ସୁନ୍ଦରଗଡ଼/ହେମଗିରି,୧୧।୪(ଡି.ଏନ୍.ଏ.): ସୁନ୍ଦରଗଡ଼ ଜିଲା ହେମଗିର ବ୍ଲକ ମହାନଦୀ କୋଇଲା ଖଣି ଲିମିଟେଡ଼(ଏମସିଏଲ)ର ଗର୍ଜନବାହାଲ କୋଇଲା ଖଣିରେ ମଙ୍ଗଳବାର ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଦୁର୍ଘଟଣାରେ ୨ କର୍ମଚାରୀଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୪ଜଣ କର୍ମଚାରୀ ଆହତ ହୋଇଛନ୍ତି।
ଖଣି ଭିତରେ କୋଇଲା ଖନନ କାର୍ଯ୍ୟରେ ନିୟୋଜିତ ହୋଲପେକ ମେଶିିନ ଏକ ବୋଲେରୋ ଗାଡ଼ିକୁ ଧକ୍କା ଦେବା ଫଳରେ ଗାଡ଼ିଟି ପ୍ରାୟ ୧୫ ଫୁଟ ଖଣି ତଳକୁ ଖସି ପଡ଼ିଥିଲା। ତୁରନ୍ତ ବୋଲେରୋରେ ଥିବା ୬ ଜଣଙ୍କୁ ଉଦ୍ଧାର କରାଯାଇ ୪୦ କି.ମି. ଦୂର ପଡ଼ୋଶୀ ଛତିଶଗଡ଼ ରାଜ୍ୟ ରାୟଗଡ଼ ଜିନ୍ଦଲ ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତର ୨ ଜଣଙ୍କୁ ମୃତ ଘୋଷଣା କରିଥିଲେ। ଅନ୍ୟ ୪ଜଣଙ୍କୁ ସେଠାରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ମୃତକ ହେଲେ ଏମ୍ସିଏଲର ସିଫ୍ଟ ଇନ୍ଚାର୍ଜ ଜଗଦୀଶ ଓରାମ ଓ ଉମାକାନ୍ତ ପଟେଲ।
ମିଳିଥିବା ସୂଚନା ମୁତାବକ, ଏକ ବୋଲେରୋ ଗାଡ଼ିରେ ୬ଜଣ କର୍ମଚାରୀ ଗର୍ଜନବାହାଲ କୋଇଲା ଖଣିକୁ କାମ କରିବାକୁ ଯାଉଥିବା ବେଳେ ଏକ ହୋଲପେକ ମେଶିିନ ଧକ୍କା ଦେଇଥିଲା। ଫଳରେ ବୋଲେରୋଟି କ୍ଷତିଗ୍ରସ୍ତ ହେବା ସହିତ ଖଣି ଭିତରେ ଖସି ପଡିଥିଲା। ଖବର ପାଇ ପୋଲିସ ଓ ଏମ୍ସିଏଲ ବସୁନ୍ଧରାକ୍ଷେତ୍ରର ଅଧିକାରୀ ଘଟଣା ସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ପ୍ରଥମେ ବସୁନ୍ଧରା ଡାକ୍ତରଖାନା ଓ ପରେ ଛତିଶଗଡ଼ସ୍ଥିତ ଜିନ୍ଦଲ ହସ୍ପିଟାଲ ପଠାଇଥିଲେ। ଅନ୍ୟପକ୍ଷେ ଖଣିରେ ଉତ୍ତୋଳନ ଓ ପରିବହନ କାମ ବନ୍ଦ ରହିଛି। ଦୁର୍ଘଟଣାକୁ ନେଇ ଉତ୍ତେଜନା ପ୍ରକାଶ ପାଇଛି। ଏପରିକି ଖଣି କର୍ମଚାରୀମାନେ ଆନ୍ଦୋଳନକୁ ଓହ୍ଲାଇଛନ୍ତି।