ନୂଆଦିଲ୍ଲୀ,୨୧।୩: ଭାରତରେ ଖଲିସ୍ତାନୀ ସମର୍ଥକଙ୍କ ଟୁଇଟର ଆକାଉଣ୍ଟଗୁଡିକୁ ବ୍ଲକ୍ କରାଯାଇଛି। ଏହି ବ୍ଲକ୍ ଆକାଉଣ୍ଟରେ କାନାଡାର ନ୍ୟୁ ଡେମୋକ୍ରାଟିକ ପାର୍ଟିର ନେତା ଜଗମିତ ସିଂଙ୍କ ଟୁଇଟର ଆକାଉଣ୍ଟ ମଧ୍ୟ ରହିଛି। ଖଲିସ୍ତାନୀ ନେତା ଅମୃତପାଲ ସିଂଙ୍କ ଉପରେ ପୋଲିସର କାର୍ଯ୍ୟାନୁଷ୍ଠାନକୁ ବିରୋଧ କରାଯାଉଥିବା ଆକାଉଣ୍ଟଗୁଡିକ ବ୍ଲକ୍ କରାଯାଇଛି।
ଏହି କାର୍ଯ୍ୟାନୁଷ୍ଠାନ ଏପରି ଏକ ସମୟରେ ଘଟିଛି ଯେତେବେଳେ ଖାଲିସ୍ତାନୀ ସମର୍ଥକମାନେ ବିଦେଶରେ ଥିବା ଭାରତୀୟ ଦୂତାବାସ ଏବଂ ହାଇ କମିଶନ ଉପରେ ଆକ୍ରମଣ କରୁଛନ୍ତି। କାନାଡାର କବୟତ୍ରୀ ରୂପୀ କୌର, କାର୍ଯ୍ୟକର୍ତ୍ତା ଗୁରୁଦୀପ ସିଂ ସାହୋଟାଙ୍କ ଟୁଇଟର୍ ଆକାଉଣ୍ଟକୁ ମଧ୍ୟ ବ୍ଲକ୍ କରାଯାଇଛି। ଜଗମିତ ସିଂ ଭାରତ ବିରୋଧୀ ମନ୍ତବ୍ୟ ପାଇଁ ଜଣାଶୁଣା, ତେଣୁ ତାଙ୍କ ଆକାଉଣ୍ଟକୁ ବ୍ଲକ୍ କରାଯାଇଛି।
ମାର୍ଚ୍ଚ ୧୯ରେ ଖଲିସ୍ତାନୀ ସମର୍ଥକମାନେ ଲଣ୍ଡନରେ ଥିବା ଭାରତୀୟ ହାଇ କମିଶନଙ୍କ ଉପରେ ଆକ୍ରମଣ କରି ତ୍ରିରଙ୍ଗାର ଅପମାନ କରିଥିଲେ। ଏହାସହ ଖଲିସ୍ତାନୀ ସମର୍ଥକମାନେ ଆମେରିକାର ସାନ ଫ୍ରାନ୍ସିସ୍କୋରେ ଥିବା ଭାରତୀୟ ଦୂତାବାସ ଉପରେ ଆକ୍ରମଣ କରିଥିଲେ। ଉଭୟ ଘଟଣାକୁ ଭାରତ ନିଦା କରିବା ସହ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ସେଠାକାର ସରକାରଙ୍କୁ କୁହାଯାଇଛି।
