ବେଳେବେଳେ ଯୋଗ୍ୟତା ଥାଇ ବି ଚେହେରା ଖାସ୍ ନ ହୋଇଥିବାରୁ ଅନେକେ ଇଣ୍ଟରଭ୍ୟୁରେ ସଫଳ ହୋଇ ପାରନ୍ତି ନାହିଁ। କାରଣ କେତେକ ସ୍ଥାନରେ ଯୋଗ୍ୟତାଠାରୁ ଲୁକ୍ସକୁ ବେଶି ଗୁରୁତ୍ୱ ଦିଆଯାଏ। ଏଇ ମୁହଁ ଦେଖା ନୀତି ପାଇଁ ଅନେକ ଯୋଗ୍ୟ ବ୍ୟକ୍ତି ଉପଯୁକ୍ତ ସମ୍ମାନ ଓ କାମ ପାଇ ପାରନ୍ତି ନାହିଁ। ଏହାକୁ ନଜରରେ ରଖି ଚାଇନା, ଚେଙ୍ଗଡୁର ଏକ ଲଜିଷ୍ଟିକ୍ କମ୍ପାନୀ ଆପଣାଇଛି ଏକ ଅଭିନବ ଉପାୟ। ଏହି କମ୍ପାନୀରେ ନିୟମ କରାଯାଇଛି ଯେ, ଯେଉଁମାନେ ଇଣ୍ଟରଭ୍ୟୁ ଦେବା ପାଇଁ ଆସୁଛନ୍ତି ଓ ଯେଉଁମାନେ ଇଣ୍ଟରଭ୍ୟୁ ନେବେ ଉଭୟେ ଚେହେରାରେ ମାସ୍କ ଲଗାଇବେ। କମ୍ପାନୀର କହିବାନୁଯାୟୀ ଏହାଦ୍ୱାରା ଇଣ୍ଟରଭ୍ୟୁ ଦେବାକୁ ଆସୁଥିବା ଲୋକଙ୍କର ମାନସିକ ଚାପ କମୁଛି। ତା’ସହ ଯୋଗ୍ୟ ବ୍ୟକ୍ତିଙ୍କର ଚୟନ ହୋଇପାରୁଛି। ଏହି କମ୍ପାନୀର ଏଭଳି ଅଭିନବ ଉପାୟରେ କରାଯାଉଥିବା ଇଣ୍ଟରଭ୍ୟୁର ଭିଡିଓକୁ ସୋସିଆଲ ମିଡିଆରେ ଲୋକେ ବେଶ୍ ପସନ୍ଦ କରିଛନ୍ତି। ଏଭଳି ବ୍ୟବସ୍ଥା ସବୁଠି ହେବା କଥା ବୋଲି ଅନେକେ ମତ ବି ଦେଉଛନ୍ତି।