ଭୁବନେଶ୍ୱର,(ବ୍ୟୁରୋ),୯ା୫: ବିଭିନ୍ନ ଟେଲିକମ୍ କମ୍ପାନୀର ସିମ୍ କାର୍ଡକୁ ପ୍ରି-ଆକ୍ଟିଭେଟ୍ କରି ଉକ୍ତ ନମ୍ବରକୁ ସାଇବର ଠକଙ୍କୁ ଯୋଗାଣ ମାମଲାରେ କ୍ରାଇମବ୍ରାଞ୍ଚ ଖିଅ ଖୋଜିବାକୁ ଚେଷ୍ଟା ଜାରି ରଖିଛି। ଏହି ମାମଲାରେ ମାଷ୍ଟରମାଇଣ୍ଡ ଦୁଷ୍ମନ୍ତ କୁମାର ସାହୁଙ୍କ ସହ ସାଇ ପ୍ରକାଶ ଦାସ ଓ ଅବିନାଶ ନାୟକଙ୍କୁ କ୍ରାଇମବ୍ରାଞ୍ଚ ଏପ୍ରିଲ ୩୦ରେ ଗିରଫ କରି ମେ ୧ରେ କୋର୍ଟ ଚାଲାଣ କରିଥିଲା। ସେମାନଙ୍କୁ ବୁଧବାରଠାରୁ ଜେଲ୍ରୁ ୫ ଦିନିଆ ରିମାଣ୍ଡରେ ଆଣି ଜେରା କରାଯାଉଥିବାବେଳେ ସୋମବାର ରିମାଣ୍ଡ ଅବଧି ସରିବ। କ୍ରାଇମବ୍ରାଞ୍ଚ ଅଭିଯୁକ୍ତଙ୍କୁ ସୋମବାର ପୂର୍ବାହ୍ନ ୧୦ଟା ପୂର୍ବରୁ କଟକ ଜେଏମ୍ଏଫ୍ସି କୋର୍ଟରେ ହାଜର କରିବ। ତେବେ ଅଧିକ ତଦନ୍ତ ପାଇଁ ପୁନର୍ବାର ମାଷ୍ଟରମାଇଣ୍ଡ୍ ଦୁଷ୍ମନ୍ତଙ୍କୁ ରିମାଣ୍ଡରେ ଅଣାଯିବ ବୋଲି କ୍ରାଇମବ୍ରାଞ୍ଚର ଜଣେ ଅଧିକାରୀ କହିଛନ୍ତି।
ଅପରପକ୍ଷରେ ବିଭିନ୍ନ ଟେଲିକମ୍ କମ୍ପାନୀର କର୍ମଚାରୀଙ୍କୁ କ୍ରାଇମବ୍ରାଞ୍ଚ ମୁଖ୍ୟାଳୟରେ ଜେରା କରାଯାଉଛି। ସୋମବାର, ମଙ୍ଗଳବାର, ବୁଧବାର ବିଭିନ୍ନ ଟେଲିକମ୍ କମ୍ପାନୀର ଟେକ୍ନିକାଲ୍, କମର୍ସିଆଲ୍, ସେଲ୍ସର ସମସ୍ତ କର୍ମଚାରୀଙ୍କୁ ଟିମ୍ ହୋଇ ଆସିବାକୁ କୁହାଯାଇଛି। ସେମାନଙ୍କୁ ପଚରାଉଚରା କରି କିପରି ଏତେ ପରିମାଣର ଜାଲ୍ ସିମ୍ ପ୍ରସ୍ତୁତ କରାଯାଉଥିଲା ତାହା ଜାଣିବାକୁ କ୍ରାଇମବ୍ରାଞ୍ଚ ଖୋଳତାଡ଼ କରିବ। ସେପଟେ ମୁଖ୍ୟ ଅଭିଯୁକ୍ତ ଦୁଷ୍ମନ୍ତଙ୍କ ୨ଟି ବ୍ୟାଙ୍କ ଆକାଉଣ୍ଟ ଓ ୨ଟି ପେଟିଏମ୍ ଆକାଉଣ୍ଟଙ୍କୁ ଅଚଳ କରାଯାଇଛି। ହେଲେ ସେ ଅନ୍ୟ ବ୍ୟାଙ୍କ ଆକାଉଣ୍ଟରେ ଟଙ୍କା ଜମା ରଖିଥିବା କ୍ରାଇମବ୍ରାଞ୍ଚକୁ ସୂଚନା ମିଳିଛି। ତେଣୁ ପୁଣିଥରେ ଦୁଷ୍ମନ୍ତଙ୍କୁ ରିମାଣ୍ଡରେ ଆଣି ଅର୍ଥ କାରବାର ଉପରେ ଅଧିକ ତଥ୍ୟ ହାସଲ କରିବାକୁ ଲକ୍ଷ୍ୟ ରଖିଛି କ୍ରାଇମବ୍ରାଞ୍ଚ।