ନୂଆଦିଲ୍ଲୀ,୧।୫ : ଟ୍ରେଣ୍ଟ ବୋଲ୍ଟ ଓ ଯଶପ୍ରୀତ ବୁମରାଙ୍କ ଭଳି ଘାତକ ବୋଲରଙ୍କୁ ମଧ୍ୟ କ୍ଷମାଦେଲେ ନାହିଁ। ମୁମ୍ବାଇ ଇଣ୍ଡିଆନ୍ସ ସବୁ ବୋଲରଙ୍କୁ ମନ ଦେଇ ଧୋଇଲେ ସିଏସ୍କେ ବ୍ୟାଟ୍ସମ୍ୟାନମାନେ। ଆରମ୍ଭରୁ ଫାଫ ଡୁ’ ପ୍ଲେସି ଓ ମୋଇନ ଅଲି। ଶେଷ ଆଡ଼କୁ ଅମ୍ବାତି ରାୟୁଡୁ। ଛକା ଓ ଚୌକା ବର୍ଷା ଯୋଗୁ ମୁମ୍ବାଇ ଆଗରେ ୨୧୯ ରନ୍ର ବିଶାଳ ବିଜୟ ଲକ୍ଷ୍ୟ ଛିଡ଼ା କରିଛି ଚେନ୍ନାଇ ସୁପର କିଙ୍ଗ୍ସ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ସିଏସ୍କେ ପ୍ରଥମ ଓଭରରେ ହରାଇଥିଲା ଇନ ଫର୍ମ ଓପନର ରୁତୁରାଜ ଗାଏକ୍ୱାଡ (୪)ଙ୍କୁ। ତା’ ପରେ ଛକାର ବର୍ଷା ଆରମ୍ଭ କରିଥିଲେ ଡୁ’ ପ୍ଲେସି ଓ ମୋଇନଙ୍କ ଯୋଡ଼ି। ଦୁହେଁ ୬୦ ବଲରେ ଯୋଡ଼ିଥିଲେ ୧୦୮ ରନ୍। ଫାଫ୍ ୨୮ ବଲରେ ୫୦ (୨ ଚୌକା ଓ ୪ ଛକା) ଓ ମୋଇନ ଅଲି ୩୬ ବଲରେ ୫୮ (୫ ଲେଖାଏ ଚୌକା ଓ ଛକା)। ଦୁଇ ଓଭର ଭିତରେ ସିଏସ୍କେ ହରାଇଥିଲା ୩ ଉଇକେଟ। ମୁମ୍ବାଇ ହାତରେ ଥିଲା ମ୍ୟାଚ୍କୁ ଫେରିବାର ସୁଯୋଗ। କିନ୍ତୁ ମୁମ୍ବାଇର କୌଣସି ବୋଲରଙ୍କୁ କ୍ଷମାଦେଇ ନ ଥିଲେ ରାୟୁଡୁ। ୨୭ ବଲରେ ୪ ଚୌକା ଓ ୭ ଛକା ସହାୟତାରେ ଖେଳିଥିଲେ ବିସ୍ଫୋରକ ୭୨* ରନ୍ର ପାଳି। ରବୀନ୍ଦ୍ର ଜାଡେଜା ୨୨ ରନ୍ କରିଥିଲେ। ଫଳରେ ସିଏସ୍କେ ୪ ଉଇକେଟ ହରାଇ ୨୧୮ ରନ୍ କରିଥିଲା। ଚେନ୍ନାଇ ଇନିଂସରେ ସାମିଲ ଥିଲା ୧୬ଟି ଛକା।
