ଅମରପାଲି,୨୮ା୨(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ଆଦର୍ଶ ଥାନା ପରିସରରେ ସୋମବାର ପ୍ରେମୀ ଯୁଗଳଙ୍କ ବିବାହ ପୋଲିସ ଓ ପରିବାର ଲୋକଙ୍କ ଉପସ୍ଥିତିରେ ସମ୍ପନ୍ନ ହୋଇଯାଇଛି। ଥାନା ଅନ୍ତର୍ଗତ ଗୌଡଗାଡ ଗ୍ରାମର ଯଦୁ ସାହୁଙ୍କ ବଡପୁଅ ସୁଶିଲ କୁମାର (୨୮) ଓ ମୁର୍ଷୁଣ୍ଢି ଗ୍ରାମର ହିମାଂଶୁ ସାହୁଙ୍କ ଝିଅ ଲିପ୍ସା(୨୦)ଙ୍କ ମଧ୍ୟରେ ଦୀର୍ଘ ପାଞ୍ଚ ବର୍ଷ ହେଲା ପ୍ରେମ ସମ୍ପର୍କ ଥିଲା। ଉଭୟେ ବିବାହ ପାଇଁ ନିଷ୍ପତ୍ତି ନେଇଥିଲେ ହେଁ ଉଭୟଙ୍କ ପରିବାର ଲୋକେ ରାଜି ହେଉ ନ ଥିଲେ। ଏହା ଭିତରେ ଲିପ୍ସାଙ୍କ ବିବାହ ପରିବାର ଲୋକେ ବଲାଙ୍ଗୀର ଅଞ୍ଚଳରେ ଠିକ କରିଥିଲେ। ଏପରିକି ନିର୍ବନ୍ଧ ମଧ୍ୟ ସରିଥିଲା। ଏଡି ସମୟରେ ଲିପ୍ସା ଓ ସୁଶୀଲ ବିବାହ କରିବାକୁ ନିଷ୍ପତ୍ତି ବୀରମହାରାଜପୁର ଥାନା ଦ୍ବାରସ୍ଥ ହୋଇଥିଲେ। ଉଭୟେ ସାବାଳକ ହୋଇଥିବାରୁ ଥାନା ଅଧିକାରୀ ପଦ୍ମାସିନି ମେହେର ଉଭୟ ପରିବାରଙ୍କୁ ଥାନାକୁ ଡାକି ବୁଝାଶୁଝା କରିଥିଲେ। ଶେଷରେ ଉଭୟ ପରିବାର ବିବାହ ପାଇଁ ରାଜି ହୋଇଥିଲେ। ଶେଷରେ ଥାନା ପରିସରରେ ଉଭୟ ପ୍ରେମୀ ଯୁଗଳ ପରସ୍ପରକୁ ଫୁଳମାଳ ପିନ୍ଧାଇଥିଲେ। ଉଭୟଙ୍କ ପରିବାର ସଦସ୍ୟ ଆର୍ଶିର୍ବାଦ ନେଇଥିଲେ। ଥାନାରେ ବିବାହ ସମୟରେ ଉପଖଣ୍ଡୀୟ ପୋଲିସ ଅଧିକାରୀ ଡୋଳାମଣି ଭୋଇ, ଉଭୟ ପରିବାର ଓ ବନ୍ଧୁବାନ୍ଧବ ଉପସ୍ଥିତ ଥିଲେ।