ସିଡ୍ନୀ,୬।୫(ପି.ଟି.): ଅଷ୍ଟ୍ରେଲିଆ ପୂର୍ବତନ ଲେଗ୍ ସ୍ପିନର ଷ୍ଟୁଆର୍ଟ ମ୍ୟାକ୍ଗିଲ ସିଡ୍ନୀସ୍ଥିତ ତାଙ୍କ ଘରୁ ଅପହରଣ ହୋଇଥିଲେ ଓ ପରେ ତାଙ୍କୁ ଛାଡି ଦିଆଯାଇଥିଲା ବୋଲି ନ୍ୟୁ ସାଉଥ୍ଓ୍ବେଲ୍ସ ପୋଲିସ ସୂଚନା ଦେଇଛି। ଗତ ମାସରେ ଏହି ଘଟଣା ଘଟିଥିଲା। ତାଙ୍କୁ କେତେଘଣ୍ଟା ଅଟକ ରଖିବା ପରେ ଛାଡି ଦିଆଯାଇଥିଲା ବୋଲି ପୋଲିସ କହିଛି। ଏହି ମାମଲାରେ ୪ଜଣଙ୍କୁ ଅଟକ ରଖାଯାଇ ପଚରାଉଚରା କରାଯାଉଛି।
ଏପ୍ରିଲ ୧୪ରେ ମ୍ୟାକ୍ଗିଲଙ୍କୁ କାରରେ ଅପହରଣ କରାଯାଇ ଏକ ନିଛାଟଆ ସ୍ଥାନକୁ ନିଆଯାଇଥିଲା। ସେଠାରେ ତାଙ୍କୁ ବନ୍ଧୁକ ଦେଖାଇ ଆକ୍ରମଣ କରାଯାଇଥିଲା। ଗୋଟିଏ ଘଣ୍ଟା ଅଟକ ରହିଥିଲେ ମଧ୍ୟ ମ୍ୟାକ୍ଗିଲ ଭୟଭୀତ ଥିଲେ ବୋଲି ନ୍ୟୁ ସାଉଥ ଓ୍ବେଲ୍ସ ପୋଲିସ ସୁପରିଣ୍ଟେଣ୍ଡେଣ୍ଟ ଆନ୍ଥୋନୀ ହୋଲଟନ କହିଛନ୍ତି। ତେବେ ଏପ୍ରିଲ ୨୦ ତାରିଖରେ ଏ ସମ୍ପର୍କରେ ଆମକୁ ସୂଚନା ଦିଆଯାଇଥିଲା ବୋଲି ପୋଲିସ କହିଛି। ଅର୍ଥ ପାଇଁ ଏହି ଅପହରଣ ରଚା ଯାଇଥିଲା। ତେବେ ଅପହରଣକାରୀଙ୍କୁ କୌଣସି ଅର୍ଥ ପ୍ରଦାନ କରାଯାଇ ନାହିଁ ବୋଲି ପୋଲିସ ସ୍ପଷ୍ଟ କରିଛି।
ମ୍ୟାକ୍ଗିଲ ୧୯୮୮ ଓ ୨୦୦୮ ମଧ୍ୟରେ ୪୪ଟି ଟେଷ୍ଟ ଖେଳି ୨୦୮ଟି ଉଇକେଟ ହାସଲ କରିଥିଲେ। ୫୦ ବର୍ଷୀୟ ମ୍ୟାକ୍ଗିଲ୍ ୨୦୦୮ରେ କ୍ରିକେଟରୁ ଅବସର ଘୋଷଣା କରିଥିଲେ।