ନୂଆଦିଲ୍ଲୀ,୨୪।୩:ଦେଶର ପ୍ରମୁଖ ଅଟୋମାବାଇଲ କମ୍ପାନୀ ମାରୁତି ସୁଜୁକି ଇଣ୍ଡିଆ ଲିମିଟେଡ୍(ଏମ୍ଏସ୍ଆଇଏଲ୍) ତା’ର ବିଭିନ୍ନ ମଡେଲ ଉପରେ ଦର ବୃଦ୍ଧି କରିବାକୁ ଯାଉଛି। ଏପରିକି ଚଳିତ ବର୍ଷ ଏପ୍ରିଲରୁ ନୂଆ ଦର ସୂଚୀ ପ୍ରକାଶିତ ହେବ ବୋଲି ଗୁରୁବାର ଏମ୍ଏସ୍ଆଇଏଲ୍ ପକ୍ଷରୁ କୁହାଯାଇଛି। ବିଶେଷକରି ସାମଗ୍ରିକ ମୁଦ୍ରାସ୍ଫୀତି ଓ ନିୟାମକ ଆବଶ୍ୟକତାର ପ୍ରଭାବକୁ ଆଂଶିକ ଭାବେ ଭରଣା କରିବା ପାଇଁ କମ୍ପାନୀ ୨୦୨୩ ଏପ୍ରିଲରେ ତା’ର ମଡେଲ ରେଞ୍ଜର ମୂଲ୍ୟ ବୃଦ୍ଧି କରିବ ବୋଲି ଘୋଷଣା କରିଛି। ଏପରିକି ଆସନ୍ତା ମାସରୁ ଲାଗୁହେବାକୁ ଥିବା ଦର ବୃଦ୍ଧିର ପରିମାଣ ସମ୍ପର୍କିିତ କୌଣସି ପ୍ରକାର ତଥ୍ୟ ଏବଂ ଦରସୂଚୀ ବର୍ତ୍ତମାନ ସମୟରେ ଘୋଷଣା କରିନାହିଁ।
ଏ ସମ୍ପର୍କରେ ଏମ୍ଏସ୍ଆଇଏଲ୍ କହିଛି, କମ୍ପାନୀ ୨୦୨୩ ଏପ୍ରିଲରେ ଉକ୍ତ ମୂଲ୍ୟ ବୃଦ୍ଧି ଯୋଜନା କରିଛି, ଯାହା ବ୍ରାଣ୍ଡ୍ର ବିଭିନ୍ନ ମଡେଲ ଉପରେ ଭିନ୍ନ ଭିନ୍ନ ପ୍ରକାର ହେବ। ଅପରପକ୍ଷରେ ସାମଗ୍ରିକ ମୁଦ୍ରାସ୍ଫୀତି ଏବଂ ନିୟାମକ ଆବଶ୍ୟକତା ଯୋଗୁ କମ୍ପାନୀର ମୂଲ୍ୟ ଚାପ ବୃଦ୍ଧି ପାଉଛି ବୋଲି ଏମ୍ଏସ୍ଆଇଏଲ୍ ଏକ ନିୟାମକ ଫାଇଲିଂରେ ଉଲ୍ଲେଖ କରିଥିବା ଜଣାପଡ଼ିଛି। ସେହିଭଳି କମ୍ପାନୀ ଖର୍ଚ୍ଚ ହ୍ରାସ କରିବା ଏବଂ ଆଂଶିକ ଭାବେ ନୂତନ ଦର ବୃଦ୍ଧିକୁ ଭରଣା କରିବା ପାଇଁ ସର୍ବାଧିକ ପ୍ରୟାସ କରୁଥିବା ଜଣାପଡ଼ିଛି। ଦରବୃଦ୍ଧି ଫଳରେ ଏହାର କିଛି ପ୍ରଭାବ ଉତ୍ପାଦିତ ସାମଗ୍ରୀର ମୂଲ୍ୟ ବୃଦ୍ଧି ମାଧ୍ୟମରେ ଦେବା ଜରୁରୀ ହୋଇପଡ଼ିଛି। ସେହିପରି ଭାରତୀୟ ଅଟୋମୋବାଇଲ ଶିଳ୍ପ ବର୍ତ୍ତମାନ ସମୟରେ ଅନେକ ପ୍ରକାର ନୂଆ ନୀତି ନିୟମରେ କାର୍ଯ୍ୟ କରୁଛି। ଏପରିକି କମ୍ପାନୀଗୁଡ଼ିକୁ ନୂତନ ଉତ୍ପାଦକୁ ବିଏସ୍ ୬ ନିର୍ଗମନ ମାନଦଣ୍ଡର ୨ୟ ପର୍ଯ୍ୟାୟ ପୂରଣ କରିବା ପାଇଁ କାର୍ଯ୍ୟ ଆରମ୍ଭ କରିଛନ୍ତି। ଫଳରେ ୨୦୨୩ ଏପ୍ରିଲ ପହିଲାରୁ ଗାଡ଼ିଗୁଡ଼ିକରେ ରିୟଲ ଟାଇମ୍ ଡ୍ରାଇଭିଂ ନିର୍ଗମନ ସ୍ତର ଉପରେ ନଜର ରଖିବା ପାଇଁ ଏକ ଅନ୍-ବୋର୍ଡ ସେଲ୍ଫ ଡାଇଗ୍ନୋଷ୍ଟିକ୍ ଡିଭାଇସ୍ ରହିବ ବୋଲି ସରକାରଙ୍କ ପକ୍ଷରୁ କୁହାଯାଇଛି। ସୂଚନାଯୋଗ୍ୟ ,ଏହା ପୂର୍ବରୁ ହୋଣ୍ଡା କାର୍ସ,ଟାଟା ମୋଟର୍ସ ଏବଂ ହିରୋ ମୋଟୋକର୍ପ ସମେତ ଅନେକ ଅଟୋମୋବାଇଲ କମ୍ପାନୀ ୨୦୨୩ ଏପ୍ରିଲରୁ ବର୍ଦ୍ଧିତ ଦର ଲାଗୁ କରିବାକୁ ଯାଉଛନ୍ତି।