ମସ୍କୋ/କିଭ୍,୨୦ା୧୦: ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ବେଆଇନ ଭାବେ ଦଖଲ କରିଥିବା ୪ ୟୁକ୍ରେନୀୟ ଅଞ୍ଚଳରେ ବୁଧବାର ସ୍ଥାନୀୟ ଆଇନକୁ ଶେଷକରି ସାମରିକ ଶାସନ ଜାରି କରିଛନ୍ତି। ଡୋନେସ୍କ, ଲୁହାନ୍ସ୍କ, ଖେରସୋନ ଓ ଜାପୋରୋଝିଆରେ ଗଣଭୋଟ କରାଯିବା ପରେ ନିକଟରେ ରୁଷିଆ ଏହି ୪ ଅଞ୍ଚଳକୁ ନିଜ ଦେଶ ସହ ମିଶ୍ରଣ ଘୋଷଣା କରିଥିଲା। ଜାତୀୟ ସୁରକ୍ଷା ପରିଷଦ ବୈଠକରେ ବୁଧବାର ପୁଟିନ୍ କହିଛନ୍ତି, ଏହି ୪ ଅଞ୍ଚଳର ଅଧିବାସୀମାନେ ରୁଷିଆର ବାସିନ୍ଦା ହୋଇସାରିଥିବାରୁ ଆଇନତଃ ସେମନେ ଆମ ସାର୍ବଭୌମତ୍ୱ ଅଧୀନରେ ରହିବେ। ମାର୍ଶଲ ଲ ଗୁରୁବାର ମଧ୍ୟରାତ୍ରିରୁ ଲାଗୁ କରାଇବା ନେଇ ସେ ଏକ ଦସ୍ତାବିଜରେ ସ୍ବାକ୍ଷର କରିଛନ୍ତି। ଏଥିସହ ରୁଷିଆ ସରକାରଙ୍କ ବିଭିନ୍ନ ବିଭାଗକୁ ଏ ସମ୍ପର୍କିତ କାର୍ଯ୍ୟ ଯୋଜନାର ସବିଶେଷ ରିପୋର୍ଟ ୩ ଦିନ ମଧ୍ୟରେ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି।
ଅନ୍ୟପକ୍ଷେ ଦୀର୍ଘ ୮ ମାସ ଧରି ୟୁକ୍ରେନ୍ ଦଖଲର ଉଦ୍ୟମ ଭିତରେ ରୁଷିଆର ସଶସ୍ତ୍ର ବଳ ସାମରିକ ଦୃଷ୍ଟିରୁ ଦୁର୍ବଳ ହୋଇଯାଇଥିବା କୁହାଯାଉଛି। କାରଣ ୟୁକ୍ରେନ୍ ଉପରେ ପୂର୍ବରୁ ରୁଷିଆ ମିଶାଇଲ ମାଡ଼ କରୁଥିବାବେଳେ ଏବେ ଡ୍ରୋନ୍ରେ ଆକ୍ରମଣ କରୁଛି। ଏହି ଡ୍ରୋନ୍ଗୁଡ଼ିକ ଇରାନ ଦେଇଛି। ଆଗକୁ ମଧ୍ୟ ଇରାନ ରୁଷିଆକୁ ଡ୍ରୋନ୍ ଓ ଭୂପୃଷ୍ଠରୁ ଭୂପୃଷ୍ଠକୁ ଟାର୍ଗେଟ କରିପାରୁଥିବା ମିଶାଇଲ ରପ୍ତାନି କରିବ ବୋଲି କହିଛି। ଅକ୍ଟୋବର ୬ରେ ଇରାନର ଫାଷ୍ଟ ଭାଇସ୍ ପ୍ରେସିଡେଣ୍ଟ ମହମ୍ମଦ ମୋଖବେର, ଶକ୍ତିଶାଳୀ ରିଭୋଲ୍ୟୁଶନାରି ଗାର୍ଡସର ଦୁଇ ଓ ସୁପ୍ରିମ ନ୍ୟାଶନାଲ ସିକ୍ୟୁରିଟି କାଉନ୍ସିଲର ଜଣେ ଅଧିକାରୀ ମସ୍କୋ ଗସ୍ତ କରିଥିଲେ।
ଏହି ଗସ୍ତବେଳେ ଯୁଦ୍ଧାସ୍ତ୍ର ଯୋଗାଣ ନେଇ ଆଲୋଚନା ହୋଇଥିଲା। ଆମେରିକା ଓ ଅନ୍ୟ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ୟୁକ୍ରେନ୍ ସପକ୍ଷରେ ବାହାରିଥିବାରୁ ସେଗୁଡ଼ିକର ଉଦ୍ୟମକୁ ପ୍ରତିହତ କରିବା ଉଦ୍ଦେଶ୍ୟରେ ଇରାନ ରୁଷିଆକୁ ଶହୀଦ-୧୩୬ ଏବଂ କାମିକାଜି ଡ୍ରୋନ୍ ସମେତ ଫତେହ-୧୧୦ ଓ ଜୋଲଫାଘର ଭଳି ଅନ୍ୟ କେତେକ କ୍ଷେପଣାସ୍ତ୍ର ଯୋଗାଇବାକୁ ରାଜି ହୋଇଛି। ଗତ ସପ୍ତାହ ମଧ୍ୟରେ ୟୁକ୍ରେନୀୟ ସହରଗୁଡ଼ିକ ଉପରେ ଆକ୍ରମଣ ପାଇଁ ବ୍ୟବହୃତ ଡ୍ରୋନ୍ଗୁଡ଼ିକୁ ଇରାନ ଯୋଗାଇଦେଇଥିବାବେଳେ ଆଗକୁ ମଧ୍ୟ ଏଭଳି ସାମରିକ ଯୋଗାଣ ଜାରି ରଖିବା ନେଇ ଆମେରିକା ଗୋଇନ୍ଦା ସୂଚନା ପାଇଛି। ଏଥିଯୋଗୁ ଆମେରିକା ସମେତ ୟୁରୋପୀୟ ସଂଘ (ଇୟୁ) ଇରାନ ଉପରେ କଟକଣା ଜାରି ପାଇଁ ପ୍ରସ୍ତୁତି ଚଳାଇଛନ୍ତି।
