ବେଳେବେଳେ ଘରେ ରଖିଥିବା ପୋଷା ବିଲେଇ କୁକୁରଙ୍କୁ ତାଙ୍କର ମାଲିକ ଏତେ ଭଲ ପାଇବସନ୍ତି ଯେ, ତାଙ୍କଠାରୁ ଦୂରେଇ ଯିବାର ଭୟ ବି ମନରେ ରଖନ୍ତି। ଆଉ ସବୁବେଳେ ପାଖେ ପାଖେ ରହିବା ଲାଗି କିଛି ଅଜବ କାମ କରି ବସନ୍ତି। ଯେମିତିକି ୟୁକେରେ ରହୁଥିବା ଦେବୋରାହ ହୋଜ୍ କରିଛନ୍ତି। ସେ ନିଜର ପୋଷା ବିଲେଇକୁ ସବୁବେଳେ ନିଜ ପାଖରେ ରଖିବା ଲାଗି ତା’ସହ ବିବାହ କରିଛନ୍ତି। ୪୯ ବର୍ଷୀୟା ଦେବୋରାହ ନିକଟରେ ଏକ ପାର୍କରେ ତାଙ୍କର ଏହି ଅଜବ ବିବାହ ଉତ୍ସବର ଆୟୋଜନ କରିଥିଲେ। ତେବେ ଏଭଳି ନିଷ୍ପତ୍ତି ନେବା ପଛର କାରଣ ହେଉଛି, ତାଙ୍କ ଘର ମାଲିକାଣୀ ପେଟ୍ ରଖିବାକୁ ବିରୋଧ କରୁଥିଲେ। ଦେବୋରାହଙ୍କର ଦୁଇଟି କୁକୁର ଓ ଗୋଟିଏ ବିଲେଇ ଥିଲା। ୨୦୧୭ରୁ ଦେବୋରାହ ଏହି ପୋଷା ବିଲେଇକୁ ରଖିଛନ୍ତି। ବିଲେଇଟିକୁ ସେ ଜୀବନଠାରୁ ବେଶି ଭଲ ପାଉଥିଲେ। ଆଉ ତାଠୁ ଦୂରେଇ ଯିବା କଥା ଭାବି ପାରୁ ନ ଥିଲେ। ସେଥିପାଇଁ ସେ ନିଷ୍ପତ୍ତି ନେଲେ ପେଟ୍ ବିଲେଇ ସହ ବିବାହ କରିବେ। ଯଦ୍ୱାରା ସେମାନେ ସ୍ବାମୀ ସ୍ତ୍ରୀ ହୋଇଯିବେ। ଆଉ କେହି ସେମାନଙ୍କୁ ଅଲଗା କରିପାରିବେନି। ବିବାହ ଦିନ ସେ ଟାକ୍ସିଡୋ ସୁଟ୍ ପିନ୍ଧି ନିଜର ପ୍ରିୟ ଗୋଲ୍ଡ ଲେମ କ୍ୟାଟ୍ ସହ ବିବାହର ସବୁ ପ୍ରତିଜ୍ଞା ନେଇଥିଲେ। ଦେବୋରାହ ପୂର୍ବରୁ ବିବାହିତା ଓ ତାଙ୍କର ଦୁଇଟି ସନ୍ତାନ ବି ଅଛନ୍ତି। ତଥାପି ସେ ଏଭଳି ନିଷ୍ପତ୍ତି ନେଲେ। ଏହି ବିବାହରେ ତାଙ୍କର ଅନେକ ବନ୍ଧୁ ଯୋଗ ଦେଇଥିଲେ। ହେଲେ ତାଙ୍କ ପିଲାମାନେ ଯୋଗ ଦେଇ ନ ଥିଲେ। କାରଣ ସେମାନଙ୍କୁ ଏହା ପସନ୍ଦ ଆସି ନ ଥିଲା।
