ନୂଆଦିଲ୍ଲୀ,୧୮।୪: ଭାରତରେ ଇଲେକ୍ଟ୍ରିକ୍ ଭେହିକିଲ୍ (ଇଭି)ର ଚାହିଦା ବୃଦ୍ଧି ପାଇବାରେ ଲାଗିଛି। ଫଳରେ ଦେଶର ସର୍ବବୃହତ କାର୍ ନିର୍ମାଣକାରୀ କମ୍ପାନୀ ମାରୁତି ସୁଜୁକି ଇଣ୍ଡିଆ (ଏମ୍ଏସ୍ଆଇ) ବର୍ତ୍ତମାନ ଇଭି ସେଗ୍ମେଣ୍ଟରେ କମ୍ପାନୀକୁ ଯୋଡ଼ିବା ପାଇଁ ଯୋଜନା ଆରମ୍ଭ କରିଛି। ଏ ସମ୍ପର୍କରେ କମ୍ପାନୀର ନୂଆ ମ୍ୟାନେଜିଂ ଡାଇରେକ୍ଟର ଏବଂ ସିଇଓ ହିସାଶୀ ତାକେୟୁଚୀ କହିଛନ୍ତି, ୨୦୨୫ ସୁଦ୍ଧା କମ୍ପାନୀ ପକ୍ଷରୁ ଇଭି ଯାନର ବଜାର ପ୍ରବେଶ ପାଇଁ ଯୋଜନା ରହିଥିବା ତାକେୟୁଚୀ ମତବ୍ୟକ୍ତ କରିଛନ୍ତି। କମ୍ପାନୀର ପ୍ରଥମ ଇଭି ମଡେଲ୍ ପାଇଁ ଗୁଜରାଟରେ ପ୍ଲାଣ୍ଟ ସ୍ଥାପନ କରାଯିବ। ଏ ସମ୍ପର୍କରେ ତାକେୟୁଚୀ କହିଛନ୍ତି ଯେ, ଭାରତୀୟ ବଜାରରେ ଇଭିର ବିକ୍ରି ସୀମିତ ରହିଛି। ତେବେ ଆମ କମ୍ପାନୀ ଇଭି ନିର୍ମାଣ ଦିଗରେ ପ୍ରତିଦ୍ୱନ୍ଦ୍ୱୀ କମ୍ପାନୀଗୁଡ଼ିକଠାରୁ ପଛରେ ରହିଯାଇଛି। ତେଣୁ ଆମେ ଇଭି ଦିଗରେ ଭାରତର ଚାହିଦାକୁ ନଜରରେ ରଖି ଇଭି ନିର୍ମାଣ ପାଇଁ ମନସ୍ଥ କରିଛୁ ବୋଲି ତାକେୟୁଚୀ କହିଛନ୍ତି।
ଏମ୍ଏସ୍ଆଇ ନୂଆ ଏମ୍ଡିଙ୍କ ସୂଚନା ଅନୁସାରେ କମ୍ପାନୀର ଇଭି ସେଗ୍ମେଣ୍ଟ ଉପରେ ଗତ ଏକବର୍ଶ ହେଲା ଟେଷ୍ଟିଂ ଚାଲୁ ରହିଛି। ଏଥିରେ କମ୍ପାନୀର ବର୍ତ୍ତମାନ ରହିଥିବା ମଡେଲ୍ଗୁଡ଼ିକର ବ୍ୟବହାର କରାଯାଉଛି। ଏହି ଟେଷ୍ଟିଂ ପ୍ରକ୍ରିୟା ଦେଶର ପରିବେଶକୁ ଧ୍ୟାନରେ ରଖି ପରିବେଶ ଅନୁକୂଳ ଇଭି ଟେକ୍ନୋଲୋଜି ଦିଗରେ କାର୍ଯ୍ୟ କରୁଛି। କମ୍ପାନୀ ପ୍ରଥମେ ୨୦୨୫ରେ ଇଭିର ପ୍ରଥମ ମଡେଲ୍ ଲଞ୍ଚ କରିସାରିବା ପରେ ୨ୟ ମଡେଲ୍ ପ୍ରସ୍ତୁତି ଦିଗରେ କାର୍ଯ୍ୟ କରିବ ବୋଲି ତାକେୟୁଚୀ କହିଛନ୍ତି। ଏହାଛଡ଼ା ଇଲେକ୍ଟ୍ରିକ୍ ଯାନ ବହୁତ ମହଙ୍ଗା ହୋଇଥିବା ବେଳେ ବର୍ତ୍ତମାନର ଟେକ୍ନୋଲୋଜି ସହିତ ଇକୋନୋମିକାଲ୍ ଇଭି ନିର୍ମାଣ କରିବା କଠିନ ବ୍ୟାପାର। ଇଭିରେ ଲାଗିଥିବା ବ୍ୟାଟେରିର ଦାମ୍ ଇଭିର ଦାମ୍ ବୃଦ୍ଧି କରୁଛି। ତେବେ କମ୍ପାନୀ ପକ୍ଷରୁ ୧୦ଲକ୍ଷରୁ କମ୍ ଦାମ୍ର ଇଭି ଲଞ୍ଚ୍ କରିବା ସମ୍ଭବ ହୋଇନପାରେ ବୋଲି ତାକେୟୁଚୀ ସୂଚନା ଦେଇଛନ୍ତି।
ସୂଚନାଯୋଗ୍ୟ, ହୁଣ୍ଡାଇ, ମହିନ୍ଦ୍ରା ଏବଂ ଟାଟା ଭଳି ଦେଶର ଅନ୍ୟାନ୍ୟ ଅଗ୍ରଣୀ କାର୍ ନିର୍ମାତା କମ୍ପାନୀଗୁଡ଼ିକ ଇଲେକ୍ଟ୍ରିକ୍ କାର୍ ଲଞ୍ଚ୍ କରି ସାରିଛନ୍ତି। ଟାଟା କମ୍ପାନୀର ଇଭି ମଡେଲ୍ ଦାମ୍ ୧୧.୯୯ଲକ୍ଷଠାରୁ ଆରମ୍ଭ ହୋଇ ୧୭.୧୫ଲକ୍ଷ ପର୍ଯ୍ୟନ୍ତ ଥିବାବେଳେ ହୁଣ୍ଡାଇ ଇଲେକ୍ଟ୍ରିକ୍ କାର ଦର ୨୩.୭୯ ଲକ୍ଷରୁ ୨୭.୯୭ଲକ୍ଷ ରହିଛି। ସେହିପରି ମହିନ୍ଦ୍ରା କମ୍ପାନୀର ଇଲେକ୍ଟ୍ରିକ୍ କାର ପ୍ରାଇସ୍ ରେଞ୍ଜ୍ ୧୦.୫୩ଲକ୍ଷରୁ ୧୪.୯୮ଲକ୍ଷ ରହିଛି।