ପଦ୍ମପୁର, ୧୮।୨(ଡି.ଏନ୍.ଏ.): ରାୟଗଡ଼ା ଜିଲା ପଦ୍ମପୁର ବ୍ଲକ ଅଧୀନ ଜୁକବନ୍ଧ କଲୋନି ନିକଟରେ ନୂତନ ଭାବେ ଅତ୍ୟାଧୁନିକ ଆଦର୍ଶ ବସ୍ଷ୍ଟାଣ୍ଡ ନିର୍ମାଣ କରାଯିବା ନିମନ୍ତେ ପଦ୍ମପୁର ବ୍ଲକ ପ୍ରଶାସନ ଓ ଜିଲା ପରିବହନ ବିଭାଗ ଜାଗା ଚିହ୍ନଟ କରିଛନ୍ତି। ଯାତ୍ରୀ ପରିବହନ ସେବାକୁ ତ୍ୱରାନ୍ବିତ କରିବାକୁ ରାଜ୍ୟରେ ୧୦୫ଟି ଆଦର୍ଶ ବସ୍ଷ୍ଟାଣ୍ଡ ନିର୍ମାଣ କରାଯିବା ନିମନ୍ତେ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ପ୍ରଥମ ପର୍ଯ୍ୟାୟରେ ୫୫ ବ୍ଲକସ୍ତରୀୟ ବସ୍ଷ୍ଟାଣ୍ଡ ନିର୍ମାଣ କରାଯିବ।
କ୍ରମରେ ପଦ୍ମପୁରରେ ମଧ୍ୟ ବସ୍ଷ୍ଟାଣ୍ଡ ନିର୍ମାଣ କରାଯିବ। ପଦ୍ମପୁର ତହସିଲଦାର ପ୍ରାଣକୃଷ୍ଣ ପାଣିଗ୍ରାହୀ, ପଦ୍ମପୁର ବିଡିଓ ରୀନା ପ୍ରଧାନ, ଜିଲା ବିଜେଡି ଛାତ୍ର ସଭାପତି ପିଙ୍କୁ ପଣ୍ଡା, ପଦ୍ମପୁର ବ୍ଲକ ଉପାଧ୍ୟକ୍ଷ ରମେଶ ଚନ୍ଦ୍ର ସାହୁଙ୍କ ସହ ଅଞ୍ଚଳର ବହୁ ବରିଷ୍ଠ ଅଧିକାରୀ ଜୁକବନ୍ଧ କଲୋନି ନିକଟରେ ପ୍ରାୟ ୨ଏକର ୩୦ ସେଣ୍ଟ୍ ସରକାରୀ ଜମି ଚିହ୍ନଟ କରିଛନ୍ତି।
ପଦ୍ମପୁର ସହରର ବର୍ଦ୍ଧିତ ଜନସଂଖ୍ୟାକୁ ଦେଖି ସ୍ଥାନୀୟ ଲୋକେ ନୂତନ ବସ୍ଷ୍ଟାଣ୍ଡ ନିର୍ମାଣ ଦାବି କରୁଥିଲେ। ପଦ୍ମପୁର ସହରଟି ବ୍ରହ୍ମପୁର, ମାଲକାନଗିରି, ଗୁଣପୁର, ପାରଳାଖେମୁଣ୍ଡି, ରାୟଗଡ଼ା, ଗୁଡ଼ାରୀ ଭଳି ଅଞ୍ଚଳକୁ ଯିବାକୁ କେନ୍ଦ୍ରସ୍ଥଳୀ। ସହରର ପୁରାତନ ବସ୍ଷ୍ଟାଣ୍ଡଟି ସଂକୀର୍ଣ୍ଣ ଓ ଗାଡ଼ି ରଖିବାକୁ ସେଭଳି ସ୍ଥାନ ନ ଥିବା ଯୋଗୁ ରାତ୍ରିକାଳୀନ ବସ୍ଗୁଡିକ ପଦ୍ମପୁର ସହରକୁ ନ ଯାଇ ବାଇପାସ୍ ରାସ୍ତା ଦେଇ ଯାଉଥିଲା। ପୁରୁଣା ବସ୍ଷ୍ଟାଣ୍ଡରେ ମଧ୍ୟ କୌଣସି ଗାଡ଼ ରହୁ ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଥିଲେ। ତେଣୁ ନୂତନ ଆଦର୍ଶ ବସ୍ଷ୍ଟାଣ୍ଡ ତିଆରିକୁ ନେଇ ଲୋକେ ଏବେ ବେଶ୍ ଖୁସି ଅଛନ୍ତି।