ଲାଠୋର,୩ା୧୨(ଡ଼ି.ଏନ.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ କରୁଆଝର ପଞ୍ଚାୟତ ଅଧୀନ ମସିଣା ଗ୍ରାମରେ ରହିଥିବା ଡ୍ୟାମ(ବନ୍ଧ) ବର୍ତ୍ତମାନ ମାଟି ଢିପ ଏବଂ ଅମରି ଲଟାରେ ପରିପୂର୍ଣ୍ଣ ହୋଇରହିଛି। ଦୀର୍ଘ ବର୍ଷ ହେଲା ପଙ୍କ ଉଦ୍ଧାର ହୋଇ ନ ଥିବା ଯୋଗୁ ଗ୍ରାମ ତଥା ଆଖପାଖ ଗ୍ରାମର ଚାଷୀଙ୍କ ଜମିକୁ ଜଳସେଚନ ହୋଇ ପାରୁ ନ ଥିବା ନେଇ ଗ୍ରାମର ଚାଷୀ ରାଜ କିଶୋର ଭୋଇ, ପଟ୍ଟନାଏକ ଭୋଇ,ସୁନ୍ଦର ନାଗ,ରୁଦ୍ରମଣି ଭୋଇ,ଟଙ୍କ ନାଗ,କୃଷ୍ଣଚନ୍ଦ୍ର ଲିଟି ପ୍ରମୁଖ ଅଭିଯୋଗ କରିଛନ୍ତି। ମସିଣା ଗ୍ରାମ ଏକ ଆଦିବାସୀ ବହୁଳ ଗ୍ରାମ। ଏଠାରେ ବସବାସ କରୁଥିବା ଅଧିକାଂଶ ପରିବାର ଚାଷ କରି ଓ ଦାଦନ ଖଟିବାକୁ ଯାଇ ଯାହା ରୋଜଗାର କରନ୍ତି ସେଥିରେ ନିଜ ପରିବାର ପ୍ରତିପୋଷଣ କରିଥାନ୍ତି। ଚାଷୀଙ୍କ ସ୍ବାର୍ଥକୁ ଦୃଷ୍ଟିରେ ରଖି ଜମିକୁ ଜଳସେଚନ ପାଇଁ ସରକାର ଗତ ୧୯୮୦ ମସିହାରେ ଏଠାରେ ଏକ ଡ୍ୟାମ ନିର୍ମାଣ କରିଥିଲେ। ଡ୍ୟାମର ପୂର୍ବ ଦିଗରେ ଧୂମା ପର୍ବତ,ପଶ୍ଚିମରେ ଘୁଡ଼ାଚରା ପର୍ବତ ଏବଂ ଉତ୍ତରରେ ଚଣ୍ଡି ପର୍ବତ ରହିଛି। ଡ୍ୟାମରୁ ବାମ ,ଡାହାଣ ଦୁଇ ଗୋଟି ମୁଖ୍ୟ କେନାଲ ତଥା ଜରା ମହୁଲ,ପଡ଼ିଆ ବାହାଲି, କେନ୍ଦୁଭଟା ୩ ଗୋଟି ଶାଖା କେନାଲକୁ ମିଶାଇ ମୋଟ ୫ ଗୋଟି କେନାଲ ସାହାଯ୍ୟରେ ଜଳସେଚନ ବ୍ୟବସ୍ଥା କରାଯାଇଛି। ହେଲେ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଡ୍ୟାମରେ ଅମରି ଲଟା ମାଡି ଚାଲିଥିବା ବେଳେ ମଝିରେ ମାଟି ଜମା ହୋଇ ବଡ ବଡ ଢିପ ହୋଇରହିଛି। ଦୀର୍ଘ ଦିନରୁ ପଙ୍କ ଉଦ୍ଧାର ହୋଇ ନ ଥିବା ଯୋଗୁ ଜଳଧାରଣ କ୍ଷମତା କମିବା ସହ ଆବଶ୍ୟକ ମୁତାବକ ପାଣି ଜମିକୁ ମାଡି ପାରୁନାହିଁ ା ଏହି ଡ୍ୟାମରୁ ପ୍ରଥମେ ମସିଣା,ଝଲିଆଲିଟି,କରୁଆଝର ଏବଂ ସାନଗୁର୍ଜିଭଟା ଗ୍ରାମର ହାରାହାରି ୧୫୦ ହେକ୍ଟରରୁ ଊର୍ଦ୍ଧ୍ୱ ଜମିକୁ ଜଳସେଚନ ହେଉଥିଲା। ବର୍ତ୍ତମାନ ଡ୍ୟାମର ଅବସ୍ଥା ଶୋଚନୀୟ ହୋଇ ପଡିଥିବା ଯୋଗୁ ଖରିଫ ରୁତୁରେ ୧୦୦ ହେକ୍ଟର ଜମିକୁ ଜଳସେଚନ ହେଉଥିବା ବେଳେ ରବି ଋତୁରେ ମାତ୍ର ୫୦ ହେକ୍ଟର ଜମିକୁ ଜଳସେଚନ ହୋଇ ପାରୁଥିବା ଚାଷୀମାନେ ପ୍ରକାଶ କରିଛନ୍ତି। ଡ୍ୟାମରୁ ମାଟି ଢିପ ଓ ଅମରି ଲଟାକୁ କାଟି ସଫା କରିବା ସହ ପଙ୍କ ଉଦ୍ଧାର କଲେ ୪ ଖଣ୍ଡ ଗ୍ରାମର ଚାଷୀ ଉପକୃତ ହୋଇ ପାରିବେ। ଦୀର୍ଘ ଦିନ ହେଲା ଗ୍ରାମର ଚାଷୀମାନେ ଏହି ସମସ୍ୟାର ସମାଧାନ ପାଇଁ ଦାବି କରି ଆସୁଥିଲେ ମଧ୍ୟ ଏଥିପ୍ରତି କେହି ନଜର ଦେଉନାହାନ୍ତି। ଫଳରେ ଏଠିକାର ଚାଷୀମାନଙ୍କ ଆର୍ଥିକ ସ୍ଥିତି ଧୀରେ ଧୀରେ ଦୋହଲିବାରେ ଲାଗିଛି। ଏନେଇ ଖପ୍ରାଖୋଲ କ୍ଷୁଦ୍ର ଜଳସେଚନ ବିଭାଗ କନିଷ୍ଠ ଯନ୍ତ୍ରୀ ବିଶ୍ୱଜିତ ବାରିକଙ୍କୁ ପଚାରିବାରେ ଟଙ୍କା ଆସିଛି। ପାଣି ଟିକେ ଶୁଖିଲେ କାମ ଆରମ୍ଭ କରାଯିବ ବୋଲି ସେ କହିଥିଲେ।