ବରଗଡ଼ ଅଫିସ,୧୪।୪: ବିବାହରେ ନ ଥିଲା ଯାନି ଯୌତୁକ। ଫୁଟି ନଥିଲା ବାଣ ଫୋଟକା। କେବଳ ଦୁଇଟି ଫୁଲମାଳାରେ ପରସ୍ପରକୁ ଜୀବନସାଥୀ ଭାବେ ବାଛି ନେଇଥିଲେ। ଏଭଳି ଏକ ଆଦର୍ଶ ଗଣବିବାହ ଶୁକ୍ରବାର ବରଗଡ଼ ବିଜୁ ପଟ୍ଟନାୟକ ଟାଉନ ହଲରେ ନିରାଡମ୍ବରଭାବେ ଅନୁଷ୍ଠିତ ହୋଇଯାଇଛି। ଆମ୍ବେଦକର ଚାରିଟେବୁଲ ଟ୍ରଷ୍ଟ ଏବଂ ସମ୍ବିଧାନ ସୁରକ୍ଷା ମଞ୍ଚ ପକ୍ଷରୁ ହୋଇଥିବା ଏହି ଗଣବିବାହରେ ଜିଲା ତଥା ଜିଲା ବାହାରର ୬ ଯୋଡି ବରକନ୍ୟା ପରସ୍ପରକୁ ଜୀବନସାଥୀ ଭାବେ ବାଛି ନେଇଥିଲେ। ସର୍ଦ୍ଦାର ପ୍ରିତମ ସିଂ ସପତ୍ନୀକ କନ୍ୟା ପିତାମାତା ଏବଂ ପାଣ୍ଡବ କର୍ଣ୍ଣ ସପତ୍ନୀକ ବର ପିତାମାତା ଭାବେ ଦାୟିତ୍ୱ ନିର୍ବାହ କରିଥିଲେ। ଗଣବିବାହର ଉଦ୍ୟୋକ୍ତା ପବିତ୍ର ଦ଼େହେରୀଙ୍କ ଉପସ୍ଥିତ ସମସ୍ତ ଲୋକେ ନବଦମ୍ପତିମାନଙ୍କୁ ଶୁଭାଶିର୍ବାଦ ପ୍ରଦାନ କରିଥିଲେ। ଗତ ୨୦୦୭ ମସିହାରୁ ପ୍ରତିବର୍ଷ ବରଗଡ଼ ଏଭଳି ଗଣବିବାହ ଅନୁଷ୍ଠିତ ହୋଇ ଆସୁଛି ଏବଂ ଏପର୍ଯ୍ୟନ୍ତ ୧୮୨ ଦମ୍ପତିଙ୍କ ଏଭଳି ଆଦର୍ଶ ବିବାହ ହୋଇ ସାରିଛି। ସାମାଜିକ ପରିବର୍ତ୍ତନ ଏବଂ ଆର୍ଥିକ ସମସ୍ୟାରୁ ମୁକ୍ତି ଲକ୍ଷ୍ୟ ନେଇ ଏଭଳି ପଦକ୍ଷେପ ନିଆଯାଉଛି ଏବଂ ଆଗକୁ ମଧ୍ୟ ଏହି ଧାରା ବଜାୟ ରହିବ ବୋଲି ଗଣବିବାହର ଉଦ୍ୟୋକ୍ତା ପବିତ୍ର ଦେହେରୀ କହିଛନ୍ତି।
