ଧରିତ୍ରୀ ପ୍ରଭାବ: ଖାଦ୍ୟନଳୀ ନଥିବା ଶିଶୁକୁ ମିଳିବ ଚିକିତ୍ସା ସୁବିଧା

ବଲାଙ୍ଗୀର,୧୮ା୧୨(ବୀରେନ୍ଦ୍ର କୁମାର ଝାଙ୍କର): ଖାଦ୍ୟନଳୀ ନ ଥିବା କାରଣରୁ ଜଣେ ଶିଶୁ କିଭଳି ବଞ୍ଚତ୍ବା ପାଇଁ ସଂଘର୍ଷ କରୁଛି ଏବଂ ଏକ ଦିନମଜୁରିଆ ଦମ୍ପତି କିଭଳି ଦୀର୍ଘ ୯ ମାସ ଧରି ଡାକ୍ତରଖାନା ଦୌଡୁଛନ୍ତି ସେନେଇ ଗତ ୧୪ତାରିଖ ଧରିତ୍ରୀରେ ଏକ ଖବର ପ୍ରକାଶିତ ହୋଇଥିଲା। ଖବର ପ୍ରକାଶ ପରେ ଶିଶୁକୁ ଚିକିତ୍ସା ସହାୟତା ଯୋଗାଇବା ସହ ଆବଶ୍ୟକ ସହାୟତା ଯୋଗାଇବାକୁ ବଲାଙ୍ଗୀର ଜିଲା ପ୍ରଶାସନ ଆଗଭର ହୋଇଛି। ଜିଲାପାଳ ଚଞ୍ଚଳ ରାଣା ଜିଲା ଶିଶୁ ସୁରକ୍ଷା ୟୁନିଟ୍‌କୁ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ। ଜିଲା ଶିଶୁ ସୁରକ୍ଷା ୟୁନିଟ୍‌ ଅଧିକାରୀ ଲକ୍ଷ୍ମୀ ସିଂ ଜିଲାପାଳଙ୍କଠାରୁ ନିର୍ଦ୍ଦେଶ ପାଇବା ପରେ ଶିଶୁ ସୁରକ୍ଷା ପ୍ରତିନିଧି ଅରୁଣ ଖୁଆସଙ୍କୁ ପୀଡିତା ଶିଶୁକନ୍ୟା ସଂକ୍ରାନ୍ତରେ ଉପଯୁକ୍ତ ଖବର ସଂଗ୍ରହ ସହ ବାସ୍ତବିକ ସ୍ଥିତି ଆକଳନ ଏବଂ ଚିକିତ୍ସା ସହୟତା ଯୋଗାଇବାକୁ ବିନ୍ଧାପାଲି ଗଁାକୁ ପଠାଇଥିଲେ। ଶିଶୁ ସୁରକ୍ଷା ଅଧିକାରୀ ଖୁଆସ ଶୁକ୍ରବାର ଆଗଲପୁର ବ୍ଳକ୍‌ର ବିନ୍ଧାପାଲି ଗସ୍ତ କରି ପୀଡିତା ଶିଶୁକନ୍ୟା ଆରତୀଙ୍କ ପିତା ସରୋଜ ସାହୁ ଓ ମାତା ଅନୁରାଧାଙ୍କୁ ଭେଟି ପ୍ରଶାସନିକ ସହାୟତା ସମ୍ପର୍କରେ ଆଲୋଚନା କରିଛନ୍ତି।
୯ ମାସ ତଳେ ଆରତୀଙ୍କୁ ଜନ୍ମ ଦେଇଥିଲେ ଅନୁରାଧା। ଜନ୍ମରୁ ଖାଦନଳୀ ନଥିବା ଜଣାପଡିବା ପରେ ଶିଶୁକୁ ଉଚ୍ଚତର ଚିକିତ୍ସା ପାଇଁ ସରୋଜ ସାହୁ ଦମ୍ପତି ବୁର୍ଲା ଓ ପରେ କଟକ ଶିଶୁ ଭବନ ନେଇଥିଲେ। ଶିଶୁ ଭବନରେ ଭର୍ତ୍ତି ପରେ ପ୍ରଫେସର ଡା ପି.କେ.ଜେନା ଶିଶୁର ଶରୀର ବାହାରେ ଏକ କୃତ୍ରିମ ଖାଦ୍ୟନଳୀ ଖଞ୍ଜିଥିଲେ। ଗତ ୩୧ ମାର୍ଚ୍ଚ ୨୦୨୩ ଦିନ ଶିଶୁ ଭବନରୁ ଆରତୀଙ୍କୁ ଡିସଚାର୍ଜ କରାଯାଇଥିଲା। ୧୨ ମାସ ସମୟ ଅତିବାହିତ ହେବା ପରେ ଏକ ଅସ୍ତ୍ରୋପଚାର ପରେ ଶରୀରରେ କୃତ୍ରିମ ଖାଦ୍ୟନଳୀ ଖଞ୍ଜାଯିବ ବୋଲି କହିଥିଲେ। ଶିଶୁର ଶରୀରରେ କୃତ୍ରିମ ଖାଦ୍ୟନଳୀ ପ୍ରତିରୋପଣ କରାଯିବା ପର୍ଯ୍ୟନ୍ତ ପ୍ରତି ସପ୍ତାହରେ ଶରୀର ବାହାରେ ଲଗାଯାଇଥିବା ଖାଦ୍ୟନଳୀକୁ ସଫା କରାଯିବ ଓ ପ୍ରତି ମାସରେ କଟକ ବଡ ଡାକ୍ତରଖାନା ଶିଶୁଭବନକୁ ଆସିବାକୁ ପଡ଼ିବ ବୋଲି ସେଠାକାର ବିଶେଷଜ୍ଞ ଡାକ୍ତରମାନେ ପରାମର୍ଶ ଦେଇଥିଲେ। ତେବେ ଦିନ ମଜୁରିଆ ଭାବେ କାମ କରି ପରିବାର ପ୍ରତିପୋଷଣ କରୁଥିବା ସରୋଜ ଝିଅକୁ କଟକ ବଡ ଡାକ୍ତରଖାନାକୁ ୬ ଥର ନେବା ପରେ ଅର୍ଥାଭାବରୁ ଆଉ ନେଇ ପାରି ନ ଥିଲେ। ଏହା ଜାଣିବା ପରେ ଆଗଲପୁର ମାହେଶ୍ୱରୀ ସଙ୍ଗଠନ ସ୍ବେଚ୍ଛାସେବୀ ସନ୍ୟାସୀ ମେହେର ଓ ଅନ୍ୟ ସଦସ୍ୟ ସରୋଜଙ୍କ ଝିଅକୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲକୁ ଆଣି ଚିକିତ୍ସା କରାଇଥିଲେ। ଜିଲାପାଳଙ୍କ ନିର୍ଦ୍ଦେଶ ପରେ ଜିଲା ଶିଶୁ ସୁରକ୍ଷା ଅଧିକାରୀ ଲକ୍ଷ୍ମୀ ସିଂ ଓ ଶିଶୁ ସୁରକ୍ଷା ୟୁନିଟ ପ୍ରତିନିଧି ଖୁଆସ ଶିଶୁକନ୍ୟା ଆରତୀଙ୍କ ଆବଶ୍ୟକ ଚିକିତ୍ସା ଓ ତାଙ୍କ ପିତାମାତାଙ୍କୁ ଉଚିତ୍‌ ସହାୟତା ଯୋଗାଇବାକୁ ଜିଲା ପ୍ରଶାସନ କିଭଳି ପଦକ୍ଷେପ ନେବ ସେନେଇ ଜଣାଇଥିତ୍ବା ସୂଚନା ଦେଇଛନ୍ତି।