କୋଲକାତା,୧୫।୨: ଆଗକୁ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ହେବାକୁ ଯାଉଛି। ଭାଜପା ପକ୍ଷରୁ ରାଜ୍ୟରୁ ତୃଣମୂଳ କଂଗ୍ରେସର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସରକାରଙ୍କୁ ହଟାଇବା ପାଇଁ ବିଭିନ୍ନ ଯୋଜନା ପ୍ରସ୍ତୁତ କରାଯାଇଛି। ଫେବୃୟାରୀ ୧୮ରେ ରାଜ୍ୟର ୧,୨୬୩ ମଣ୍ଡଳରେ ଭାଜପାର କୃଷକ ମୋର୍ଚ୍ଚା ପକ୍ଷରୁ ଚାଷୀଙ୍କ ଘରେ ଭୋଜନ ଅଭିଯାନ ଆରମ୍ଭ କରାଯିବ। ଏହି ନିର୍ବାଚନୀ ଥୋପ ଦ୍ୱାରା ରାଜ୍ୟର ଚାଷୀମାନଙ୍କ ଭୋଟ ହାତେଇବା ପାଇଁ ଭାଜପା ଉଦ୍ୟମ କରୁଥିବା ରାଜନୈତିକ ମହଲରେ ଚର୍ଚ୍ଚା ହେଉଛି। ଇତିମଧ୍ୟରେ ରାଜ୍ୟର ୪୮,୭୫୧ ଗାଁ ମଧ୍ୟରୁ ୪୦,୦୦୦ ଗାଁରେ କୃଷକ ସୁରକ୍ଷା ଅଭିଯାନ କାର୍ଯ୍ୟକାରୀ ହୋଇ ସାରିଛି। ରାଜ୍ୟର ୭୦ ଲକ୍ଷ ଚାଷୀଙ୍କୁ ସରକାରୀ ସୁବିଧା ସୁଯୋଗ ଯୋଗାଇ ଦେବା ପାଇଁ ଭାଜପା ପକ୍ଷରୁ ପ୍ରୟାସ ଜାରି ରହିଥିବା କୃଷକ ମୋର୍ଚ୍ଚା ସଭାପତି ମହାଦେବ ସରକାର କହିଛନ୍ତି। କୃଷକ ସୁରକ୍ଷା ଅଭିଯାନ ଅନ୍ତର୍ଗତ ରାଜ୍ୟର ୨୫ ଲକ୍ଷ ଚାଷୀଙ୍କ ନିକଟରେ ପହଞ୍ଚିବା ଲକ୍ଷ୍ୟ ନେଇ ମୋର୍ଚ୍ଚା କାର୍ଯ୍ୟ କରୁଛି। ଏହି ଅଭିଯାନରେ ୩,୩ ୫୪ ଗ୍ରାମ ପଞ୍ଚାୟତର ୭ ହଜାରରୁ ଅଧିକ ଚାଷୀଙ୍କ ଘରେ ଭୋଜନ କରାଯିବ ବୋଲି ସେ କହିଛନ୍ତି। ଏହା ସହିତ ଚାଷୀ ପରିବାରରୁ ଏକ ମୁଠା ଚାଉଳ ସଂଗ୍ରହ ମଧ୍ୟ ଜାରି ରହିବ।
