ଲକ୍ଷ୍ନୌ,୧ ।୧୧: ଉତ୍ତର ପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ବେଳକୁ ବେଳ ରାଜନୀତି ହେଉଛି ସରଗରମ । ବହୁଜନ ସମାଜ ପାର୍ଟି ସୁପ୍ରିମୋ ଶୁଶ୍ରୀ ମାୟାବତୀ ଏବେ ସମାଜବାଦୀ ପାର୍ଟି ଓ ଭାରତୀୟ ଜନତା ପାର୍ଟି(ଭାଜପା)କୁ ଟାର୍ଗେଟ କରିଛନ୍ତି । ସେ କହିଛନ୍ତି ସମାଜବାଦୀ ପାର୍ଟି ଓ ଭାଜପା ଉତ୍ତର ପ୍ରଦେଶର ନିର୍ବାଚନ ପରିବେଶକୁ ଖରାପ କରିବାରେ ଲାଗିଛନ୍ତି । ସେ କହିଛନ୍ତି ଉଭୟ ଦଳ ପରସ୍ପର ମଧ୍ୟରେ ଜାତିବାଦ ଓ ସାଂପ୍ରଦାୟିକ ଟିପ୍ପଣିକୁ ନେଇ ପରିବେଶକୁ ଖରାପ କରିବାକୁ ଚେଷ୍ଟା କରୁଛନ୍ତି । ମାୟାବତୀ ଟୁଇଟ୍ କରି କହିଛନ୍ତି ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଗୋଟିଏ ଦିନ ପୂର୍ବରୁ ଜିନ୍ନାଙ୍କୁ ନେଇ ହରଦୋଇରେ ଦେଇଥିବା ବୟାନକୁ ନେଇ ସୋମବାର ଭାଜପା ତା’ର ପ୍ରତିକ୍ରିୟା ରଖିଲା । ଏହା ଉଭୟ ଦଳର ଭିତିରି କଥା ଭଳି ମନେହେଉଥିବା ବେଳେ ଏହା ଉଭୟ ଦଳର ବୁଝା ସୁଝା ରଣନୀତିର ଏକ ଅଂଶ ବୋଲି ମାୟାବତୀ କହିଛନ୍ତି । ଏହାକୁ ଆଧାର କରି ଏମାନେ ବିଧାନସଭାର ନିର୍ବାଚନ ପରିବେଶକୁ ଯେ କୌଣସି ମତେ ହିନ୍ଦୁ-ମୁସଲମାନ କରି ଖରାପ କରିବାକୁ ଚେଷ୍ଟା କରୁଥିବା ସେ ଅଭିଯୋଗ କରିଛନ୍ତି ।