ନୂଆଦିଲ୍ଲୀ, ୧୨।୦୭: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମୋଦିଙ୍କ ୩.୦ ସରକାରର ପ୍ରଥମ ବଜେଟ୍ ଉପସ୍ଥାପନ କରିବାକୁ ଯାଉଛନ୍ତି । ଜୁଲାଇ ୨୩ ତାରିଖରେ ସଂସଦରେ ଏହି ବଜେଟ୍ ଉପସ୍ଥାପନ ହେବ । ଏହାରି ମଧ୍ୟରେ ବଜେଟ୍ରେ କୃଷକଙ୍କ ପାଇଁ ଏକ ବଡ଼ ଘୋଷଣା ହେବା ନେଇ ଆନୁମାନ କରାଯାଉଛି । ବିଜନେସ୍ ଟୁଡେର ସରକାରୀ ସୁତ୍ରରୁ ଜଣାପଡ଼ିଛି ଯେ, କେନ୍ଦ୍ର ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନା ପାଇଁ ବଜେଟ୍ରେ ହେଉଥିବା ଆବଣ୍ଟନ ୩୦ ପ୍ରତିଶତ ବୃଦ୍ଧି କରି ୮୦ ହଜାର କୋଟି କରିବା ନେଇ ସମ୍ଭାବନା ରହିଛି ।
ସରକାର ଅନ୍ତରୀଣ ବଜେଟ୍ରେ ପିଏମ୍ କିଷାନ ସମ୍ମାନ ନିଧି ପାଇଁ ଆବଣ୍ଟନ ୬୦ ହଜାର କୋଟି ନିର୍ଦ୍ଧାରଣ କରିଥିଲେ । ଯେଉଁଥିରେ ପ୍ରତି କୃଷକଙ୍କୁ ବାର୍ଷିକ ୬ ହଜାର ଟଙ୍କା ସହାୟତା ମିଳୁଛି । ଜୁନ୍ର ଶେଷ ସପ୍ତାହରେ ଆୟୋଜିତ ବଜେଟ୍ ପୂର୍ବ ପରାମର୍ଶ ବୈଠକ ସମୟରେ କୃଷି ପ୍ରତିନିଧିମାନେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଏହି ପରିମାଣରେ ବୃଦ୍ଧି କରିବାକୁ ଦାବି କରିଥିବା କୁହାଯାଉଛି । ଯଦି ଏହାକୁ ଅନୁମୋଦନ ମିଳେ ତେବେ ଏହି ସହାୟତା ରାଶି ୬ ହଜାରରୁ ବୃଦ୍ଧି ପାଇ ୮ ହଜାର ହେବ ।