ନୂଆଦିଲ୍ଲୀ,୧୯।୭ : ବୈବାହିକ ବଳାତ୍କାରକୁ ଅପରାଧ ବୋଲି ଘୋଷଣା କରିବା ସମ୍ବନ୍ଧୀୟ ଆବେଦନଗୁଡ଼ିକର ଖୁବ ଶୀଘ୍ର ସୁପ୍ରିମକୋର୍ଟରେ ଶୁଣାଣି ହେବ। ବୁଧବାର ସର୍ବୋଚ୍ଚ ଅଦାଲତ କହିଛନ୍ତି ସାମ୍ବିଧାନିକ ବେଞ୍ଚ କେତେକ ତାଲିକାଭୁକ୍ତ ଆବେଦନ ଉପରେ ସମ୍ପୂର୍ଣ୍ଣ ଶୁଣାଣି ପରେ ବୈବାହିକ ବଳାତ୍କାରର ଅପରାଧୀକରଣ ସମ୍ପର୍କରେ ତିନିଜଣିଆ ଖଣ୍ଡପୀଠ ଶୁଣାଣି କରିବେ।
ବରିଷ୍ଠ ଆଡଭୋକେଟ ଇନ୍ଦିରା ଜୟସିଂ ଏହି ମାମଲାର ଶୁଣାଣି ନେଇ ଉଲ୍ଲେଖ କରିଛନ୍ତି। ଯାହା ପରେ ପ୍ରଧାନ ବିଚାରପତି ଡି.ଓ୍ବଇ ଚନ୍ଦ୍ରଚୂଡ, ଜଷ୍ଟିସ ପିଏସ ନରସିଂହ ଏବଂ ଜଷ୍ଟିସ ମନୋଜ ମିଶ୍ରଙ୍କୁ ନେଇ ଏକ ବେଞ୍ଚ ଗଠନ ହେବ ବୋଲି କହିଛନ୍ତି । ବୈବାହିକ ବଳାତ୍କାର ମାମଲାକୁ ଆମକୁ ସମାଧାନ କରିବାକୁ ପଡ଼ିବ। ବରିଷ୍ଠ ଓକିଲ କହିଛନ୍ତି, ମୋର ମାମଲା ଶିଶୁ ଯୌନ ଶୋଷଣ ମାମଲା ସହିତ ଜଡିତ। ଏନେଇ ସିଜେଆଇ କହିଛି ଏହି ମାମଲାଗୁଡ଼ିକ ତିନିଜଣିଆ ଖଣ୍ଡପୀଠଙ୍କ ଦ୍ୱାରା ଶୁଣାଣି ହେବ ଏବଂ ପାଞ୍ଚ ଜଣିଆ ସମ୍ବିଧାନ ବେଞ୍ଚ କେତେକ ତାଲିକାଭୁକ୍ତ ମାମଲାର ଶୁଣାଣି ଶେଷ କରିବା ପରେ ଶୁଣାଣି ପାଇଁ ତାଲିକାଭୁକ୍ତ ହେବ।
ମାର୍ଚ୍ଚ ୨୨ ରେ,ବୈବାହିକ ବଳାତ୍କାର ସମ୍ପର୍କିତ ଆବେଦନଗୁଡ଼ିକର ଶୁଣାଣି ପାଇଁ ସର୍ବୋଚ୍ଚ ନ୍ୟାୟାଳୟ ମେ ୯କୁ ତାରିଖ ସ୍ଥିର କରିଥିଲେ। ଏହାପୂର୍ବରୁ, ସର୍ବୋଚ୍ଚ ଅଦାଲତ ଜାନୁଆରୀ ୧୬ ରେ ବୈବାହିକ ବଳାତ୍କାରର ଅପରାଧୀକରଣ ତଥା ଆଇପିସି ବ୍ୟବସ୍ଥା ଉପରେ ଆବେଦନ ଉପରେ କେନ୍ଦ୍ରର ପ୍ରତିକ୍ରିୟା ଲୋଡିଥିଲେ।
କେନ୍ଦ୍ର ସରକାରଙ୍କ ପକ୍ଷରୁ ହାଜର ହୋଇଥିବା ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଏହି ପ୍ରସଙ୍ଗର ଆଇନଗତ ତଥା ସାମାଜିକ ପ୍ରଭାବ ରହିଛି ଏବଂ ସରକାର ଏହି ଆବେଦନଗୁଡିକର ଉତ୍ତର ଦେବାକୁ ଚାହୁଁଛନ୍ତି। ଏହି ପ୍ରସଙ୍ଗରେ ୧୧ ମେ ୨୦୨୨ ମସିହାରେ ଦିଲ୍ଲୀ ହାଇକୋର୍ଟଙ୍କ ବିଭାଜିତ ରାୟକୁ ନେଇ ଏକ ପିଟିଶନ ଦାଖଲ କରାଯାଇଛି। ଏହି ଆବେଦନକାରୀଙ୍କ ମଧ୍ୟରୁ ଜଣେ ମହିଳା ଦିଲ୍ଲୀ ହାଇକୋର୍ଟରେ ଦାଖଲ କରିଛନ୍ତି। ପ୍ରକାଶ ଥାଉକି, ହାଇକୋର୍ଟର ଦୁଇ ବିଚାରପତି – ଜଷ୍ଟିସ ରାଜୀବ ଶକଦର ଏବଂ ଜଷ୍ଟିସ ସି ହରି ଶଙ୍କର – ସୁପ୍ରିମକୋର୍ଟରେ ଆବେଦନ କରିବା ପାଇଁ ଛୁଟି ପ୍ରମାଣପତ୍ର ପ୍ରଦାନ କରିବାକୁ ରାଜି ହୋଇଥିଲେ କାରଣ ଏହି ମାମଲା ଆଇନର ଗୁରୁତ୍ୱପୂର୍ଣ୍ଣ ପ୍ରଶ୍ନ ସହିତ ଜଡ଼ିତ ଥିଲା, ଯାହା ସର୍ବୋଚ୍ଚ ଅଦାଲତରୁ ଏକ ନିଷ୍ପତ୍ତି ଆବଶ୍ୟକ ଥିଲା। ।