ବେଜିଂ,୨୭।୧୧: ଆଂଶିକ ଲକ୍ଡାଉନ୍ ଥିବା ଏକ ଆପାର୍ଟମେଣ୍ଟରେ ଅଗ୍ନିକାଣ୍ଡ ଘଟି ୧୦ ଜଣଙ୍କ ଜୀବନ ଯିବା ପରେ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ଜିରୋ-କୋଭିଡ୍ ନୀତି ବିରୋଧରେ ଜିନ୍ଜିଆଙ୍ଗ ପ୍ରଦେଶରେ ଆନ୍ଦୋଳନ ବ୍ୟାପକ ରୂପ ଧାରଣ କରିଛି। କୋଭିଡ୍ କଟକଣା ଯୋଗୁ ଆପାର୍ଟମେଣ୍ଟରେ ନିଆଁ ଲିଭାଇବା ପ୍ରଭାବିତ ହେଲା ବୋଲି ଅନେକ ପ୍ରତ୍ୟକ୍ଷଦର୍ଶୀ କହିଛନ୍ତି। ଏହାର ପ୍ରତିବାଦରେ ଜିନ୍ଜିଆଙ୍ଗ ରାଜଧାନୀ ଉରୁମ୍କି ରାସ୍ତାରେ ହଜାର ହଜାର ଲୋକ ଶୋଭାଯାତ୍ରାରେ ବାହାରିଥିବାର ଭିଡିଓ ସୋସିଆଲ ମିଡିଆରେ ପ୍ରସାରିତ ହେଉଛି। ‘ଲକ୍ଡାଉନ୍ ଉଠାଯାଉ’ ବୋଲି ସେମାନେ ସ୍ଲୋଗାନ ଦେଉଛନ୍ତି। ଜିନ୍ଜିଆଙ୍ଗ ଅଞ୍ଚଳକୁ ଦୀର୍ଘଦିନ ହେଲା ଲକ୍ଡାଉନରେ ରଖାଯାଇଥିବାରୁ ଉରୁମ୍କିର ୪୦ ଲକ୍ଷ ଲୋକ ୧୦୦ ଦିନ ହେଲା ଘରୁ ବାହାରିପାରି ନାହାନ୍ତି। ବିଭିନ୍ନ ସହରରେ କଠୋର ଲକ୍ଡାଉନ ଯୋଗୁ ଉତ୍ତେଜନା ବୃଦ୍ଧି ପାଇଛି। ଏବେ ଦୈନିକ ସଂକ୍ରମଣ ୩୫ ହଜାର ଟପିଥିବାରୁ ଜିରୋ-କୋଭିଡ୍ ନୀତି ବିଫଳ ହୋଇଥିବା ଲୋକେ ଅଭିଯୋଗ କରିଛନ୍ତି।