୋରି ଓ ଡକାୟତି ବଢ଼ିବାରେ ଲାଗିଛି। ଅପରାଧୀମାନେ ଯୋଜନାବଦ୍ଧ ଭାବେ ଅପରାଧ ଘଟାଇ ପଶ୍ଚିମବଙ୍ଗ, ଝାଡଖଣ୍ଡରେ ଆଶ୍ରୟ ନେଉଛନ୍ତି। ବାରମ୍ବାର ଧରାପଡ଼ିଲେ ମଧ୍ୟ ସେମାନଙ୍କର ନେଟ୍ୱର୍କ ସକ୍ରିୟ ରହୁଥିବାରୁ ଘଟଣାରେ ସମ୍ପୃକ୍ତ ରହୁଛନ୍ତି। ଗତ ଜାନୁୟାରୀ ଓ ଫେବୃୟାରୀରେ ଚୋରି, ଛିନ୍ତାଇ ଓ ଡକାୟତି ମାମଲାରେ ୪ଜଣଙ୍କୁ ବସ୍ତା ପୋଲିସ ଗିରଫ କରି କୋର୍ଟଚାଲାଣ କରିଥିଲା। ଅଧିକ ତଦନ୍ତ ପାଇଁ ପଡୋଶୀ ରାଜ୍ୟ ପକ୍ଷରୁ ସହଯୋଗ ମିଳୁ ନ ଥିବାରୁ ପୋଲିସକୁ ନିରାଶ ହେବାକୁ ପଡୁଛି। ଉକ୍ତ ର଼୍ୟାକେଟ୍ର ଆଉ ୪ଜଣ ଡକାୟତଙ୍କୁ ଗତ ରବିବାର ବସ୍ତା ପୋଲିସ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ବାଲେଶ୍ୱର ସଦର ଥାନା ଅଞ୍ଚଳର ମନୋଜ କୁମାର ନାୟକ (୨୦), ବାରିପଦା ଟାଉନ ଥାନା ଅଞ୍ଚଳର ସେକ ସଲିମ (୨୦), ସେକ ସାହିଲ (୧୯) ଏବଂ ଝାଡ଼ଖଣ୍ଡର ଘମରିଆ ଥାନା ଅଞ୍ଚଳର ମହମ୍ମଦ ଇମତାଜ ଆଲାମ (୨୮)। ତେବେ ଏହି ର଼୍ୟାକେଟ୍ରେ ଅନ୍ୟ ୨ଜଣ ଫେରାର ଥିବା ଜଣାପଡ଼ିଛି।
ବସ୍ତା ଥାନା ଅଧୀନ ୬୦ନଂ. ଜାତୀୟ ରାଜପଥର ମଥାନୀ ନିକଟରୁ ଗତ ଜୁନ୍ ୨୬ ତାରିଖରେ ଏକ କାର୍ (ନଂ. ଡବ୍ଲ୍ୟୁବି୬୮ୟୁ-୪୮୪୮) ଚୋରି ହୋଇଯାଇଥିଲା। ଏନେଇ ଗାଡ଼ି ମାଲିକ ସୁଜିତ ସେନ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା ରୁଜୁ କରି ଏହି ଚୋରି ର଼୍ୟାକେଟ୍କୁ ଧରିବା ପାଇଁ ତଦନ୍ତ ପ୍ରକ୍ରିୟା ଆରମ୍ଭ କରିଥିଲା। ଏହି ର଼୍ୟାକେଟ୍ରେ ଚେର ବାହାର ରାଜ୍ୟକୁ ଲମ୍ବିଥିବା ତଦନ୍ତ ବେଳେ ଜଣାପଡ଼ିବା ପରେ ବସ୍ତା ଥାନା ଆଇଆଇସି ମାନସ କୁମାର ଦେଓଙ୍କ ସମେତ ୨ଜଣ ଏସ୍ଆଇ ଓ ୪ଜଣ କନଷ୍ଟେବଳଙ୍କ ସହ ଏକ ପୋଲିସ ଟିମ୍ ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ଓ ଛତିଶଗଡ଼ ଅଞ୍ଚଳର ବିଭିନ୍ନ ସ୍ଥାନରେ ଚଢ଼ାଉ କରି ଚୋରା ଗାଡ଼ି ସହ ୪ ଆନ୍ତଃରାଜ୍ୟ ଡକାୟତଙ୍କୁ ଗିରଫ କରିବାରେ ସଫଳ ହୋଇଥିଲେ। ଅଭିଯୁକ୍ତମାନଙ୍କୁ ରବିବାର କୋର୍ଟଚାଲାଣ କରାଯାଇଛି। ଏହି ର଼୍ୟାକେଟ୍ରେ ବିଭିନ୍ନ ରାଜ୍ୟରୁ ଡକାୟତଙ୍କ ସମ୍ପୃକ୍ତି ଥିବା ପୋଲିସ ଅନୁମାନ କରିଛି। ଅଧିକ ତଥ୍ୟ ପାଇଁ ପୋଲିସ ଏହି ଅଭିଯୁକ୍ତମାନଙ୍କୁ ପୁଣି ରିମାଣ୍ଡରେ ଆଣିବ ବୋଲି ବସ୍ତା ଏସ୍ଡ଼ିପିଓ ଜଳଧର ଜାଲି ପ୍ରକାଶ କରିଛନ୍ତି।