ମୁମ୍ବାଇ,୧୬।୫: ସ୍ଥାନୀୟ ଡି ଓ୍ବାଇ ପାଟିଲ ସ୍ପୋଟର୍ସ ଏକାଡେମୀରେ ସୋମବାର ପଞ୍ଜାବ କିଙ୍ଗ୍ସ ବିପକ୍ଷରେ ଖେଳାଯାଇଥିବା ଆଇପିଏଲ ମ୍ୟାଚ୍ରେ ମିଚେଲ ମାର୍ଶ(୬୩) ଅର୍ଦ୍ଧଶତକ ହାସଲ କରିଛନ୍ତି। ତାଙ୍କ ଯୋଗୁ ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୭ ଉଇକେଟ ହରାଇ ୧୫୯ ରନ୍ କରିଛି। ଟସ୍ ଜିତି ମୟଙ୍କ ଅଗ୍ରଓ୍ବାଲ ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। କିନ୍ତୁ ଦିଲ୍ଲୀ ପ୍ରଥମ ବଲରେ ଡେଭିଡ୍ ଓ୍ବାର୍ନର(୦)ଙ୍କ ଉଇକେଟ ହରାଇଥିଲା। ଶ୍ରୀକର ଭରତଙ୍କ ସ୍ଥାନରେ ଦଳରେ ଯାଗା ପାଇଥିବା ସର୍ଫରାଜ ଖାନ (୩୨ ରନ୍, ୫ ଚୌକା ଓ ୧ ଛକା)ଙ୍କ ସହ ମିଶି ମାର୍ଶ ଦଳୀୟ ସ୍କୋରକୁ ୫ ଓଭରରେ ୫୦ ରନ୍ ପାର କରାଇଥିଲେ। ତା’ ପରେ ଲଲିତ ଯାଦବ (୨୪) ଓ ମାର୍ଶ ତୃତୀୟ ଉଇକେଟ ପାଇଁ ୪୭ ରନ୍ ଯୋଡ଼ିଥିଲେ। ଏହାପରେ କ୍ରମାଗତ ବ୍ୟବଧାନରେ ୩ ଉଇକେଟ ପଡ଼ିଯିବାରୁ ଦିଲ୍ଲୀ ବଡ଼ ସ୍କୋର ହାସଲ କରିପାରି ନ ଥିଲା। ଶେଷ ଆଡ଼କୁ ଆଟାକିଂ ବ୍ୟାଟିଂ କରୁଥିବା ମାର୍ଶ ୧୯ତମ ଓଭରରେ କାଗିଶୋ ରାବାଡାଙ୍କ ବଲରେ ଆଉଟ୍ ହୋଇଥିଲେ। ସେ ଆଉଟ୍ ହେବା ପୂର୍ବରୁ ୪୮ ବଲରେ ୪ ଚୌକା ଓ ୩ ଛକା ଲଗାଇଥିଲେ। ପରେ ଅକ୍ଷର ପଟେଲ (୧୭*)ଙ୍କ ଯୋଗୁ ଦିଲ୍ଲୀ ୨୦ ଓଭରରେ ୭ ଉଇକେଟ ହରାଇ ୧୫୯ ରନ୍ କରିବାକୁ ସକ୍ଷମ ହୋଇଥିଲା। ପଞ୍ଜାବ ପାଇଁ ଲିଆମ ଲିଭିଂଷ୍ଟୋନ ଓ ଅର୍ଶଦୀପ ସିଂ ୩ ଲେଖାଏ ଉଇକେଟ ନେଇଥିବା ବେଳେ ରାବାଡା ଗୋଟିଏ ଉଇକେଟ ହାତେଇଥିଲେ।
ସଂକ୍ଷିପ୍ତ ସ୍କୋର:
ଦିଲ୍ଲୀ କ୍ୟାପିଟାଲ୍ସ: ୨୦ ଓଭରରେ ୧୫୯/୭(ମିଚେଲ ମାର୍ଶ-୬୩, ସର୍ଫରାଜ ଖାନ-୩୨, ଲଲିତ ଯାଦବ-୨୪, ଲିଆମ ଲିଭିଂଷ୍ଟୋନ-୩/୨୭, ଅର୍ଶଦୀପ ସିଂ-୩/୩୭)।
