ଛତ୍ରପୁର,୧୯ା୯(ଡି.ଏନ୍.ଏ.): ଦ୍ୱିତୀୟ ବିବାହ କରି ଗଞ୍ଜାମ ଜିଲା ଛତ୍ରପୁର ବ୍ୟାଙ୍କ କଲୋନୀରେ ଭଡ଼ାଘରେ ରହୁଥିବା ଜଣେ ଯୁବକଙ୍କୁ ଗୁରୁବାର ଭଦ୍ରକ ଜିଲା ଭଣ୍ଡାରୀପୋଖରୀ ପୋଲିସ ଗିରଫ କରିଛି। ସେ ହେଲେ ପିନା ସାମଲ । ପ୍ରଥମ ସ୍ତ୍ରୀଙ୍କ ଅଭିଯୋଗ ମୁତାବକ ପିନାଙ୍କୁ ଠାବ କରିବା ପାଇଁ ଶନିବାର ଛତ୍ରପୁର ଆସିଥିବା ଭଦ୍ରକ ପୋଲିସକୁ ନାକେଦମ ହେବାକୁ ପଡ଼ିଛି। ରାତିସାରା ଘର ବାହାରେ ଜଗି ରହିବା ପରେ ରବିବାର ବୁଝାଶୁଝା କରି ସ୍ଥାନୀୟ ପୋଲିସ ସହାୟତାରେ ତାଙ୍କୁ କାବୁ କରିଛି।
୨୦୧୫ରେ ଭଣ୍ଡାରିପୋଖରି ଥାନା ଅଧୀନ ସାରସଦ ଗ୍ରାମର ପିନା ଭଦ୍ରକରେ ଜ୍ୟୋତ୍ସ୍ନାରାଣୀ ସାମଲଙ୍କୁ ବିବାହ କରିଥିଲେ । ସେମାନଙ୍କର ଏକ ସନ୍ତାନ ଅଛି। ପିନା ୪ ବର୍ଷ ହେଲା ଛତ୍ରପୁର ଅଞ୍ଚଳରେ ରହି ଗାଡ଼ି ଚଲାଉଥିଲେ। ଗତ ପ୍ରାୟ ୬ ମାସ ତଳେ ସେ ଛତ୍ରପୁର ଅଞ୍ଚଳର ଜଣେ ଯୁବତୀଙ୍କୁ ଦ୍ୱିତୀୟ ବିବାହ କରିଥିଲେ। ପ୍ରଥମ ସ୍ତ୍ରୀ ଜ୍ୟୋତ୍ସ୍ନା ଏହା ଜାଣିବା ପରେ ଭଣ୍ଡାରୀପୋଖରୀ ଥାନାରେ ଏତଲା ଦେଇଥିଲେ। ପୋଲିସ ଏକ ମାମଲା (ନଂ.୨୩୯/୨୧) ରୁଜୁ କରିଥିଲା। ଭଣ୍ଡାରିପୋଖରୀ ଥାନା ପୋଲିସ୍ ଶନିବାର ରାତି ପ୍ରାୟ ୧୨ଟାରେ ଜ୍ୟୋତ୍ସ୍ନା ଓ ତାଙ୍କ ପରିବାର ଲୋକଙ୍କ ସହ ମିଶି ଛତ୍ରପୁରରେ ପହଞ୍ଚିଥିଲା। ଦ୍ୱିତୀୟ ସ୍ତ୍ରୀଙ୍କ ସହ ପିନା ରହୁଥିବା ବ୍ୟାଙ୍କ କଲୋନୀସ୍ଥିତ ଭଡ଼ାଘର କବାଟ ପୋଲିସ ବାଡ଼େଇଥିଲେ ମଧ୍ୟ କେହି ଖୋଲି ନ ଥିଲେ ା ତେଣୁ ରାତିସାରା ସେଠାରେ ଜଗି ରହିବାକୁ ପଡ଼ିଥିଲା। ରବିବାର ସକାଳେ ବୁଝାଶୁଝା କରିବା ପରେ ପିନା କବାଟ ଖୋଲିଥିଲେ। ତାଙ୍କୁ କାକୁ କରି ଛତ୍ରପୁର ଥାନାକୁ ନିଆଯାଇଥିଲା। ସେଠାରେ କିଛି ସମୟ ଅଟକ ରଖି ଭଣ୍ଡାରିପୋଖରୀ ପୋଲିସ୍ ବିଭିନ୍ନ କାଗଜପତ୍ର ଦେଖାଇ ପିନାଙ୍କୁ ନେଇଛି ା