ଯାଜପୁର ଟାଉନ,୧୧ା୭ (ପ୍ରଯକ୍ତା ପ୍ରିୟଦର୍ଶନୀ ମହାନ୍ତି): ଯାଜପୁର ସହରସ୍ଥିତ ଜଗନ୍ନାଥ ମନ୍ଦିରରେ ସୋମବାର ଜଣେ ଅସାହାୟ ଯୁବତୀଙ୍କୁ ନିଜ ଉଦ୍ୟମରେ କିନ୍ନର ସଂଘ ବିବାହ କରାଇଛନ୍ତି। ଏହି ଘଟଣା ସାରା ସହରରେ ଚର୍ଚ୍ଚାର ବିଷୟବସ୍ତୁ ପାଲଟିଛି। ଯାଜପୁର ସହରର ରଶ୍ମି ସାହୁ ନାମକ ଏହି ଯୁବତୀଙ୍କ ବାପାନାହାନ୍ତି। ତେଣୁ ବାହାଘର ପାଇଁ ରଶ୍ମିଙ୍କ ମା’କିନ୍ନର ସଂଘକୁ ସାହାଯ୍ୟ ମାଗିଥିଲେ। କିନ୍ନର ସଂଘ ଦଶରଥପୁର ବ୍ଲକ୍ ଅଧୀନ ଅହିୟାସ ଅଞ୍ଚଳର ଜଗନ୍ନାଥ ସାହୁ ନାମକ ଯୁବକଙ୍କୁ ବିବାହ କରିବା ଲାଗି ଠିକ୍ କରିଥିଲେ। ଉଭୟଙ୍କ ପସନ୍ଦ ପରେ ଜଗନ୍ନାଥ ମନ୍ଦିରରେ ରୀତିନୀତି ଅନୁସାରେ ବିବାହ ସମ୍ପନ୍ନ ହୋଇଛି। କିନ୍ନରମାନଙ୍କ ସାହାଯ୍ୟରେ ରଶ୍ମି ଓ ଜଗନ୍ନାଥ ବିବାହ ବନ୍ଧନରେ ବାନ୍ଧି ହୋଇଛନ୍ତି। କିନ୍ନର ସଂଘ ନିଜ ସାଥୀମାନଙ୍କଠାରୁ ଅର୍ଥ ଆଦାୟ କରି ଏଭଳି ମହତ୍ କାର୍ଯ୍ୟ କରିଥିବାରୁ ବହୁତ ଖୁସିଥିବା କହିଛନ୍ତି। ଝିଅକୁ ମା’ଭଳି ସମସ୍ତ ପର୍ବପର୍ବାଣି ଓ ଦୁଃଖସୁଖରେ ସାହା ହେବେ ବୋଲି କିନ୍ନର ସଂଘ ପକ୍ଷରୁ କୁହାଯାଇଛି।
