କୋରାପୁଟ,୧୮।୩(ସ୍ବ.ପ୍ର.): ଚଳିତ ବର୍ଷ ଆନ୍ତର୍ଜାତୀକ ମାଣ୍ଡିଆ ବର୍ଷ ପାଳନ ନେଇ ରାଜ୍ୟ ମିଲେଟ ମିଶନ ପକ୍ଷରୁ କୋରାପୁଟ ଜିଲା ପ୍ରଶାସନର ସହଯୋଗରେ ବିଭିନ୍ନ ସଚେତନତା କାର୍ଯ୍ୟକ୍ରମ କରିବା ନେଇ ଏକ ପ୍ରସ୍ତୁତି ବୈଠକ ଶୁକ୍ରବାର ସ୍ଥାନୀୟ ସଦ୍ଭାବନା ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଛି। କୋରାପୁଟ ଅତିରିକ୍ତ ଜିଲାପାଳ ରାଜେନ୍ଦ୍ର ମାଝିଙ୍କ ଅଧକ୍ଷତାରେ ଆୟୋଜିତ ବୈଠକରେ କୋରାପୁଟ ଜିଲା ମୁଖ୍ୟ କୃଷି ଅଧିକାରୀ ବିଶ୍ୱରାଜ ରଥ, ରାଜ୍ୟ ମିଲେଟ ମିଶନର ପ୍ରତିନିଧି ଦିବ୍ୟଶ୍ରୀ ଟପୋ, କୋରାପୁଟ ମିଲେଟ ମିଶନର ଶିବଶଙ୍କର ସେଠୀ, ଜିଲାର ବିଭିନ୍ନ ପଞ୍ଚାୟତର ଲୋକ ପ୍ରତିନିଧି, ଜିଲା ସ୍ବାସ୍ଥ୍ୟ, ଶିକ୍ଷା, ପରିମଳ, ଶିଶୁ ବିକାଶ ଆଦି ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ଥିଲେ।
ଡିସେମ୍ବର ଶେଷ ସୁଦ୍ଧା ଜିଲାରେ ବିଭିନ୍ନ ଚିତ୍ରକଳା ଓ କୁଇଜ ଆଦି ପ୍ରତିଯୋଗୀତାରେ ସମସ୍ତ ବିଦ୍ୟାଳୟ, କଲେଜ ଛାତ୍ରୀଛାତ୍ରଙ୍କୁ ସାମିଲ କରି ମାଣ୍ଡିଆର ବ୍ୟବହାର କରିବାକୁ ସଚେତନତା କରିବା ନେଇ ଗୁରୁତ୍ୱରୋପ କରାଯାଇଛି। ଏହାଦ୍ୱାରା ମାଣ୍ଡିଆ ଚାଷ ଆହୁରି ବ୍ୟାପକ ହେବ। ଏହାକୁ ଖାଦ୍ୟ ରୁପେ ଗ୍ରାମସ୍ତରରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି ବୋଲି ଉପସ୍ଥିତ ବିଭାଗୀୟ ଅଧିକାରୀମାନେ ସୂଚନା ଦେଇଥିଲେ। ସେହିଭଳି ମାଣ୍ଡିଆକୁ ନେଇ ବିଭିନ୍ନ ଖାଦ୍ୟ ପ୍ରସ୍ତୁତ କରି ଅଙ୍ଗନଓ୍ବାଡି କେନ୍ଦ୍ର, ବିଦ୍ୟାଳୟ ମଧ୍ୟାହ୍ନ ଭୋଜନ, ବିଭିନ୍ନ ହୋଟେଲ ଓ ରେଷ୍ଟୁରାଣ୍ଟ ଆଦିରେ ସାମିଲ କରିବା ସହ ମିଲେଟ ଜାତୀୟ ସାମାଗ୍ରୀ ଯଥା ମାଣ୍ଡିଆ, ସୁଆଁ କାଙ୍ଗୁ ଆଦିର ବହୁଳ ବ୍ୟବହାର ନେଇ ଲୋକଙ୍କୁ ସଚେତନତା କରିବାକୁ ଗୁରୁତ୍ୱ ଦିଆଯାଇଛି।
କୋରାପୁଟ ଜିଲାରେ ପୁର୍ବରୁ ୮ ହଜାର ହେକ୍ଟର ଜମିରେ ମାଣ୍ଡିଆ ଉପତ୍ାଦନ ହେଉଥିବାବେଳେ ବର୍ତ୍ତମାନ ଜିଲାରେ ୨୭ ହଜାର ହେକ୍ଟର ଜମିରେ ମାଣ୍ଡିଆ ଚାଷ ହେଉଛି ବୋଲି ଜିଲା ମୁଖ୍ୟ କୃଷି ଅଧିକାରୀ ସୂଚନା ଦେଇଥିଲେ। ଚଳିତ ବର୍ଷ ୪୬ଟି ମଣ୍ଡିରେ ୨୧୯ ହଜାର କୁଇଣ୍ଟାଲ ମାଣ୍ଡିଆ ସଂଗ୍ରହ କରିବା ଲକ୍ଷ୍ୟ ରଖାଯାଇଛି। ବର୍ତ୍ତମାନ ସୁଦ୍ଧା ୧୪୬ ହଜାର କୁଇଣ୍ଟାଲ ମାଣ୍ଡିଆ ସଂଗ୍ରହ କରାଯାଇଥିବା ସେ ସୂଚନା ଦେଇଛନ୍ତି। ପୁର୍ବରୁ ଚାଷୀମାନେ କେବଳ ଧାନ ଚାଷ ପ୍ରତି ଗୁରୁତ୍ୱ ଦେଉଥିଲେ। ମାଣ୍ଡିଆର କେଜି ପ୍ରତି ଦର ଧାନର ଦୁଇଗୁଣା ହୋଇଥିବାରୁ ଚାଷୀମାନେ ଏବେ ମାଣ୍ଡିଆ ଚାଷ ପ୍ରତି ମନ ବଳାଉଛନ୍ତି। ମାଣ୍ଡିଆ ଓ ଅନ୍ୟ ମିଲେଟ ଜାତୀୟ ଶସ୍ୟର ସ୍ବାସ୍ଥ୍ୟ ପକ୍ଷେ ଅମୃତ ବୋଲ ବିଶେଷଜ୍ଞମାନେ କହିବାପରେ ଏହାର ଚାଷ ଓ ବ୍ୟବହାର ବଢ଼ିଛି ବୋଲି ସେ କହିଛନ୍ତି। ସେହିପରି ଚଳିତ ମାର୍ଚ୍ଚ ଶେଷ ସୁଦ୍ଧା ମାଣ୍ଡିଆ ଉପରେ ଅଧିକ ସଚେତନତା ନେଇ ଜିଲାରେ ଥିବା ସମସ୍ତ ବିଦ୍ୟାଳୟରେ ବିଭିନ୍ନ କାଯର୍ୟକ୍ରମ କରାଯିବ ବୋଲି ରାଜ୍ୟ ମିଲେଟ ମିଶନର ପ୍ରତିନିଧି ଦିବ୍ୟଶ୍ରୀ ଟୋପ ସୁଚନା ଦେଇଛନ୍ତି।