ଓ୍ବାଶିଂଟନ, ୧।୭ : ଅନ୍ତର୍ଜାତୀୟ ଧାର୍ମିକ ସ୍ବାଧୀନତା ଉପରେ ଭାରତୀୟ-ଆମେରିକୀୟ ରାଷ୍ଟ୍ରଦୂତ ରାଶାଦ ହୁସେନ ଭାରତରେ ନରସଂହାର ବଡ଼ ବିପଦ ସୃଷ୍ଟି କରିଥିବା କହିଛନ୍ତି। ଭାରତରେ ଜାରି କରାଯାଇଥିବା ଅନେକ ଘଟଣା ତଥା ବିବୃତ୍ତି ସମ୍ପର୍କରେ ସେ ନିଜର ମତ ପ୍ରକାଶ କରିବାବେଳେ ଏନେଇ ଉଦ୍ବେଗ ପ୍ରକାଶ କରିଛନ୍ତି।
ଭାରତରେ ଧାର୍ମିକ ସ୍ବାଧୀନତା ଉପରେ ଆମେରିକାର କମିଟି ସମ୍ମୁଖରେ ଉପସ୍ଥିତ ହୋଇ ହୁସେନ କହିଛନ୍ତି ଯେ ହୋଲକୋଷ୍ଟ ସଂଗ୍ରହାଳୟ ସହିତ ଜଡିତ ଥିବା ପ୍ରାରମ୍ଭିକ ଚେତାବନୀ ପ୍ରକଳ୍ପ(ଏର୍ଲି ଓ୍ବାର୍ଣ୍ଣିଂ ପ୍ରୋଜେକ୍ଟ)ରେ ଭାରତରେ ନରସଂହାର ହେବାର ଆଶଙ୍କା ଥିବା ଦେଶ ତାଲିକାରେ ଦ୍ୱିତୀୟ ସ୍ଥାନରେ ରଖାଯାଇଛି।
ହୁସେନ କହିଛନ୍ତି ଯେ ଭାରତରେ ଧାର୍ମିକ ସଂଖ୍ୟାଲଘୁମାନଙ୍କର ଅଧିକାର ବିପଦରେ ଅଛି ଏବଂ ଆମେରିକା ଏହି ପ୍ରସଙ୍ଗରେ ଭାରତକୁ ସିଧାସଳଖ ଜଣାଉଛି। ହୁସେନ ନାଗରିକତ୍ୱ ସଂଶୋଧନ ଅଧିନିୟମ ଏବଂ ନରସଂହାର ପାଇଁ ଖୋଲା ଆହ୍ବାନ ସମ୍ପର୍କରେ ଆଲୋଚନା କରିଛନ୍ତି। ହୁସେନ କମିଟିକୁ କହିଛନ୍ତି ଯେ ଆମେ ଭାରତରେ ଚର୍ଚ୍ଚ ଉପରେ ଆକ୍ରମଣ ଏବଂ ହିଜାବ ନିଷେଧ ଭଳି ମାମଲା ଦେଖିଛୁ।
ସେ ଏହା ମଧ୍ୟ କହିଛନ୍ତି ଯେ ଜଣେ ମନ୍ତ୍ରୀ ଭାରତରେ ମୁସଲମାନମାନଙ୍କୁ ଉଈ ବୋଲି ମଧ୍ୟ କହିଛନ୍ତି। ଏହାପୂର୍ବରୁ ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ଧାର୍ମିକ ସ୍ବାଧୀନତା ଉପରେ ରିପୋର୍ଟ ପ୍ରକାଶ କରିବାବେଳେ କିଛି ବିବାଦୀୟ କଥା ପ୍ରକାଶ କରିବା ସହିତ ଭାରତ ବିଷୟରେ ଚିନ୍ତା ପ୍ରକଟ କରିଥିଲେ ଯାହାକୁ ନେଇ ଭାରତୀୟ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଆପତ୍ତି କରାଯାଇଥିଲା। ଏହି ରିପୋର୍ଟରେ ଭାରତରେ ଧର୍ମସ୍ଥଳ ଉପରେ ଆକ୍ରମଣର ଆଶଙ୍କା ବୃଦ୍ଧି ପାଉଥିବା ଦର୍ଶାଯାଇଛି। ଆମେରିକାର ରାଷ୍ଟ୍ରଦୂତ ହୁସେନ କହିଛନ୍ତି ଯେ ମୁସଲମାନ, ଖ୍ରୀଷ୍ଟିଆନ, ଶିଖ, ଦଲିତ ଏବଂ ଆଦିବାସୀମାନଙ୍କ ଅଧିକାରକୁ ସୁରକ୍ଷିତ ରଖିବାକୁ ହେବ।