ବ୍ରହ୍ମପୁର ଅଫିସ,୮।୫: ବ୍ରହ୍ମପୁର ବଡ଼ ବଜାର ଥାନା ଅନ୍ତର୍ଗତ ମାଳୁଆଣି ମନ୍ଦିର ସାହିରେ ରହୁଥିବା ଜଣେ ବ୍ୟକ୍ତିଙ୍କ ଘରୁ ଠାକୁରଙ୍କ ମୂର୍ତ୍ତି ସହ ଟଙ୍କା ଚୋରି ହୋଇଥିଲା। ଏହି ଘଟଣାର ମାଷ୍ଟରମାଇଣ୍ଡି ଫେରାର ଥିଲା। ପୋଲିସ ତାଙ୍କୁ ଶନିବାର ଗିରଫ କରିଛି। ଅଭିଯୁକ୍ତ ଜଣଙ୍କ ପ୍ରହଲ୍ଲାଦନଗରର ବିଟଲ ଓରଫ କାହ୍ନା ପାତ୍ର(୨୩)। ମାମଲା ନଂ.୯୩ /୨୨ ରେ ଅଭିଯୁକ୍ତଙ୍କୁ ଶନିବାର ପୋଲିସ କୋର୍ଟ ଚାଲାଣ କରିଛି। ପୂର୍ବରୁ ଏହି ମାମଲାରେ ପୋଲିସ ଆଇନାବନ୍ଧ ସାହିର ପପୁ ସେଠୀ(୨୬) ଓ ଜିତୁ ଗୌଡ଼(୨୨)ଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସିସିଟିଭି ଫୁଟେଜରୁ ପୋଲିସ ଅଭିଯୁକ୍ତଙ୍କୁ ଚିହ୍ନଟ କରିଥିଲା ବୋଲି କହିଛି। ଚୋରି ହୋଇଥିବା ରୁପା ମୂର୍ତ୍ତି ପୋଲିସ ଜବତ କରିଛି। ସୂଚନା ଅନୁଯାୟୀ, ପୁରୁଣା ବ୍ରହ୍ମପୁର ମାଳୁଆଣି ମନ୍ଦିର ନିକଟରେ ରହୁଥିବା କେ. ନିର୍ମଳ ଆଚାରୀ ଗତ ଏପ୍ରିଲ ୨୯ରେ ଘର ତାଲା ବନ୍ଦ କରି ଏକ ଭୋଜିରେ ଯୋଗ ଦେବାକୁ ବାହାରକୁ ଯାଇଥିଲେ। ଏହାର ସୁଯୋଗ ନେଇ ଚୋରମାନେ ନିର୍ମଳଙ୍କ ଘରେ ପଶିଥିଲେ। ଘରେ ଥିବା ପିତ୍ତଳର ୨ଟି ହାତୀ ମୂର୍ତ୍ତି, ଗୋଟିଏ ଲକ୍ଷ୍ମୀ ମୂର୍ତ୍ତି ସହ କିଛି ପିତ୍ତଳ ସାମଗ୍ରୀ ସମେତ ୬ ହଜାର ଟଙ୍କା ଚୋରି କରିଥିଲେ। ଏ ନେଇ ନିର୍ମଳ ବଡ଼ବଜାର ଥାନାରେ ଅଭିଯୋଗ କରିଥିଲେ। ପୋଲିସ ନଂ ୯୩/୨୨ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରି
ଅଭିଯୁକ୍ତଙ୍କୁ ଗିରଫ କରିଥିବା କହିଛି।
