ଓ୍ବାଶିଂଟନ,୧୨।୧: ମଙ୍ଗଳ ଗ୍ରହ ସମ୍ପର୍କରେ ମହାକାଶ ବିଜ୍ଞାନୀଙ୍କୁ ଏକ ଗୁରୁତ୍ୱପୂର୍ଣ୍ଣ ସୂଚନା ମିଳିଛି। ଧୀରେଧୀରେ ମଙ୍ଗଳ ଗ୍ରହ ନିଜର ସନ୍ତୁଳନ ହରାଇ ବସୁଛି। ନିଜ ଅକ୍ଷ ଚାରିପଟେ ଘୂରିବା ସମୟରେ ଏଭଳି ଅନିୟମିତତା ସୃଷ୍ଟି ହେଉଛି। ତେବେ ଏଭଳି କେଉଁ କାରଣରୁ ହେଉଛି ସେ ନେଇ ମହାକାଶ ବିଜ୍ଞାନୀ ଚିନ୍ତାରେ ପଡ଼ିଛନ୍ତି। ଆମେରିକାନ୍ ଜିଓଫିଜିକାଲ ୟୁନଅନ ପକ୍ଷରୁ ଏସମ୍ପର୍କିତ ଏକ ରିପୋର୍ଟ ପ୍ରକାଶ ପାଇଛି। ନିଜ ଅକ୍ଷ ପଥରେ ମଙ୍ଗଳ ଗ୍ରହ ସିଧା ନ ଘୂରି ରହି ରହି ଟଳମଳ ଅବସ୍ଥାରେ ଘୂରୁଛି। ପ୍ରତି ୨୦୦ ଦିନରେ ଗ୍ରହ ନିଜର ମୂଳ ଘୂରିବା ପ୍ରକ୍ରିୟାଠାରୁ ୪ ଇଞ୍ଚ ଦୂରେଇବାରେ ଲାଗିଛି। ଏଭଳି ଅବସ୍ଥାକୁ ମହାକାଶ ବିଜ୍ଞାନୀମାନେ ଚାଣ୍ଡଲେର୍ ଓ୍ବେବଲ କୁହାଯାଇଥାଏ। ପ୍ରଥମେ ମହାକାଶ ବିଜ୍ଞାନୀ ସେଥ୍ କାର୍ଲୋ ଚାଣ୍ଡଲେର୍ ଏହି ମହାଜାଗତିକ ସ୍ଥିତି ସମ୍ପର୍କରେ ତଥ୍ୟ ଉପସ୍ଥାପନ କରିଥିଲେ। ତେଣୁ ତାଙ୍କର ନାମ ଅନୁସାରେ ଗ୍ରହର ଏଭଳି ସ୍ଥିତିକୁ ନାମିତ କରାଯାଇଛି। ଏଭଳି ଗତି କରି ମଙ୍ଗଳ ସୌରମଣ୍ଡଳର ଦ୍ୱିତୀୟ ଗ୍ରହ ପାଲଟିଛି। ଏହା ପୂର୍ବରୁ ପୃଥିବୀର ଆବର୍ତ୍ତନ ଗତିରେ ଏଭଳି ସମସ୍ୟା ଦୃଷ୍ଟି ଗୋଚର ହୋଇଥିଲା। ଇତିମଧ୍ୟରେ ପୃଥିବୀ ନିଜ ଅକ୍ଷ ପଥରୁ ୩୦ ଫୁଟ ଦୂରେଇ ଯାଇଛି। ପ୍ରତି ୪୩୩ ଦିନରେ ପୃଥିବୀର ଆବର୍ତ୍ତନ ଗତିରେ ଏଭଳି ତ୍ରୁଟି ଦେଖିବାକୁ ମିଳୁଥିବା ରିପୋର୍ଟରେ ଉଲ୍ଲେଖ କରାଯାଇଛି। ପୃଥିବୀ ଅକ୍ଷ ପଥରେ ଦେଖା ଦେଉଥିବା ଅନିମିତତା ପରିବେଶ ପ୍ରଦୂଷଣ ଏବଂ ସାମୁଦ୍ରିକ ଚାପ ରହିଥିବା ଅନୁମାନ କରାଯାଉଛି।