ଲାଠୋର, ୬।୫ (ଡି.ଏନ.ଏ.) ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ କରୁଆଝର ପଞ୍ଚାୟତ ଅଧୀନ ମସିଣା ଗ୍ରାମରେ ଅବହେଳିତ ଅବସ୍ଥାରେ ପଡି ରହିଥିବା ଡ୍ୟାମ (ବନ୍ଧ) ନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ କାମ ଆରମ୍ଭ ହୋଇଥିବା ଦେଖାଯାଇଛି। ୧୯୮୦ ମସିହାରେ ସରକାର ମସିଣା ଗ୍ରାମରେ ଲକ୍ଷାଧିକ ଟଙ୍କା ବ୍ୟୟରେ ଏକ ଡ୍ୟାମ ନିର୍ମାଣ କରି ମସିଣା, ଝଲିଆଲିଟି, କରୁଆଝର ଏବଂ ସାନଗୁର୍ଜିଭଟା ଗ୍ରାମର ୧୫୦ ହେକ୍ଟରରୁ ଊର୍ଦ୍ଧ୍ୱ ଚାଷ ଜମିକୁ ଜଳସେଚନର ବ୍ୟବସ୍ଥା କରିଥିଲେ। ହେଲେ ବିଭାଗୀୟ ଅବହେଳା ତଥା ରକ୍ଷଣାବେକ୍ଷଣ ଅଭାବ ସାଙ୍ଗକୁ ଦୀର୍ଘ ବର୍ଷ ଧରି ପଙ୍କ ଉଦ୍ଧାର ହୋଇ ନ ଥିବା ହେତୁ ଡ୍ୟାମର ଚାରିଆଡେ ଅମରି ଲଟା ମାଡ଼ି ଚାଲିଥିଲା। ଏହାଛଡା ମଝିରେ ମାଟି ଜମା ହୋଇ ବଡ ବଡ ଢିପ ସୃଷ୍ଟି ହୋଇଥିଲା। ଫଳରେ ଦିନକୁ ଦିନ ଜଳଧାରଣ କ୍ଷମତା କମିବା ସହ ଆବଶ୍ୟକତା ମୁତାବକ ପାଣି ଜମିକୁ ମାଡି ପାରୁ ନ ଥିଲା। ପାଣି ନ ପାଇବାରୁ ଚାଷୀମାନଙ୍କୁ ପ୍ରତିବର୍ଷ ଚାଷରେ କ୍ଷତି ସହିବାକୁ ପଡ଼ୁଥିଲା। ଡ୍ୟାମର ମରାମତି ଏବଂ ପଙ୍କ ଉଦ୍ଧାର ପାଇଁ ଦାବି ହୋଇ ଆସୁଥିଲେ ମଧ୍ୟ କେହି କର୍ଣ୍ଣପାତ କରୁ ନଥିଲେ। ଏହାକୁ ନେଇ ଧରିତ୍ରୀରେ ଗତ ୩ ଡ଼ିସେମ୍ବର ୨୦୨୨ରେ ‘ଅମରି ଲଟାରେ ପରିପୂର୍ଣ୍ଣ ମସିଣା ଡ୍ୟାମ’ ଶୀର୍ଷକ ଖବର ପ୍ରକାଶ ପାଇଲା ପରେ କ୍ଷୁଦ୍ର ଜଳସେଚନ ବିଭାଗ ତପତ୍ରତା ପ୍ରକାଶ କରି ଟେଣ୍ଡର ଆହ୍ବାନ କରିଥିଲା। ସରକାରୀ ନିୟମ ଅନୁସାରେ ବଲାଙ୍ଗୀରର ରଶ୍ମି ରଞ୍ଜନ ପ୍ରଧାନ ଟେଣ୍ଡର ପାଇଥିବା ବିଭାଗୀୟ ଏସଡ଼ିଓ ନିରଞ୍ଜନ ଶତପଥୀ କହିଛନ୍ତି। ବିଭାଗୀୟ ତଦାରଖରେ ଉନ୍ନତମାନର କାମ କରାଯିବା ପାଇଁ ଚାଷୀମାନେ ଦାବି କରିଛନ୍ତି।