ଭୁବନେଶ୍ୱର,୯।୭(ବ୍ୟୁରୋ): ରାଜ୍ୟରେ କୋଭିଡ୍-୧୯ ସଂକ୍ରମଣ ବେଳକୁ ବେଳ ବଢିବାରେ ଲାଗିଛି। ଏହା ମହାମାରୀ ରୂପ ନେବାରେ ଲାଗିଛି। ଏଭଳି ପରିସ୍ଥିତିରେ ବିବାହ ଏବଂ ଶୁଦ୍ଧିକାର୍ଯ୍ୟ ବେଳେ କୋଭିଡ୍ ଗାଇଡ୍ଲାଇନକୁ ଖୋଲାଖୋଲି ଉଲ୍ଲଂଘନ କରାଯାଉଥିବା ଦେଖାଯାଉଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଉକ୍ତ ସାମାଜିକ କାର୍ଯ୍ୟକ୍ରମ ଉପରେ କଟକଣାକୁ କଡାକଡି କରିବାକୁ ଜିଲାପାଳ, ଏସ୍ପି, ମହାନଗର ନିଗମ କମିଶନର, କଟକ ଓ ଭୁବନେଶ୍ୱର ପୋଲିସ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି। ଏ ନେଇ ବୁଧବାର ସ୍ବତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟ ପକ୍ଷରୁ ବୁଧବାର ବିଜ୍ଞପ୍ତି ପ୍ରକାଶ କରାଯାଇଛି। କ୍ଷେତ୍ରସ୍ଥଳରେ ଏଭଳି ସାମାଜିକ କାର୍ଯ୍ୟକ୍ରମ ଉପରେ କଡା ନଜର ରଖିବାକୁ କୁହାଯାଇଛି।
ଏ ନେଇ ପୁଣିଥରେ ବିବାହ କାର୍ଯ୍ୟ ସମ୍ପାଦନ ପୂର୍ବରୁ ସ୍ଥାନୀୟ ଥାନାରୁ ଅନୁମତି ନେବାକୁ ପଡିବ। କୌଣସି ପ୍ରକାର ବିବାହ ରୋଶଣି ବିନାନୁମତିରେ ହୋଇ ପାରିବ ନାହିଁ। ବିବାହ ଉତ୍ସବରେ ୫୦ରୁ ଯେପରି ଅଧିକ ଲୋକ ଏକାଠି ନ ହେବେ ସେ ନେଇ ସ୍ଥାନୀୟ ଥାନା ନିଶ୍ଚିତ କରିବ। ୬୫ ବର୍ଷରୁ ଊର୍ଦ୍ଧ୍ୱ କିମ୍ବା ୧୦ ବର୍ଷରୁ କମ୍ ବୟସ ପିଲା ଏବଂ ଗର୍ଭବତୀଙ୍କୁ ଉତ୍ସବରେ ସାମିଲ ନ ହେବାକୁ ପରାମର୍ଶ ଦିଆଯାଇଛି। ଉତ୍ସବରେ ଯୋଗ ଦେବା ବେଳେ ଅତି କମ୍ରେ ୨ ମିଟର ଦୂରତା ଅବଲମ୍ବନ କରିବା ବାଧ୍ୟତାମୂଳକ କରାଯାଇଛି। ପ୍ରତ୍ୟେକ ବ୍ୟକ୍ତି ମାସ୍କ ବ୍ୟବହାର କରିବେ। ଉତ୍ସବରେ ଯୋଗ ଦେଇଥିବା ବ୍ୟକ୍ତିମାନେ ଗୁଟ୍ଖା, ପାନ ଖାଇ ସର୍ବସାଧାରଣ ସ୍ଥାନରେ ଛେପ ପକାଇବା ଉପରେ କଟକଣା ଜାରି କରାଯାଇଛି। ବରପିତା କିମ୍ବା ସେମାନଙ୍କର ଅଭିଭାବକ ଏହାକୁ କଡାକଡି ପାଳନ କରିବେ। ଯଦି ଏହି ଗାଇଡ୍ଲାଇନକୁ କେହି ଉଲ୍ଲଂଘନ କରିବେ ତେବେ ସେଥିପାଇଁ ଆୟୋଜକ ଦାୟୀ ରହିବେ। ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିସହିତ ଯେଉଁମାନେ ଏହି ଉତ୍ସବରେ ଯୋଗ ଦେଇ ନିୟମ ଉଲ୍ଲଂଘନ କରିଥିବେ ସେମାନଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ଅନ୍ତ୍ୟେଷ୍ଟି ଠାରୁ ଆରମ୍ଭ କରି ଶୁଦ୍ଧିକ୍ରିୟା ଯାଏ ୨୦ ଜଣରୁ ଅଧିକ ବ୍ୟକ୍ତି ଏକାଠି ନ ହେବାକୁ କୁହାଯାଇଛି। କୋଭିଡ୍-୧୯ ଗାଇଡ୍ଲାଇନ୍ ଅନୁଯାୟୀ କାର୍ଯ୍ୟ କରିବାକୁ କୁହାଯାଇଛି। ଯଦି ଏହା ଉଲ୍ଲଙ୍ଘନ ହେବ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ସରକାରଙ୍କ ପକ୍ଷରୁ ନୂତନ ଭାବେ ଜାରି କରାଯାଇଥିବା ଗାଇଡ୍ଲାଇନରେ କୁହାଯାଇଛି।