ନୂଆଦିଲ୍ଲୀ,୪।୧୦: ରାଷ୍ଟ୍ରିୟ ଜନତା ଦଳ (ଆରଜେଡି)ର ରାଜ୍ୟ ସଭା ଏମ୍ପି ମନୋଜ ଝାଙ୍କ ପାକିସ୍ତାନ ଗସ୍ତକୁ କେନ୍ଦ୍ର ସରକାର ଅନୁମତି ଦେବାକୁ ମନା କରି ଦେଇଛନ୍ତି। ମନୋଜ ଚଳିତ ମାସରେ ଅଟାରୀ-ୱାଘା ସୀମା ଦେଇ ଲାହୋର ଯିବାକୁ ଚାହୁଁଥିଲେ। ସେଠାରେ ସେ ମାନବାଧିକାର କର୍ମୀ ଆସମା ଜାହଙ୍ଗୀରଙ୍କ ସ୍ମୃତିରେ ଆୟୋଜିତ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ ଯାଇଥାନ୍ତେ। କିନ୍ତୁ ତାଙ୍କ ଗସ୍ତକୁ କେନ୍ଦ୍ର ଅନୁମୋଦନ କରି ନ ଥିଲା। ଏଭଳି ପରିସ୍ଥିତିରେ ତାଙ୍କର ପ୍ରସ୍ତାବିତ ପାକ ଗସ୍ତକୁ ବାତିଲ କରାଯାଇଛି। ମନୋଜ ନିଜେ ଏହା ନିଶ୍ଚିତ କରିଛନ୍ତି।
ମନୋଜ କହିଛନ୍ତି, ପାକିସ୍ତାନ ଗସ୍ତକୁ କେନ୍ଦ୍ର ସରକାର ରାଜନୈତିକ ଅନୁମୋଦନ ଦେବାକୁ ମନା କରି ଦେଇଛନ୍ତି। ୨୩ ଅକ୍ଟୋବରରେ ଲାହୋରରେ ଆସମା ଜାହାଙ୍ଗୀରଙ୍କ ସ୍ମୃତିରେ ଆୟୋଜିତ ଏକ କାର୍ଯ୍ୟକ୍ରମରେ ସେ ‘ଗଣତାନ୍ତ୍ରିକ ଅଧିକାରର ରକ୍ଷା କ୍ଷେତ୍ରରେ ରାଜନୈତିକ ଦଳର ଭୂମିକା’ ପ୍ରସଙ୍ଗରେ ସମ୍ବୋଧନ ପାଇଁ ଯିବାର ଥିଲା। ଏହି ଗସ୍ତ ତାଙ୍କୁ ଗଣତାନ୍ତ୍ରିକ ଅଧିକାର ପାଇଁ ସଂଗ୍ରାମରେ ଭାରତୀୟ ରାଜନୈତିକ ଦଳର ମହାନ ପରମ୍ପରାକୁ ସୂଚାଇବାର ସୁଯୋଗ ଦେଇଥାନ୍ତା। ଆସମା ଜାହଙ୍ଗୀର ପାକିସ୍ତାନରେ ସଂଖ୍ୟାଲଘୁଙ୍କ ଅଧିକାର ପାଇଁ ଲଢୁୁଥିବା ଜଣେ କାର୍ଯ୍ୟକର୍ତ୍ତା ଥିଲେ। ୨୦୧୮ରେ ତାଙ୍କର ଦେହାନ୍ତ ହୋଇଥିଲା।
ପାକିସ୍ତାନ ଗସ୍ତ ପାଇଁ ଗୃହ ମନ୍ତ୍ରଣାଳୟରୁ ମନୋଜଙ୍କୁ ଅନୁମୋଦନ ମିଳିଥିଲା, କିନ୍ତୁ ବୈଦେଶିକ ବ୍ୟାପାର ମନ୍ତ୍ରଣାଳୟ ତାଙ୍କୁ ରାଜନୈତିକ ଅନୁମୋଦନ ଦେଇ ନାହିଁ।