ବେଙ୍ଗାଲୁରୁ, ୨୧।୧୦:ଚଳିତ ଦିନିକିଆ କ୍ରିକେଟ ବିଶ୍ୱକପ୍ର ଶୁକ୍ରବାର ଅନୁଷ୍ଠିତ ମ୍ୟାଚରେ ପାକିସ୍ତାନ ବିପକ୍ଷରେ ଶତକ ହାସଲ କରିଛନ୍ତି ଅଷ୍ଟ୍ରେଲିଆର ମିଚେଲ ମାର୍ଶ ଓ ଡେଭିଡ ଓ୍ବାର୍ନର। ଦୁଇଜଣଙ୍କ ଶତକ ଏବଂ ଦ୍ୱିଶତକୀୟ ଭାଗୀଦାରି ସହ ଅନେକ ରେକର୍ଡ ମଧ୍ୟ ସୃଷ୍ଟି ହୋଇଛି। କୌଣସି ବିଶ୍ୱକପ୍ ମ୍ୟାଚରେ ଓପନିଂ ଯୋଡ଼ି ଶତକ ହାସଲ କରିବା ଏହା ଚତୁର୍ଥ ଦୃଷ୍ଟାନ୍ତ। ତେବେ ଅଷ୍ଟ୍ରେଲିଆ ପାଇଁ ଏହା ପ୍ରଥମ। ପ୍ରଥମେ ଓ୍ବାର୍ନର ଶତକ ପୂରଣ କରିବା ପରେ ମାର୍ଶ ନିଜ ୩୨ତମ ଜନ୍ମଦିନରେ ହାସଲ କରିଥିଲେ କ୍ୟାରିୟରର ଦ୍ୱିତୀୟ ଦିନିକିଆ ଶତକ। ଓ୍ବାର୍ନର ଓ ମାର୍ଶ ଓପନିଂ ଯୋଡ଼ିରେ ୨୫୯ ରନ୍ ଯୋଗ କରିଥିଲେ। ବିଶ୍ୱକପ୍ ଇତିହାସରେ ଏହା ଦ୍ୱିତୀୟ ସର୍ବାଧିକ ଓପନିଂ ଭାଗୀଦାରି। ତେବେ ଅଷ୍ଟ୍ରେଲିଆ ପାଇଁ ଏହା ଶ୍ରେଷ୍ଠ ପାର୍ଟନରଶିପ୍। ଓ୍ବାର୍ନରଙ୍କ ପାଇଁ ଏହା ଥିଲା ପାକିସ୍ତାନ ବିପକ୍ଷରେ କ୍ରମାଗତ ଚତୁର୍ଥ ଦିନିକିଆ ଶତକ। କୌଣସି ଗୋଟିଏ ଦଳ ବିପକ୍ଷରେ ୪ ଶତକ ହାସଲ କରିବାରେ ଓ୍ବାର୍ନର ଭାରତର ବିରାଟ କୋହଲିଙ୍କ ସମକକ୍ଷ ହୋଇଛନ୍ତି। କୋହଲି ଓ୍ବେଷ୍ଟଇଣ୍ଡିଜ ବିପକ୍ଷରେ ୪ ଶତକ ହାସଲ କରିଥିଲେ। ବିଶ୍ୱକପ୍ରେ ଏହାଥିଲା ଓ୍ବାର୍ନରଙ୍କ ୫ମ ଶତକ। ଏଥିସହ ସେ ଅନ୍ୟତମ ଅଷ୍ଟ୍ରେଲୀୟ ଖେଳାଳି ରିକି ପଣ୍ଟିଂଙ୍କ ସମକକ୍ଷ ହୋଇଛନ୍ତି। ମାର୍ଶ ଅନ୍ତର୍ଜାତୀୟ କ୍ରିକେଟରେ ୬ଷ୍ଠ ଏବଂ ପ୍ରଥମ ଅଷ୍ଟ୍ରେଲୀୟ ଖେଳାଳିଭାବେ ନିଜ ଜନ୍ମଦିନରେ ଦିନିକିଆ ଶତକ ହାସଲ କରିଛନ୍ତି। ତେବେ ଜନ୍ମ ଦିନରେ କୌଣସି ଏକ ବିଶ୍ୱକପ୍ ମ୍ୟାଚରେ ଶତକ ହାସଲ କରିବାରେ ସେ ନ୍ୟୁଜିଲାଣ୍ଡର ରସ୍ ଟେଲରଙ୍କ ପରେ ଦ୍ୱିତୀୟ ଖେଳାଳି। ଓପନିଂ ଯୋଡ଼ିରେ ମାର୍ଶ ଓ ଓ୍ବାର୍ନର ୨୦୦ରୁ ଊର୍ଦ୍ଧ୍ୱ ରନ ସ୍କୋର କରିଥିଲେ। ବିଶ୍ୱକପ୍ ଇତିହାସରେ ସର୍ବାଧିକ ଦ୍ୱିଶତକୀୟ ଭାଗୀଦାରିରେ ଭାରତର ସମକକ୍ଷ ହୋଇଛି ଅଷ୍ଟ୍ରେଲିଆ। ଉଭୟ ୫ ଥର ଲେଖାଏ ଦ୍ୱିଶତକୀୟ ଭାଗୀଦାରି ଗଢ଼ିଛନ୍ତି।