ରିପୋର୍ଟର୍ସ ଓ୍ବିଦାଉଟ୍ ବର୍ଡର୍ସ ପକ୍ଷରୁ ପ୍ରତିବର୍ଷ ବିଶ୍ୱ ଗଣମାଧ୍ୟମ ସ୍ବାଧୀନତା ଦିବସ ମେ’ ୩ରେ ପ୍ରେସ୍ ଫ୍ରିଡମ୍ ଇଣ୍ଡେକ୍ସ ପ୍ରକାଶ ପାଇଥାଏ। ଏଥିରେ ବିଶ୍ୱର ୧୮୦ ରାଷ୍ଟ୍ର ଓ ଭୂଖଣ୍ଡରେ ଜର୍ନାଲିଜମ୍ ପାଇଁ ରହିଥିବା ବାତାବରଣର ମୂଲ୍ୟାଙ୍କନ କରାଯାଇଥାଏ। ଚଳିତବର୍ଷ ଯୁଦ୍ଧ ପୂର୍ବରୁ ପ୍ରକାଶିତ ଏହି ସୂଚକାଙ୍କରେ ପାଲେଷ୍ଟାଇନ୍ ୧୫୬ ସ୍ଥାନରେ ରହିଥିଲା। ୨୦୨୨ରେ ୨ ଖବରଦାତାଙ୍କ ମୃତ୍ୟୁ ପରେ ଏହାର ସୁରକ୍ଷା ସୂଚକାଙ୍କ ଅତି ଦୁର୍ବଳ ରହିଥିବା ଏଥିରେ ଉଲ୍ଲେଖ କରାଯାଇଥିଲା। ଓ୍ବେଷ୍ଟ୍ ବ୍ୟାଙ୍କରେ ଖବରଦାତାମାନେ ଉଭୟ ପାଲେଷ୍ଟିନୀୟ କର୍ତ୍ତୃପକ୍ଷ ଓ ଇସ୍ରାଏଲୀ ଦଖଲକାରୀ ବଳଙ୍କ ଦ୍ୱାରା ଗଣମାଧ୍ୟମ ସ୍ବାଧୀନତା ଉଲ୍ଲଂଘନର ଶିକାର ହୋଇଥିଲେ। ଗାଜା ଷ୍ଟ୍ରିପ୍ରେ ଇସ୍ରାଏଲୀ ସାମରିକ ଆକ୍ରମଣ ଓ ହମାସ୍ ନୀତି ଗଣମାଧ୍ୟମ ପ୍ରତି ବିପଦ ସୃଷ୍ଟି କରିଥିବା ଉକ୍ତ ରିପୋର୍ଟରେ ଦର୍ଶାଯାଇଥିଲା। ୨୦୨୨ରେ ଇସ୍ରାଏଲୀ ଆଇନ ପ୍ରବର୍ତ୍ତନକାରୀଙ୍କ ଦ୍ୱାରା ଅଲ୍-ଜଜିରା ରିପୋର୍ଟର ଶିରୀନ୍ ଅବୁ ଆଲେଖଙ୍କ ସମେତ ଦୁଇଜଣ ମହିଳା ଖବରଦାତା ହତ୍ୟାର ଶିକାର ହୋଇଥିଲେ। ଏହି ଅପରାଧ ପାଇଁ ହତ୍ୟାକାରୀଙ୍କୁ ଏଯାଏ ଦଣ୍ଡ ମିଳିନାହିଁ।
