ଖୋର୍ଦ୍ଧା ଅଫିସ/ନିରାକାରପୁର/ଜଟଣୀ, ୬ା୨(ଡି.ଏନ୍.ଏ.): ଖବର ସଂଗ୍ରହ ପାଇଁ ଯାଇଥିବା ବେଳେ ମାଓବାଦୀମାନେ ବିଛାଇଥିବା ଲ୍ୟାଣ୍ଡମାଇନ ବିସ୍ଫୋରଣରେ ‘ଧରିତ୍ରୀ’ ଖବରଦାତା ରୋହିତ ବିଶ୍ୱାଳଙ୍କ ଶନିବାର ମୃତ୍ୟୁ ଘଟିଛି। ଏନେଇ ଖୋର୍ଦ୍ଧା ସାମ୍ବାଦିକ ଭବନ ପରିସରରେ ଏକ ଶୋକସଭା ଅନୁଷ୍ଠିତ ହୋଇଯାଇଛି। ଏଥିରେ ‘ଧରିତ୍ରୀ’ର ଖୋର୍ଦ୍ଧା ଜିଲା ପ୍ରତିନିଧି ପ୍ରଭାତ ପାଣିଗ୍ରାହୀ ସଂଯୋଜନା କରିଥିଲେ। ଛାପା ଓ ବୈଦ୍ୟୁତିକ ଗଣମାଧ୍ୟମ ପ୍ରତିନିଧିମାନେ ଯୋଗଦେଇ ରୋହିତଙ୍କ ଆତ୍ମାର ସଦ୍ଗତି ନିମନ୍ତେ ନୀରବ ପ୍ରାର୍ଥନା କରିବା ସହ ସ୍ମୃତିଚାରଣ କରିଥିଲେ। ରୋହିତଙ୍କୁ ଶହୀଦ ମାନ୍ୟତା ଓ ତାଙ୍କ ପରିବାରଙ୍କୁ ୫୦ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ ରାଜ୍ୟ ସରକାରଙ୍କ ନିକଟରେ ଗଣମାଧ୍ୟମ ପ୍ରତିନିଧିମାନେ ଦାବି କରିଛନ୍ତି। ଓୟୁଜେ ରାଜ୍ୟ ସମ୍ପାଦକ ପ୍ରସନ୍ନ ପାଇକରାୟ, ଜିଲା କାର୍ଯ୍ୟକାରୀ ସଭାପତି ଲୋହିତ ନାରାୟଣ ମହାପାତ୍ର, ସମନ୍ବିତ କର୍ମଜୀବୀ ସାମ୍ବାଦିକ ସଂଘ(ଓୟୁଡବ୍ଲ୍ୟୁଜେ) ଜିଲା ସଭାପତି ପ୍ରକାଶ ହାତୀ, ନିରଞ୍ଜନ ଦୋରା, ପ୍ରବୀଣ ଭଞ୍ଜ, ବାଲାଜୀ ପାତ୍ର, ରବି ନାରୟଣ ସାହୁ, ମନୋଜ ସାହୁ, ପ୍ରଶାନ୍ତ ସାହୁ ପ୍ରମୁଖ ଉପସ୍ଥିତ ଥିଲେ। ସେହିପରି ନିରାକାରପୁର ଖବରଦାତା ସଂଘ ପକ୍ଷରୁ ଖବରଦାତା ମାନସ ଚନ୍ଦ୍ର ପଟ୍ଟନାୟକଙ୍କ ଆବାହକତ୍ୱରେ ରୋହିତଙ୍କ ଅମର ଆତ୍ମାର ସଦ୍ଗତି ନିମନ୍ତେ ନୀରବ ପ୍ରାର୍ଥନା କରାଯାଇଥିଲା। ଏଥିରେ ହିମାଂଶୁ ଭୂଷଣ ଚମ୍ପତ୍ତିରାୟ, ଉମେଶ ପଟ୍ଟନାୟକଙ୍କ ସମେତ ଅନ୍ୟ ଖବରଦାତାମାନେ ଉପସ୍ଥିତ ଥିଲେ।
ଜଟଣୀ ପୌରାଞ୍ଚଳସ୍ଥିତ ଗାନ୍ଧୀ ଉଦ୍ୟାନ ପରିସରରେ ଖବରଦାତା ରବୀନ୍ଦ୍ର ନାଥ ମହାକୁଡ଼ଙ୍କ ଆବାହକତ୍ୱରେ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଥିଲା। ଏଥିରେ ବରିଷ୍ଠ ଖବରଦାତା ରବି ସ୍ବାଇଁ ଅଧ୍ୟକ୍ଷତା କରିଥିଲେ। ରୋହିତଙ୍କ ଫଟୋଚିତ୍ରରେ ପୁଷ୍ପମାଲ୍ୟାର୍ପଣ ସହ ଆତ୍ମାର ସଦ୍ଗତି ନିମନ୍ତେ ନୀରବ ପ୍ରାର୍ଥନା କରାଯାଇଥିଲା। ଅନ୍ୟମାନଙ୍କ ମଧ୍ୟରେ ଈଶ୍ୱର ସାମନ୍ତରାୟ, ସଜ୍ଜନ ଅଗ୍ରଓ୍ବାଲ, ଦିଲୀପ ଶତପଥୀ, ଶ୍ରୀକାନ୍ତ ପରିଜା, ଶ୍ରୀକାନ୍ତ ପ୍ରଧାନ, ଏମ.ଡି. ଇସ୍ମାଇଲ ଅଲ୍ଲୀ, ରଙ୍ଗନାଥ ବେହେରା, ଅମରେଶ ରାଉତରାୟ, ହୃଦାନନ୍ଦ କଦମାନସିଂହ, ବିଶ୍ୱଜିତ୍ ସାମନ୍ତରାୟ, ହରିହର ତ୍ସ୍ବାଇଁ, ଲଳିତ ମହାରଣା, ସଂଗ୍ରାମ ହୋତା ପ୍ରମୁଖ ଉପସ୍ଥିତ ଥିଲେ। ନବୀନ ମହାପାତ୍ର ଧନ୍ୟବାଦ ଦେଇଥିଲେ।