ନୂଆଦିଲ୍ଲୀ,୭।୧୨: ଅଷ୍ଟ୍ରେଲିଆ ବିପକ୍ଷ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜକୁ ଭାରତ ୨-୦ ବ୍ୟବଧାନରେ ଆଗୁଆ ଜିତିନେଇଛି। ରବିବାର ଖେଳାଯାଇଥିବା ଦ୍ୱିତୀୟ ମ୍ୟାଚ୍ରେ ଅନେକ ଖେଳାଳି ନିଜର ପ୍ରତିଭା ଦେଖାଇଥିଲେ। ହେଲେ ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚଙ୍କ ଅନୁପସ୍ଥିତିରେ ଏଭଳି ଏକ ଘଟଣା ଘଟିଥିଲା, ଯାହା ଏବେ ଚର୍ଚ୍ଚାର ବିଷୟ ପାଲଟିଛି। ଫିଞ୍ଚଙ୍କ ସ୍ଥାନରେ ଦଳର ନେତୃତ୍ୱ ସମ୍ଭାଳିଥିବା ମାଥ୍ୟୁ ଓ୍ବେଡ୍ ପୂର୍ବ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ମନେ ପକାଇଥିଲେ। ମ୍ୟାଚ୍ ଚାଲିଥିବା ସମୟରେ ସେ ମାହିଙ୍କ ନାଁ ନେଇଥିଲେ। ଏହା ଶୁଣି ଶିଖର ଧଓ୍ବନ ଏବଂ ଘୋଷକମାନେ ହସିବାକୁ ଲାଗିଥିଲେ।
ଘଟଣାଟି ଏଭଳି। ଭାରତୀୟ ପାଳିର ୯ମ ଓଭରରେ ବୋଲିଂ କରିବାକୁ ଅଷ୍ଟ୍ରେଲିଆ ସ୍ପିନର ମାଇକେଲ ସ୍ପିପ୍ସନ ଆସିଥିଲେ। ସେ ଏକ ଓ୍ବାଇଡ୍ ବଲ୍ ପକାଇଥିଲେ। ଧଓ୍ବନ ଏହାକୁ ଖେଳିବାକୁ ଚାହୁଁଥିଲେ ହେଲେ ପାରି ନ ଥିଲେ। ସେହି ସମୟରେ ଉଇକେଟ କିପର ଥିବା ମାଥ୍ୟୁ ବଲ୍କୁ ଧରି ଷ୍ଟମ୍ପ୍ରେ ଲଗାଇଥିଲେ। ଏହି ନିଷ୍ପତ୍ତି ତୃତୀୟ ଅମ୍ପାୟାରଙ୍କ ପାଖକୁ ଯାଇଥିଲା। ଶେଷରେ ଧଓ୍ବନ୍ ଅଳ୍ପକେ ବର୍ତ୍ତିଥିବା ଜଣାପଡ଼ିଥିଲା। ତେବେ ଠିକ୍ ଏହି ଭାବେ ଧୋନୀ ୨୦୧୬ ଟି୨୦ ବିଶ୍ୱକପ୍ରେ ବାଂଲାଦେଶର ଶବ୍ବିର ଅହମ୍ମଦଙ୍କୁ ଷ୍ଟମ୍ପ ଆଉଟ କରିଥିଲେ। ହେଲେ ଓ୍ବେଡ୍ ସେଭଳି ଚମତ୍କାର କରିପାରି ନ ଥିଲେ। ଥାର୍ଡ ଅମ୍ପାୟାର ନିର୍ଣ୍ଣୟ ଶୁଣାଇବା ମାତ୍ରେ ତାଙ୍କ ମୁହଁରୁ ଧୋନୀଙ୍କ ନାଁ ବାହାରିଥିଲା। ସେ କହିଥିଲେ, ମୁଁ ଧୋନୀ ନୁହେଁ। ଧୋନୀଙ୍କ ଭଳି ଦ୍ରୁତ ନୁହେଁ। ଏହା ପରେ ସେ ଓ ଧଓ୍ବନ୍ ହସିବାକୁ ଲାଗିଥିଲେ। ସେମାନଙ୍କୁ ଦେଖି ଘୋଷକ ମଧ୍ୟ ହସିଥିଲେ। ଏବେ ଘଟଣା ସମ୍ପର୍କିତ ଏକ ଭିଡିଓ ବେଶ୍ ଭାଇରାଲ ହେବାରେ ଲାଗିଛି।