ଦିନିକିଆ କ୍ରିକେଟ ପୁରୁଷ ବିଶ୍ୱକପ୍ର ତ୍ରୟୋଦଶ ସଂସ୍କରଣକୁ ଆଉ ମାତ୍ର ୭ ଦିନ ବାକି ରହିଛି। ବିଶ୍ୱର ଶ୍ରେଷ୍ଠ ଦଳକୁ ନେଇ ଭାରତର ୧୦ଟି ଭେନ୍ୟୁରେ ଆରମ୍ଭ ହେବ ଏହି ମହାକୁମ୍ଭ। ବିଶ୍ୱକପ୍ର ୧୨ ସଂସ୍କରଣରେ ସର୍ବାଧିକ ଉଇକେଟ ନେଇଥିବା ବୋଲରଙ୍କ ସମ୍ପର୍କରେ ଆଜିର ପ୍ରସ୍ତୁତି…
ଗ୍ଲେନ୍ ମ୍ୟାକ୍ଗ୍ରା: ୧୯୯୬-୨୦୦୭
ଅଷ୍ଟ୍ରେଲିଆର ଏହି ସ୍ପିଡ୍ଷ୍ଟର ନିଜ ଚମତ୍କାର ସୁଇଙ୍ଗ ବୋଲିଂ ସହିତ ଉଇକେଟ ହାସଲକାରୀ କ୍ଷମତା ପାଇଁ ପ୍ରସିଦ୍ଧ। ବିଶ୍ୱକପ୍ର ୪ଟି ସଂସ୍କରଣରେ ସେ ଅଷ୍ଟ୍ରେଲିଆ ପାଇଁ ଖେଳିଛନ୍ତି। ଏହା ମଧ୍ୟରେ ୩୯ ମ୍ୟାଚ୍ ଖେଳି ସେ ନେଇଛନ୍ତି ୭୧ ଉଇକେଟ। ୭/୧୫ର ଶ୍ରେଷ୍ଠ ବୋଲିଂ ଫିଗର ସହିତ ସେ ୪୨ ମେଡେନ ଓଭର ମଧ୍ୟ ବୋଲିଂ କରିଛନ୍ତି।
ମୁଥେୟା ମୁରଲୀଧରନ:୧୯୯୬-୨୦୧୧
ଶ୍ରୀଲଙ୍କାର ଏହି ସ୍ପିନ୍ ଯାଦୁକର ୫ଟି ସଂସ୍କରଣର ବିଶ୍ୱକପ୍ ଖେଳି ୬୮ ଉଇକେଟ ନେଇଛନ୍ତି। ପଦାର୍ପଣରେ ୧୯୯୬ ବିଶ୍ୱକପ ବିଜୟୀ ଦଳର ସଦସ୍ୟ ରହିଥିବା ମୁରଲୀଧରନ ୪୦ ମ୍ୟାଚ୍ ଖେଳିଛନ୍ତି। ୪/୧୯ ତାଙ୍କର ଶ୍ରେଷ୍ଠ ବୋଲିଂ ଫିଗର ରହିଥିବା ବେଳେ ସେ ୧୫ ମେଡେନ ଓଭର ବୋଲିଂ କରିଛନ୍ତି।
ଲସିଥ୍ ମାଲିଙ୍ଗା: ୨୦୦୭-୨୦୧୯
ଶ୍ରୀଲଙ୍କା ପାଇଁ ୩ଟି ବିଶ୍ୱକପ୍ ଖେଳିଥିବା ମାଲିଙ୍ଗା ୫୬ ଉଇକେଟ ସହିତ ସର୍ବାଧିକ ଉଇକେଟ ହାସଲକାରୀଙ୍କ ମଧ୍ୟରେ ତୃତୀୟ ସ୍ଥାନରେ ରହିଛନ୍ତି। ଦୁଇଟି ସଂସ୍କରଣର ଫାଇନାଲ ଖେଳିଥିବା ମାଲିଙ୍ଗା ମାତ୍ର ୨୮ ମ୍ୟାଚରୁ ଏହି ସଫଳତା ହାସଲ କରିଛନ୍ତି। ୬/୩୮ର ଶ୍ରେଷ୍ଠ ବୋଲିଂ ଫିଗର ସହିତ ସେ ୧୧ଟି ମେଡେନ୍ ଓଭର ବୋଲିଂ କରିଛନ୍ତି।
ଓ୍ବାସିମ୍ ଆକ୍ରମ: ୧୯୮୭-୨୦୦୩
ପାକିସ୍ତାନର କିମ୍ବଦନ୍ତୀ ପେସ୍ ବୋଲର ଓ୍ବାସିମ୍ ଆକ୍ରମ ୫୫ ଉଇକେଟ ସହ ଏହି ତାଲିକାର ୪ର୍ଥ ସ୍ଥାନରେ ରହିଛନ୍ତି। ପାକିସ୍ତାନ ପକ୍ଷରୁ ୫ଟି ସଂସ୍କରଣ ବିଶ୍ୱକପ୍ ଖେଳିଥିବା ଆକ୍ରମ ୩୮ ମ୍ୟାଚରୁ ୫୫ ଉଇକେଟ ନେଇଛନ୍ତି। ଏହା ମଧ୍ୟରେ ୧୬ ମେଡେନ ଓଭର ବୋଲିଂ କରିଥିବା ବେଳେ ୫/୨୮ ତାଙ୍କର ଶ୍ରେଷ୍ଠ ବୋଲିଂ ଫିଗର ରହିଛି।
ମିଚେଲ ଷ୍ଟାର୍କ: ୨୦୧୫-ଜାରି ରହିଛି
ଅଷ୍ଟ୍ରେଲିଆର ଦ୍ରୁତ ବୋଲର ମିଚେଲ୍ ଷ୍ଟାର୍କ ୧୮ ମ୍ୟାଚ୍ରୁ ୪୯ ଉଇକେଟ ନେଇ ଏହି ତାଲିକାର ପଞ୍ଚମ ସ୍ଥାନରେ ରହିଛନ୍ତି। ଚଳିତ ବିଶ୍ୱକପ୍ରେ ସେ ଆକ୍ରମ ଓ ମାଲିଙ୍ଗାଙ୍କୁ ଅତିକ୍ରମ କରିବାର ସମ୍ଭାବନା ରହିଛି। ୨୦୧୫ ଓ ୨୦୧୯ ବିଶ୍ୱକପ୍ରେ ସର୍ବାଧିକ ଉଇକେଟ ହାସଲକାରୀ ବୋଲର ରହିଥିବା ଷ୍ଟାର୍କ ୮ ମେଡେନ୍ ଓଭର ପକାଇଥିବା ବେଳେ ୬/୨୮ ତାଙ୍କର ଶ୍ରେଷ୍ଠ ବୋଲିଂ ଫିଗର ରହିଛି।
ବି.ଦ୍ର: ଭାରତୀୟ ବୋଲରଙ୍କ ମଧ୍ୟରେ ଜାହିର ଖାନ୍ ଓ ଜାଭାଗଲ ଶ୍ରୀନାଥ ୪୪ଟି ଲେଖାଏ ଉଇକେଟ ଅକ୍ତିଆର କରିଛନ୍ତି। ମହମ୍ମଦ ଶାମି ଓ ଅନିଲ କୁମ୍ବଲେ ୩୧ଟି ଲେଖାଏ ଉଇକେଟ ନେଇଥିବା ବେଳେ ପ୍ରଥମ ବିଶ୍ୱକପ୍ ବିଜୟୀ ଅଧିନାୟକ କପିଳ ଦେବ ୨୮ ଉଇକେଟ ନେଇଛନ୍ତି।