ଲକ୍ଷ୍ନୌ,୧।୪: କାନପୁର ଅଞ୍ଚଳରେ ଏକ ବିବାହ ଏବେ ଖୁବ୍ ଚର୍ଚ୍ଚାରେ ରହିଛି। ବରକନ୍ୟା ଶିବ-ପାର୍ବତୀ ବେଶ ଧାରଣ କରି ବିବାହ ବନ୍ଧନରେ ବାନ୍ଧି ହୋଇଛନ୍ତି। ଦୁହିଁଙ୍କ ବିବାହକୁ ଖାସ୍ କରିବା ପାଇଁ ବନ୍ଧୁ ପରିଜନ ଏବଂ ସମ୍ପର୍କୀୟମାନେ ବହୁ ଉତ୍ସାହିତ ହୋଇ ନବଦମ୍ପତିଙ୍କ ଉପରେ ଫୁଲର ବର୍ଷା କରିଥିଲେ।
ହିମାଂଶୁ ନାମକ ବର ଏବଂ ମାନସୀ ନାମକ କନ୍ୟା ହେଉଛନ୍ତି କୀର୍ତ୍ତନ ମଣ୍ଡଳୀର କଳାକାର। ଦୁଇଜଣ କାନପୁରରେ ରୁହନ୍ତି। କଳା ପ୍ରଦର୍ଶନ କରୁକରୁ ଉଭୟଙ୍କ ମଧ୍ୟରେ କେତେବେଳେ ପ୍ରେମ ସମ୍ପର୍କ ଗଢ଼ିଉଠିଥିଲା। ପରେ ଏହା ବିବାହରେ ରୂପାନ୍ତରିତ ହୋଇଛି। କାନପୁରର ଶିବ ମନ୍ଦିରରେ ଉଭୟଙ୍କ ବିବାହ ସମ୍ପନ୍ନ ହୋଇଛି। ହିମାଂଶୁ କୀର୍ତ୍ତନ ମଣ୍ଡଳୀରେ ଶିବ ଭୂମିକା ତୁଲାଉଥିବା ବେଳେ ମାନସୀ ପାର୍ବତୀ ଭୂମିକାରେ ଅଭିନୟ କରିଥାନ୍ତି। ତେଣୁ ସେମାନେ ଚାହୁଁଥିଲେ ଏହି ବେଶରେ ହିଁ ବିବାହ ବନ୍ଧନରେ ବାନ୍ଧି ହେବେ । ଶେଷରେ ସେଇୟା ହିଁ ହେଲା।
ଗତ ମଙ୍ଗଳବାର ଦୁଇ ପ୍ରେମୀଯୁଗଳ ସାତଜନ୍ମର ସାଥୀ ହୋଇଛନ୍ତି। ଶିବ ବେଶରେ ରଥ ଚଢ଼ି ହିମାଂଶୁ ମନ୍ଦିରରେ ପହଞ୍ଚିଥିବା ବେଳେ ମାନସୀ ପାର୍ବତୀ ରୂପ ଧାରଣ କରି ମନ୍ଦିରରେ ପହଞ୍ଚିଥିଲେ। ଏହି ବରଯାତ୍ରୀରେ ହିମାଂଶୁଙ୍କ ସହ ଗଣ, ଭୂତପ୍ରେତ ଭୂମିକାରେ ଲୋକେ ସାମିଲ ଥିଲେ। ବରଯାତ୍ରୀ ପହଞ୍ଚିବା ପରେ ବିବାହ କାର୍ଯ୍ୟକ୍ରମ ଆରମ୍ଭ ହୋଇଥିଲା। ହୋମ ମନ୍ତ୍ର ସହ ପରସ୍ପରକୁ ବରଣମାଳା ପିନ୍ଧାଇଥିଲେ। ଏହି ବିବାହରେ ଯୋଗ ଦେଇଥିବା ଅତିଥିମାନେ ବେଶ୍ ମଜା ଉଠାଇଥିଲେ। ଅନ୍ୟପକ୍ଷରେ ହିମାଂଶୁ ଏବଂ ମାନସୀ ନିଜ ବିବାହକୁ ନେଇ ଖୁବ୍ ଖୁସିଥିବା କହିଛନ୍ତି।
