ସମ୍ବଲପୁର,୩।୧(ପ୍ରମୋଦ ବହିଦାର): ସମ୍ବଲପୁର ଅଇଁଠାପାଲି ଥାନା ବୁଢ଼ାରଜା ଛକସ୍ଥିତ ମଣପୁରମ୍ ଗୋଲ୍ଡ ଲୋନ ସଂସ୍ଥାରୁ ଶୁକ୍ରବାର ଏକ ବଡ଼ ଧରଣର ଲୁଟ୍ ହୋଇଛି। ଦୁର୍ବୃତ୍ତମାନେ ମଣପୁରମ୍ ସଂସ୍ଥା କାର୍ଯ୍ୟାଳୟରେ ପଶି କର୍ମଚାରୀଙ୍କ ସହ ସୁରକ୍ଷାକର୍ମୀଙ୍କୁ ବନ୍ଧୁକ ଦେଖାଇ ବିପୁଳ ପରିମାଣର ସୁନା ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଛାନ୍ଭିନ୍ ଆରମ୍ଭ କରିଛି। ଏହି ଘଟଣା ସମ୍ବଲପୁରରେ ଚାଞ୍ଚଲ୍ୟ ଖେଳାଇ ଦେଇଛି।
ମିଳିଥିବା ସୂଚନା ମୁତାବକ, ଶୁକ୍ରବାର ପ୍ରାୟ ସାଢ଼େ ୯ଟାରେ ବୁଢାରଜା ମଣପୁରମ୍ ଗୋଲ୍ଡ ଲୋନ ସଂସ୍ଥା କାର୍ଯ୍ୟାଳୟ ଖୋଲି ଥିଲା। ସେତିକିବେଳେ ତିନୋଟି ବାଇକ୍ରେ ୬ଜଣ ମୁଖାପିନ୍ଧା ଦୁର୍ବୃତ୍ତ ଆସି କାର୍ଯ୍ୟାଳୟରେ ପ୍ରବେଶ କରିଥିଲେ। ପରେ ସେମାନେ ସୁରକ୍ଷାକର୍ମୀ ଏବଂ ଭିତରେ ଥିବା କର୍ମଚାରୀଙ୍କୁ ବନ୍ଧୁକ ଦେଖାଇ ଭୟଭୀତ କରି ମାଡପିଟ କରି ଏକ କଠୋରୀରେ ବନ୍ଦ କରିଦେଲେ। ପରେ କର୍ମଚାରୀଙ୍କଠାରୁ ପାସଓ୍ବାର୍ଡ ନେଇ ସୁନା ଗହଣା ରଖାଯାଇଥିବା ଟ୍ରେଜେରୀ ଖୋଲି ପ୍ରାୟ ୩୦ କେଜି ସୁନା ଗହଣାକୁ ଏକ ବ୍ୟାଗରେ ଧରି ଚମ୍ପଟ ମାରିଥିଲ।
ଶାଖା ପ୍ରବନ୍ଧଙ୍କଠାରୁ ଖବର ପାଇ ଅଇଁଠାପାଲି ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଡକାୟତଙ୍କୁ ଧରିବା ପାଇଁ ସମ୍ବଲପୁରର ବିଭିନ୍ନ ପ୍ରବେଶ ଓ ପ୍ରସ୍ଥାନ ପଥକୁ ସିଲ୍ କରାଯାଇଛି। ଏପରିକି ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଏହି ଘଟଣା ସମ୍ବଲପୁରରେ ଚାଞ୍ଚଲ୍ୟ ଖେଳାଇ ଦେଇଛି।
